Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde die Heere heeft tot Moysen gheseyt, Gaet in tot Pharao, ende ghi sult tot hem segghen. Dit seyt die Heere, Laet mijn volck gaen, dat my sacrificie doe.

+ A

2

Maer eest dat ghijse niet en wilt laten gaen, siet soe sal ic alle die palen ws lants met vorsschen plaghen.

3

Ende den vloet sal vorsschen opworpen, ende die sullen opcomen, ende in v huys comen, ende in v slaepcamer, ende op v bedde, ende in uwer dienaers huysen, ende in v volc, ende in v backouens, ende in die bleuelinghen van uwer spijsen.

4

Ende die vorsschen sullen tot v, ende tot v volc, ende tot allen v knechten incomen.

5

⁺Ende die Heere heeft tot Moysen gheseyt, Segt tot Aaron, Reyct wt v hant op die vloeden ende op die riuieren, ende staende wateren, ende brengt voerts die vorsschen op dlant van Egipten.

+ B

6

Ende Aaron reycte sijn hant wt ouer die wateren van Egipten, ende die vorsschen sijn opcomen, ende hebben dlant van Egipten bedect.

7

Maer die tooueraers deden oec desghelijck doer haer toouerien, ende sij brachten oec vorsschen voerts opt lant van Egipten.

8

Maer Pharao heeft Moysen ende Aaron gheroepen, ende tot hen gheseyt, Bidt den Heere, dat hy die vorsschen van my ende van mijnen volcke neme, ende ick sal het volck laten gaen, dat si den Heere moghen sacrificie doen.

9

Ende Moyses heeft tot Pharao gheseyt Stelt uw tijt, wanneer dat ic voer v bidden sal, ende voer v dienaers, ende voer v volc, dat die vorsschen moghen verdreuen worden van v, ende van uwen huyse, ende van uwen dienaers, ende van uwen volcke, ende dat sij alleen blijuen inden vloet.

10

⁺Ende hy antwoerde, Morghen. Ende Moyses seyde, Nae v woerdt sal ic doen, op dat ghy weten moecht, datter niemant en es ghelijck die Heere onse Godt.

+ C

11

Ende die vorsschen sullen wech gaen van v, ende van uwen huyse, ende van uwen knechten, ende van uwen volcke, ende sij sullen alleen inden vloet blijuen.

12

Ende Moyses ende Aaron sijn wt ghegaen van Pharao, ende Moyses heeft tot den Heere gheroepen om die belofte der vorsschen, die hy Pharao toegheseyt hadde.

13

Ende die Heere heeft nae Moyses woert ghedaen, ende die vorsschen sijn ghestoruen wten huysen, ende vanden lanthuysen, ende vanden velden.

14

⁺Ende si hebben die vergadert in seer groote hoopen, ende het lant es daer af verrot.

+ D

15

Ende Pharao siende, dat hem ruste ghegeuen was, heeft sijn herte beswaert, ende en heeft hen niet willen hooren, ghelijck die Heere beuolen hadde.

16

Ende die Heere heeft tot Moysen gheseyt, Segt tot Aaron, Reyct wt v roede, ende slaet het stof der aerden, en laet daer moesien wesen ouer alle dlant van Egipten.

17

Ende sij hebben alsoe ghedaen. Ende Aaron heeft sijn hant wtghereyct, houdende die roede, ende hy heeft dat stof der aerden gheslaghen, ende daer sijn moesien ghecomen op die menschen, ende op die beesten, alle dat stubbe der aerden es in moesien verkeert, ouer alle dlant van Egipten.

18

En die toouenaers hebben diesghelijcs ghedaen met haer toouerien, om moesien voerts te brenghen, maer sij en consten dat niet doen. Ende die moesien waren so wel op die menschen als op die beesten.

19

Ende die toouenaers seyden tot Pharao, Dit es Godts vingher. ⁺Ende Pharaos herte es verhart gheworden, ende hy en heeft hen niet ghehoort, alsoe die Heere beuolen hadde.

+ E

20

Ende die Heere seyde tot Moyses, staet morghen vroech op, ende staet voer Pharao, want hy sal wtgaen tot dat water, ende ghy sult tot hem segghen, Dit seyt die Heere, Laet mijn volck gaen, dat my sacrificie doe.

21

Maer eest dat ghy dat niet en laet gaen, siet soe sal ic senden op v, ende op v dienaers, ende op v volck ende in v huysen, alderhande natuere van vlieghen, ende die huysen der Egiptenaren sullen vol vlieghen worden, van verscheyden natueren, ende op alle dlant daer die in sijn.

22

⁺Ende op dien dach sal ic het lant van Gessen wonderlijck maken, daer mijn volck woont, dat daer gheen vlieghen sijn en sullen, ende dan suldi weten dat ic die Heere ben int midden der eerden.

+ F

23

Ende ic sal een onderscheedt stellen tusschen myn volck ende v volck, morghen sal dit teeken wesen,

24

ende die Heere heeft alsoe ghedaen. Ende daer sijn ouer swaer vlieghen comen in die huysen van Pharao, ende sijnder knechten, ende ouer alle dlant van Egipten. Ende het lant es bedoruen van alsulcken vlieghen.

25

Ende Pharao heeft Moysen ende Aaron gheroepen, ende tot hen gheseyt, Gaet henen, ende doet uwen God sacrificie in dit lant.

26

Ende Moyses seyde, Ten mach aldus niet gheschieden, want wij sullen den Heere onsen Godt offeren tghene dat den Egiptenaren een walghinghe es. Ende waert sake dat wij dootsloeghen voer die Egiptenaren tghene dat sij goddienstelijck eeren, soe souden sij ons met steenen doot werpen.

27

⁺Wij sullen drij dachreysen verre reysen in die woestijne, ende daer sullen wij den Heere onsen Godt sacrificie doen, ghelijck hy ons beuolen heeft.

+ G

28

Ende Pharao heeft gheseyt, Ic sal v laten gaen om den Heere uwen Godt sacrificie te doen in die woestijne. Maer nochtans en gaet niet voerder, bidt voer my.

29

Ende Moyses seyde, Als ic van v ghegaen ben, soe sal ick den Heere bidden, ende die vlieghen sullen van Pharao ende van sijnen knechten, ende van sijnen volcke morghen wech gaen. Maer en bedriecht ons niet meer, dat ghy het volck niet en laet gaen den Heere sacrificie doen.

30

Ende Moyses ghinc wech van Pharao, ende hy heeft den Heere ghebeden.

31

Die welcke heeft nae sijn woerdt ghedaen, ende die vlieghen wech ghenomen van Pharao, ende van sijnen knechten, ende van sijnen volcke, alsoe datter niet een ouer en bleef.

32

Ende het herte van Pharao es beswaert gheworden, also dat hy oec dese reyse het volc niet en heeft laten gaen.