Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DIe Heere heeft gheseyt tot Moyses. Nv suldy sien wat ick Pharao doen sal, Want doer een stercke hant sal hijse laten gaen, ende doer een machtighe hant sal hijse van sijnen lande wtwerpen,

+ A

2

Ende die Heere heeft tot Moyses ghesproken, segghende. Ic ben die Heere,

3

die gheopenbaert hebbe, Abraham, Isaac, ende Iacob, inden almachtighen Godt, Ende mijnen naem Adonai, en heb ic hen niet te kennen ghegheuen,

4

Ende ick heb een verbont met hen ghemaect, dat ic hen gheuen soude het lant van Chanaan, het lant van haerder pelgrimagien daer sij vreemdelinghen in gheweest hebben.

5

Ic heb ghehoort het suchten der kinderen van Israhel daer die Egiptenaren hen mede verdruct hebben, ende ic ben ghedachtich worden mijns verbonts,

6

⁺Daerom segt den kinderen van Israhel. Ic ben die Heere, dye v leyden sal wt den werckerker der Egyptenaren, ende wt die slauernie verlossen, ende ick sal v verlossen doer eenen hooghen arm, ende met groote vonnissen,

+ B

7

Ende ick sal v te mywaerts nemen tot een volck, ende sal v Godt wesen, Ende ghi sult weten dat ic ben dye Heere v Godt, dye v sal wtgheleyt hebben wt den werckerker der Egyptenaren,

8

ende ghebrocht in dlant daer ick mijn hant heb op ghehauen, dat ick dat soude gheuen Abraham, Isaac, ende Iacob, Ende ic sal v dat lant geuen te besitten, ic ben dye Heere.

9

Hier om heeft Moyses alle dese woorden den kinderen van Israhel vertelt, dye welcke hem niet en hebben aenhoort, om die benautheyt haers geests ende om die wtnemende harde wercken.

10

Ende die Heere heeft tot Moyses ghesproken, seggende,

11

Gaet binnen, ende spreect tot Pharao den coninc van Egypten

[p. *83]

hy die kinderen van Israhel laet gaen wt sijnen lande,

12

Ende Moyses antwoerde voor den Heere, Siet dye kinderen van Israhel en hooren my niet, hoe sal mi Pharao willen hooren, besonder aenghesien dat ick onbesneden van lippen ben.

13

⁺Ende die Heere heeft ghesproken tot Moyses ende Aaron, ende hen een beuel ghegheuen aen die kinderen van Israhel, ende aen Pharao den coninck van Egypten, dat sij dye kinderen van Israhel souden leyden wt dat lant van Egypten.

+ C

14

Dit sijn die princen der huysen, nae haren huysgesinnen. Die kinderen van Ruben Israels ierste gheboren sone, Henoch, ende Phallu, Hesron, ende Charmi, dit sijn die gheslachten van Ruben.

15

Die kinderen van Symeon, Iamuel, ende Iamin, ende Ahod ende Iachin, ende Sohar, ende Saul eender Chananeeusscher vrouwen sone, dit sijn dye gheslachten van Symeon,

16

Ende dit sijn die namen der kinderen Leui nae haeren gheslachten, Gerson, ende Chaath ende Merari, Ende die iaren des leuens van Leui waren hondert seuenendertich.

17

Dye kinderen van Gerson Lobni, ende Semei, nae haren gheslachten,

18

Die kinderen van Chaath, Amram, ende Isaar, ende Hebron, ende Oziel, Ende die iaren van Chaats leuen, waren hondert drijendertich,

19

Die kinderen van Merari, Mooli, ende Musi, Dit sijn de gheslachten van Leui, nae haren familien.

20

Ende Amram nam tot een huysvrouwe Iochabed sijns ooms dochter, dye welcke hem baerde Aaron ende Moysen, Ende die iaren van Amrams leuen waren hondert seuen ende dertich iaren.

21

Ende die kinderen van Isaar, sijn gheweest Chore, ende Nepheg, ende Zechri,

22

⁺Ende die kinderen van Oziel, Misael, ende Elisaphan, ende Cethri.

+ D

23

Maer Aaron nam tot eender huysvrouwen Elisabeth Aminadabs dochter, die suster van Naason, die welcke hem baerde Nadab, ende Abiu, ende Eleazar, ende Ithamar.

24

Ende die kinderen van Chore, Azar ende Elcana, ende Abiasaph, Dit sijn die gheslachten vanden Choriten,

25

Maer Eleazar Aarons sone nam een huysvrouwe van Phutiels dochteren die welcke hem Phinees ghebaert heeft.

Dit sijn die princen van die huysgesinnen der Leuiten, nae haren geslachten.

26

Dit es Aaron ende Moyses den welcken die Heere beuolen heeft dat sij dye kinderen van Israhel wt Egypten souden leyden nae haren scharen,

27

Dit sijn dye ghene dye tot Pharao den coninck van Egypten spreken, dat si die kinderen van Israhel wt Egypten souden leyden.

28

Dit es Moyses ende Aaron op den dach als dye Heere ghesproken heeft tot Moyses in dlant van Egypten,

29

Ende die Heere heeft tot Moyses ghesproken, segghende. Ick ben dye Heere. Spreect toPharao den coninck van Egypten al dat ick v segghe.

30

Ende Moyses seyde voor den Heere. Siet ick ben onbesneden van lippen hoe sal my Pharao hooren.