Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺MAer die Heere heeft tot Moysen gheseyt, Gaet innewaerts by Pharao, ende segt hem, Dit seyt die Heere der hebreusscher Godt Laet ghaen mijn volck, dat sij my moghen sacrificie doen.

+ A

2

Ende eest dat ghy dat noch weyghert, ende hen houdet,

3

siet soe sal mijn hant wesen ouer v ackers, ende ouer v peerden, ende ezelen, ende kemelen, ende schapen ende ossen, een seer swaer pestilencie.

4

Ende die Heere sal wonder doen tusschen die erue der kinderen van Israhel, ende die erue der Egiptenaren, alsoe datter niet en sal verdoruen worden van alle dat den kinderen van Israhel toebehoort.

5

Ende die Heere heeft den tijt ghestelt segghende, Morghen sal die Heere dit woerdt doen opt lant.

6

Dus heeft die Heere des anderen daechs dit woerdt ghedaen, ende alle ghedierten der Egiptenaren sijn ghestoruen, ⁺maer vanden ghedierten der kinderen van Israhel, en esser niet met allen ghestoruen.

+ B

[p. *85]

7

Ende Pharao sandt om dit te besien, maer daer en was niet een doot van tgheen dat die kinderen van Israhel besaten. Ende Pharaos herte worde verhart ende hy en heeft dat volck niet laten ghaen.

8

Ende die Heere heeft gheseyt tot Moyses ende Aaron, Neemt v handen vol asschen wten schoorsteen, ende laet Moyses die spraeyen inden hemel voer Pharao,

9

Ende laet stubbe werden ouer alle dlant van Egipten, want het sullen sijn in die menschen ende beesten, sweren ende opghehauen puysten, in alle dlant van Egipten.

10

Ende sij hebben asschen wt den schoorsteen ghenomen, ende hebben voer Pharao ghestaen, ende Moyses stroeyde die asschen in die locht, ende het sijn worden sweren met swillende puysten, op die menschen ende beesten,

11

⁺alsoe dat die toueraers niet en conden staen voer Moysen, om die sweren die op hen waren, ende ouer alle dlant van Egipten.

+ C

12

Ende die Heere heeft dat herte van Pharao verhart, ende hy en heeft hen niet ghehoort, ghelijck die Heere tot Moysen gheseyt hadde.

13

Ende die Heere heeft tot Moysen gheseyt, Staet morghen vroech op, ende gaet staen voer Pharao, ende ghy sult tot hem segghen, Dit seyt die Heere der Hebreusscher Godt, Laet mijn volc gaen, dat sij my moghen sacrificie doen.

14

Want te deser reysen sal ic alle mijn plaghen senden op v herte, ende op v dienaers, ende op v volck, dat ghy weten moecht datter op heel aertrijck niemant en es mijns ghelijck.

15

Want ic sal nv mijn hant wtreycken ende slaen v, ende v volck met die pestilencie, ende ghy sult vergaen vander aerden.

16

⁺Want ic heb v daer om ghestelt, dat ick mijn stercheyt aen v wil toonen, ende dat mijnen naem mach vermaert worden ouer alle aertrijck.

+ D

17

Houdt ghy noch mijn volck, ende en wilt ghy dat niet laten gaen?

18

Siet ick sal morghen te deser seluer vren, eenen seer grooten haghel van bouen laten vallen, dat desghelijcs noyt in Egipten geweest en es, van den dach dat gesticht es, tot desen tijt toe.

19

Daer om seyndt nv wt, ende vergadert allen v beesten, ende alle dat ghy opt velt hebt, want die menschen ende die beesten, ende alle dat buyten gheuonden sal worden, ende wten velde niet ghehaelt en sal wesen, ende dien haghel daer op vallet sullen steruen.

20

⁺Ende wie van Pharaos knechten het woerdt des Heeren vreesde, die dede sijn knechten ende sijn beesten in die huysen vlieden.

+ E

21

Maer die op des Heeren woerdt niet en achte, heeft sijn knechten ende beesten op die velden ghelaten.

22

Ende die Heere heeft tot Moysen gheseyt, Reyckt wt v hant ten hemelwaert, dat haghel worde ouer alle dlant van Egipten op die menschen, ende op die beesten, ende op alle cruyt der velden int lant van Egipten.

23

Ende Moyses heeft die roede ten hemelwaerts wt ghesteken, ende die Heere heeft ghegeuen donder ende haghel ende blixemen ouer daertrijck omloopende, ende die Heere heeft eenen haghel doen vallen op dlant van Egipten.

24

⁺Ende den haghel met vier ghemenghet dreuen tsamen, ende den haghel was soe groot, dat desghelijcs te voren noyt ghesien en was in alle dlant van Egipten, vander tijt dat dit volc ghemaect was.

+ F

25

Ende den haghel heuet al verslaghen in alle dlant van Egipten, datter op die velden was, vanden menschen totten beesten, ende alle cruyt des velts versloech den haghel, ende hy brac alle die boomen des lants.

26

Maer alleen int lant van Gessen daer die kinderen van Israhel waren, en es gheenen haghel gheuallen.

27

Ende Pharao heeft wtghesonden, ende Moysen, ende Aaron doen roepen, segghende tot hen, Ick heb nv oec ghesondicht, die Heere es rechtuerdich, maer ic ende mijn volck sijn ongoddelijck.

28

Bidt den Heere, dat die donderslaghen Gods, ende den haghel wil ophouden, op dat ic v lieden mach laten gaen, ende dat ghy hier niet langher en blijuet.

29

Moyses seyde Als ic wter stadt sal gheghaen wesen, soe sal ic myn handen tot den Heere wtreycken, ende dan sullen die donderen ophouden, ende ten sal niet meer haghelen, op dat ghy weten moecht dat het aertrijc den Heere toe behoort.

30

Maer ic weet wel dat ghy, ende v knechten, Godt den Heere noch niet en vreest.

31

⁺Aldus es het vlas ende die gherste gheschent, aenghesien dat die gherste groeyende was, ende dat vlas hadde bollekens voertbracht.

+ G

32

Maer die terwe ende die rogghe en sijn niet ghescent, om dat sij spade ghesayet waren.

33

Ende als Moyses van Pharao ghegaen was wter stadt, soe heeft hy sijn handen totten Heere wtghesteken, ende den dondere ende haghel hebben opghehouden, noch daer en druypten gheenen reghen meer opder aerden.

34

Maer Pharao siende dat den reghen, ende haghel, ende donder ophielen, heeft sijn sonde vermeerdert, ende sijn herte, ende die herten van sijnen dienaers sijn swaer gheworden,

35

ende wter maten seer verhart, ende hy en heeft die kinderen van Israhel niet laten gaen alsoe die Heere gheboden hadde doer die hant van Moyses.