Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde die Heere heeft gheseyt tot Moyses, siet ic heb v Godt ghemaect ouer Pharao ende Aaron v broeder sal v propheet wesen,

+ A

2

Ghy sult hem segghen alle dat ick v beuele, ende hy sal tot Pharao spreken, dat hy die kinderen van Israhel wt sinen lande laet gaen.

3

Maer ick sal sijn herte verharden, ende ick sal veel mijnder teekenen ende wonderlicheden doen int lant van Egypten,

4

ende hy en sal v niet hooren, ende ick sal mijn hant op dat landt van Egypten seynden, ende mijn heyr ende mijn volck dye kinderen van Israhel leyden wt dat landt van Egipten, door die alder grootste vonnissen,

5

Ende dan sullen dye Egyptenaren weten dat ick dye Heere ben, die mijn hant wtgereyct hebbe op Egipten, ende die kinderen van Israhel gheleyt wt het midden van hemlieden.

6

Aldus hebben Moyses ende Aaron gedaen, ghelijck die Heere beuolen hadde, soe hebben si ghedaen

7

Ende Moyses was tachtentich iaren out, ende Aaron drijentachtentich, als sij tot Pharao ghesproken hebben,

8

Ende dye Heere heeft gheseyt tot Moyses ende Aaron.

9

⁺Als Pharao v segghen sal, thoont teekenen, soe suldy tot Aaron segghen, Neemt v roede, ende worptse voor Pharao, ende werde in een slanghe verkeert.

+ B

10

Hierom sijn Moyses ende Aaron bi Pharao geghaen, ende hebben ghedaen alsoe hen dye Heere beuolen hadde, Ende Aaron nam die roede voor Pharao ende sijn knechten, ende sij wert verkeert in een slanghe.

11

Ende Pharao heeft gheroepen dye wijse ende toouenaers, ende sij deden oock desghelijcks door haer Egypsche toouerie ende sommighe verholentheden,

12

Ende sij hebben elck haer roeden oeck wech gheworpen, die welcke sijn verkeert in draken Maer Aarons roede verslinde haer roeden,

13

Ende het herte van Pharao es verhart gheworden, ende hy en heeftse niet ghehoort, ghelijck dye Heere beuolen hadde.

14

Maer die Heere heeft tot Moyses gheseyt, Dat herte van Pharao es verswaert, hy en wilt dat volc niet laten gaen.

15

⁺Gaet tot hem morghen vroech, siet hy sal wtgaen nae de wateren, ende ghy sult staen in sijn ghemoet op den oeuer vander riuieren ende ghi sult die roede in v hant houwen die verkeert es gheweest in eenen draec,

+ C

16

ende ghi sult tot hem seggen, Die Heere der hebreeuscher God heeft mi aen v ghesonden, seggende. Laet mijn volc gaen dat si my mogen sacrificie doen inder woestinen, ende ghi en hebt tot den teghenwoordigen tijt, niet willen hooren.

17

Daer om seyt dye Heere dese woerden, Daer aen suldy weten dat ic die Heere ben, siet ic sal metter roede die in mijn hant es slaen dwater vanden vloet, ende tsal verkeert worden in bloet,

18

Ende die visschen die inden vloet sijn sullen steruen, ende die wateren sullen vuyl stinckende worden, ende die Egiptenaers sullen te lijden hebben, drinckende dwater vanden vloet.

19

⁺Ende die Heere heeft tot Moyses gheseyt, Segghet tot Aaron. Neemt v roede ende reyct wt v hant op die wateren van Egipten, ende op haer vloeden, ende riuieren, ende broecken, ende alle staende wateren, dat si in bloet verkeert worden, ende dat bloet si ouer alle dlant van Egypten, soe wel in dye houten als in dye steenen vaten.

+ D

20

Ende Moyses ende Aaron hebben gedaen alsoe die Heere beuolen hadde, ende opheffende sijn roede heeft hi gheslagen dwater vanden vloet, voor Pharao ende sijn knechten dwelc es verkeert in bloet,

21

ende die visschen die inden vloet waren sijn gestoruen, ende den vloet es vuyl stinckende gheworden, ende die Egiptenaren en mochten dwater vanden vloet niet ghedrinken, ende het was bloet ouer alle dlant van Egipten.

22

Ende die toouenaers van Egypten deden desgelijcs met haer toouerien, ende het herte van Pharao es verhart gheworden, ende hy en heeft hen niet ghehoort ghelijc dye Heere beuolen hadde.

23

Ende hy heeft hem af ghekeert, ende es in sijn huys

[p. *84]

ghegaen, ende hy en heeft dese reyse sijn herte daer aen noch niet gheleyt.

24

Maer alle die Egiptenaren hebben gegrauen al omtrent der riuieren nae waeter, om te drincken, want sij en mochten dat water vanden vloet niet drencken.

25

En daer sijn seuen daghen ouerleden, nae dat die Heere den vloet gheslaghen heeft.