Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺DAernae sijn Moyses ende Aaron binnen ghegaen ende hebben tot Pharao gheseyt. Dit seyt die Heere Godt van Israhel. Laet mijn volck gaen dat sij my moghen sacrificie doen in dye woestijne,

+ A

2

Ende hi heeft gheantwoort. Wie es dye Heere dat ick sijn stemme hooren soude, ende Israhel laten gaen? Ick en kenne den Heere niet, ende ic en sal Israhel oec niet laten gaen?

3

Sij hebben geseyt Der hebreeusscher Godt heeft ons gheroepen, dat wij souden ghaen eenen wech van drij dach reysen in die woestijne, ende den Heere onsen Godt sacrificie doen, dat ons by auontueren gheen pestilentie oft sweert en gheschiede,

4

Ende die coninck van Egypten heeft tot hen gheseyt. Waerom benerstet ghy Moyses ende Aaron het volck van haren wercke? gaet henen tot uwen lasten,

5

Ende Pharao heeft gheseyt, Het volc des lants es vele, ende ghi siet dat dye menichte ghewassen es hoe veel te meer, eest dat ghi hen ruste gheeft van haren wercken.

6

⁺Daerom heeft hy op dien dach den meesters der wercken, ende den scatters des volcks beuolen, segghende,

+ B

7

Ghy en sult den volck voertaen gheensins meer caf gheuen om bacsteenen te backen, ghelijc ghi te voren dedet, maer laet hen gaen stroo vergaderen

8

Ende ghi sult hen oplegghen tselue tghetal der bacsteenen dat si te voren maecten, ende daer niet af verminderen, Want si sijn ledich, ende daerom roepen si, segghende. Laet ons gaen, ende sacrificie doen onsen Godt,

9

Laetse verdrucken met wercken, dat sij dye volbringen, op dat sij niet en volghen dye loghentalen.

10

Hier om syn die wercmeesters ende die schatters des volcks wt ghegaen totten volcke, ende hebben gheseyt. Aldus seyt Pharao. Ick en gheue v gheen caf meer,

11

Maer gaet ende vergadert dat, daer ghi dat ergers vinden moecht, ende daer en sal niet ghemindert worden van uwen wercke,

12

⁺Ende tvolck es verstroyt ouer allet landt van Egypten, om caf te vergaderen,

+ C

13

Ende die ouerste des wercs praemden dat volc oeck, segghende. Voldoet v werck alle daghe, ghelijck ghi te voren pleecht te doene, als v lieden caf ghegheuen worde.

14

Ende die wercmeesters der kinderen van Israhel worden gheslagen van Pharaos schatters die welcke seyden. Waerom en hebdy dat ghetal der backsteenen niet voldaen, noch ghisteren, noch heden ghelijck ghi te voren pleecht?

15

Ende die ouerste der kinderen van Israhel sijn ghecomen, ende hebben gheroepen tot Pharao, segghende? Waerom doedy soe tseghen v knechten?

16

Het caf en wort ons niet ghegheuen, ende dye backsteenen worden ons gheboden ghelijck te voren, Siet v knechten worden met gheesselen gheslaghen, ende uwen volck wort groot onrecht aenghedaen,

17

Ende hy seyde. Ghy sijt ledich, ende daerom segdy. Laet ons gaen ende den Heere sacrificie doen,

18

⁺Daerom gaet wech, ende werckt, men en sal v gheen caf gheuen, ende ghi sult het ghewoonlijc ghetal der bacsteenen leueren.

+ D

19

Ende dye wercmeesteren der kinderen van Israhel, saghen hem seluen qualijc staende, om dat hemlieden gheseyt werde. Daer en sal niet vanden backsteenen ghemindert worden tot elcken daghe.

20

Ende sij sijn te ghemoete comen Moysen ende Aaron, die stonden teghen hen ouer, comende van Pharao,

21

ende sij hebben tot hem gheseyt. Die Heere wil aensien ende recht doen, want ghy hebt onsen rueck doen stincken voer Pharao, ende voor sijn dienaers, ende hem een sweert ghegheuen om ons doot te slaen

22

Ende Moyses es wederghekeert totten Heere ende heeft gheseyt. O Heere waerom hebdy den volck dit lijden aenghedaen? Waerom hebdy my ghesonden?

23

Want sedert dat ick tot Pharao ben ghegaen, om te spreken in uwen naem, soe heeft hy v volck veel lijdens aenghedaen, ende ghy en hebtse niet verlost.