Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MOyses voedde die schapen Iethro sijns sweers, des priesters van Madian, Ende als hy die schapen ghedreuen hadde, tot dat diepste der woestijnen, soe quam hy bi den berch Gods Horeb.

+ A

2

Ende die Heere openbaerde hem daer in een [afbeelding] vlamme viers, wt dat midden vanden dorn, ende hy wert siende dat den dorn brande, ende nochtans niet verbrant en worde.

3

Hierom seyde Moyses, Ick sal gaen, ende besien dit groot visioen, Waeromme dat den doren niet verbrant en wort,

4

Maer die Heere siende dat hy voortquam om te besien, heeft hem wt het midden des dorns gheroepen, ende gheseyt, Moyses Moyses? Ende hy antwoorde (Ick ben hier.

5

⁺Maer die Heere. En coemt (seyt hy) hier niet nader, ontbindt die schoenen van uwen voete, want die plaetse daer ghy staet, es heylighe eerde,

+ B

6

Ende hy seyde. Ick ben dye Godt ws vaders, dye Godt van Abraham, die Godt van Isaac, die Godt van Iacob, Moyses bergde zijn aensicht, Want hy en verstoute hem niet teghen Godt op te sien,

7

Ende die Heere seyde tot hem. Ick heb ghesien dat groot lijden mijns volcks in Egypten, ende ick heb hen gheroep ghehoort, om die herdicheyt der gheender die ouerste vanden wercke sijn, ende wetende haer verdriet,

8

ben ick nederghedaelt, om hen te verlossen, wt die handen vanden Egyptenaers, ⁺ende wt dien lande te leyden, in een goet ende seer ruym land, in een lant dat vloeydt van melck ende honich, tot dye plaetsen der Chananeen, ende Hetheen, ende Amorrheen, ende Phereseen, ende Heueen, ende Iebuseen,

+ C

9

Aldus es dat gheroep der kinderen van Israhel tot my comen, ende ick heb hen swaer verdriet ghesien, daer sij vanden Egyptenaers mede verdruct worden,

10

Maer coemt ghi, ende ick sal v tot Pharao senden, dat ghy mijn volck, die kinderen van Israhel leyden moecht wt Egypten,

11

Ende Moyses heeft tot Godt gheseyt. ⁺Wie ben ick doch, dat ick soude tot Pharao ghaen, ende die kinderen van Israhel wt Egypten leyden?

+ D

12

Dye welcke heeft tot hem gheseyt. Ick sal met v wesen, ende dat suldy voer een teeken hebben, dat ick v ghesonden hebbe. Als ghi mijn volck sult wt Egypten gheleyt hebben, soe suldy Gods offerande offeren op desen berch,

13

Ende Moyses heeft tot Godt gheseyt. Siet ick sal tot dye kinderen van Israhel gaen, ende hen segghen, Uwer vaderen Godt heeft my tot v lieden ghesonden, Eest dat sij my segghen. Hoe es sijnen naem? Wat sal ick hen segghen?

14

Ende dye Heere heeft tot Moyses gheseyt. Ick ben, dye ben, Ende hy heeft gheseyt. Aldus suldy den kinderen van Israhel segghen. Dye es, heeft

[p. *81]

my tot v ghesonden.

15

⁺Ende Godt heeft wederom tot Moyses gheseyt, Dit suldy den kinderen van Israhel segghen. Dye Heere Godt van uwen vaderen, dye Godt van Abraham, dye Godt van Isaac, dye Godt van Iacob, heeft my tot v lieden ghesonden, dats mijnen naem inder eewicheyt, ende dat es mijn ghedenckenisse van gheslachte tot gheslachte,

+ E

16

Gaet ende vergadert dye ouders van Israhel, ende segghet tot hen. Dye Heere uwer vaderen Godt heeft my gheopenbaert Abrahams Godt, ende Isaacs Godt, ende Iacobs Godt, segghende. Besoeckende, heb ick v besocht, ende ghesien alle dat v in Egypten gheschiet es,

17

⁺ende ick heb gheseyt, dat ick v leyden soude wt dat verdriet van Egypten int lant der Chananeen, ende Hetheen, ende Amorrheen ende Phereseen, ende Heueen, ende Iebuseen, tot een landt dat vloeyt van melck ende honich,

+ F

18

Ende sij sullen v stemme hooren, ende ghy metten ouders van Israhel sult ghaen binnen by den coninck van Egypten, ende tot hem segghen. Dye Heere Godt der hebreusscher heeft ons gheroepen. Wij sullen ghaen drij dach reysen inder woestijnen, om daer offerande te doen den Heere onsen Godt,

19

Maer ick weet dat dye coninck van Egypten v niet en sal laten gaen, dan door een machtighe hant,

20

⁺Ende ick sal mijn hant wtreycken, ende Egypten slaen, met alle mijnen wonderlijcheden, dye ick doen sal, int midden van hemlieden, Daer nae sal hy v laten ghaen,

+ G

21

ende ick sal desen volcke gratie gheuen voor die Egyptenaers, ende als ghy wtghaen sult soe en suldy niet idel wtgaen.

22

Maer een vrouwe sal begheren van haerder ghebuerinnen, ende van haerder weerdinnen, gouden ende silueren vaten, ende cleederen, ende die suldy uwen sonen ende dochteren oplegghen, ende alsoe suldy Egypten beroouen.