Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺MOyses antwoordende heeft gheseyt. Sij en sullen my niet gheloouen, noch mijn stemme hooren, Maer sij sullen segghen. Dye Heere en heeft v niet gheopenbaert,

+ A

2

Daerom heeft dye Heere tot hem gheseyt, Wat eest dat ghy in v hant hebt? Ende hy antwoorde? Een roede,

3

Ende die Heere heeft gheseyt. Worpt dye op deerde, Hij heeftse gheworpen, ende sij es verkeert in een slanghe, alsoe dat Moyses wech vloodt,

4

Ende die Heere seyde. Reyct v hant wt, ende grijpt haren steert, Hy reycte sijn hand wt, ende hieltse, ende sij es verkeert in een roede, Ende hy seyde.

5

⁺Op dat sij moghen gheloouen dat die Heere uwer vaderen God v gheopenbaert heeft, Die Godt van Abraham, die God van Isaac, die Godt van Iacob,

+ B

6

Ende die Heere heeft wederomme gheseyt. Steect v hant in uwen boesem, Ende als hy die in sijnen boesem ghesteken hadde, bracht hy dye wt melaetsch ghelijck sneeu.

7

Ende hi seyde, trect v hant wederom in uwe boesem Hy heeft die weder daer in ghetrocken, ende hy bracht dye weder wt, ende sij was doen ghelijck dat ander vleesch,

8

Ende hy seyde, eest sake dat sij v niet en gheloouen, oft niet hooren en willen die redene van dat eerste teeken, soe sullen si gheloouen het woert van dat nauolgende teeken.

9

Maer eest dat si oeck desen twee teekenen niet en gheloouen, ende v woerden niet en hooren, ⁺soe neemt water van den vloedt, ende stort dat wt opt drooghe, ende wat ghy wt den vloedt scheppen sult, dat sal in bloet verkeert worden.

+ C

10

Ende Moyses heeft gheseyt. Ick bidde v Heere, Want ick en ben niet wel sprekende, van ghisteren ende eerghisteren, ende van dien tijt dat ghy tot uwen dienaer ghesproken hebt, soe ben ic meer belet ende tragher gheworden in mijn tonghe,

11

Ende dye Heere heeft tot hem gheseyt. Wie heeft des menschen mont ghemaect? Oft wie heeft den stommen ende doouen, den siende, ende den blinden gemaect? en ben ick dat niet?

12

Daerom ghaet derwaerts, ende ick sal in uwen mont wesen, ende v leeren wat ghy spreken sult.

13

Ende hy seyde. Ick bidde v Heere, sendt dye ghy senden sult,

14

Ende dye Heere gram wesende op Moyses heeft gheseyt. Ick weet wel dat Aaron v broeder, wt dat gheslachte van Leui welsprekende es, Siet hy sal wtcomen v te ghemoete, ende als hy v sien sal, soe sal hy hem van herten verblijden,

15

⁺Spreect tot hem, ende stelt mijn woorden in sijnen mont, ende ick sal in uwen mont, ende in sijnen mont sijn, ende ick sal v toonen wat ghy sult moeten doen

+ D

16

Ende hy sal voor v tot den volck spreken, ende hy sal uwen mont wesen, Maer ghy sult voor hem wesen in dye dinghen dye Godt aengaen,

17

Ende dese roede neemt in v hant, waer mede dat ghy die teekenen doen sult.

18

Moyses es wech ghegaen, ende wederghekeert tot Iethro sijnen sweer, ende heeft tot hem gheseyt. Laet my ghaen, ende ick sal wederkeeren tot mijnen broeders in Egypten, op dat ick sien mach oft sij noch leuen, Ende Iethro heeft tot hem gheseyt, Gaet in vreden.

19

⁺Doen heeft die Heere tot Moyses geseyt int lant van Madian. Gaet henen ende keert weder in Egypten, Want si sijn alle doot die v ziele sochten.

+ E

20

Aldus nam Moyses sijn huysvrouwe ende sijn sonen, ende hi settese op eenen ezel, ende hy eswederghegaen nae Egypten, draghende Gods roede in sijn hant,

21

Ende dye Heere seyde tot hem doen hy wederkeerde nae Egypten, Siet dat ghy alle die wonderlijcke teekenen (dye ick in v hant ghestelt hebbe) voor Pharao doet Ick sal sijn herte verharden, ende hy en sal dat volck niet laten ghaen,

22

Ende ghy sult tot hem segghen Dit seyt dye Heere. Mijn ierste gheboren sone es Israhel,

23

⁺Ick heb v gheseyt. Laet ghaen mijnen sone, dat hy my diene, ende ghy en hebt hem niet willen laten gaen, Siet ick sal uwen iersten gheboren sone dootslaen.

+ F

24

Ende als Moyses opden wech in dye herberghe was, soe quam hem dye Heere te ghemoete, ende wilde hem dootslaen,

25

Sephora nam terstont eenen seer scherpen steen, ende sij besneedt dye voorhuyt van haers soens manlijc ledt, ende sij raecte sijn voeten, ende seyde. Ghy sijt my een bruydegom des bloets,

26

Doen liet sij hem, nae dat sij gheseyt hadde, Ghi sijt mi een brudegom des bloets om der besnidenissen.

27

⁺Ende die Heere heeft gheseyt tot Aaron, Gaet henen in die woestijne, Moysi te ghemoete, Dye welcke es hem te ghemoet ghegaen inden berch Gods, ende hy heeft hem ghecust.

+ G

28

Ende Moyses heeft Aaron vertelt alle dye woerden des Heeren daer hy hem om ghesonden hadde, ende die teekenen die hy hem beuolen hadde,

29

Ende sij sijn tsamen ghecomen, ende hebben verghadert alle dye ouders der kinderen van Israhel,

30

Ende Aaron heeft al-

[p. *82]

le dye woerden ghesproken, doe Godt tot Moyses gheseyt hadde, ende hy heeft die teekenen voor tvolck ghedaen,

31

ende het volck heuet ghelooft, Ende sij hebben ghehoort dat dye Heere dye kinderen van Israhel besocht hadde, ende haer sware verdructheyt aensien, ende sij hebben aen ghebeden nederbuyghende.

[afbeelding]