Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde nae, desen esser een man vanden huyse Leui ghecomen ende heeft een huysvrouwe ghenomen van sijnen gheslachte,

+ A

2

dye welcke heeft ontfanghen ende ghebaert eenen sone, ende siende dat hy fray was, heeft sijt drij maenden gheborghen,

3

Ende doen sij dat niet langher en conste verborghen, soe heeft sij ghenomen een corfken van biesen ghemaect, ende dat met lijm ende peck bestreken, ende dat kindeken daer inne gheleydt ende alsoe stelde sij hem int lisch vanden oeuer des vloets,

4

ende sijn suster stont van verre gade slaende hoe dat dit vergaen soude.

5

Ende siet dye dochter van Pharao es nederwaerts ghecomen, om inden vloedt ghewasschen te worden, ende haer ioncvrouwen dye ghinghen op den oeuer vanden vloedt, Ende als sij dat corfken int lisch ghesien hadde, soe sandt sij eenen van haren dienstvrouwen, Ende dede dat halen ende alst ghehaelt was,

6

soe dede sij dat open, ende siende daer inne een weenende kindeken, ende sijns ontfermende seyde sij. Dits een vanden hebreeuschen kinderkens,

7

⁺Doen seyde dye suster des kindekens. Wildy, dat ick gaen een hebreeussche vrouwe halen, dye dit kindeken sal moghen voesteren?

+ B

8

Sij antwoorde, Gaet henen, Dye ionghe dochter es wech ghegaen ende sij heeft haer moeder gheroepen,

9

Tot die welcke sprekende die dochter van Pharao. Neemt (seyde si) dit kint ende voestert my dat. Ick sal v uwen loon gheuen. Die vrouwe heeft dat kint ghenomen ende gheuoestert,

10

Ende alst groot ghewassen was soe heeft sij dat der dochter van Pharao gheleuert, Het welcke sij aenghenomen heeft in plaetse van eenen sone, ende hem

[p. *80]

ghenoemt Moyses, segghende. Ick heb hem wten water ghenomen.

11

In dien tijden als Moyses groot ghewassen was, soe es hy wt ghegaen tot sijn broeders, ende hy sach haer groot lijden, ende eenen Egypscen man die sloech eenen vanden hebreeusscen sijnen broeders

12

Ende doen hy herwaerts ende derwaerts omme ghesien hadde, ende niemant daer omtrent en sach versloech hy dien Egyptenaer ende berchde dien int sandt.

13

⁺Ende des anderen daechs es hy wt gheghaen ende wert siende datter twee vanden hebreeuschen keuen, ende hy seyde tot hem dye onrecht dede. Waerom slady uwen naesten?

+ C

14

Die welcke heeft gheantwoort, Wie heeft v een ouerste ende een rechter ouer ons ghemaect? Wildy my oeck dootslaen ghelijck ghi ghisteren den Egyptenaer dootgheslagen hebt? Moyses die vreesde ende seyde. Hoe es dit woert int openbaer comen?

15

Ende Pharao heeft dit ghehoort, ende hy socht Moysen om te dooden, dye welcke es wt sijn ooghen gheuloden, ende heeft hem onthouden in dlant van Madian,

16

ende sadt daer by eenen put.

Ende die priester van Madian hadde seuen dochteren, dye welcke ghecomen waren om water te scheppen, ende als sij dye water backen gheuult hadden, soe begheerden sij haers vaders cudden te wateren,

17

maer dye herders quamen hen ouer, ende veriaechdense van daer, ende Moyses es opghestaen ende heeft dye ionghe dochters beschermt ende haer schapen ghewatert,

18

Ende als sij tot Raguel haren vader wedercomen waren, soe seyde hy tot hen. Waerom sijdi nv vroegher ghecomen dan ghy pleecht?

19

Sij antwoorden Een Egypsch man heeft ons verlost wt der herderen hant ende daer bouen met ons oeck water gheschepet ende den schapen te drincken ghegheuen,

20

⁺Ende hi seyde, Waer es dye man? Waerom hebdy hem laten gaen? roept hem dat hy mach broot eten,

+ D

21

Dus heeft Moyses ghesworen, dat hy by hem soude blijuen woonende, Ende hy heeft Sephora sijn dochter tot eender huysvrouwen ghenomen,

22

dye welcke hem eenen sone heeft gheaert, ende hy hiet dien Gersam, segghende. Ick heb een vreemdelinck gheweest in een vreemt landt, Ende sij heeft noch eenen sone ghebaert, den welcken hy ghenaemt heeft Eliezer, segghende. Want mijns vaders Godt es mijn helper, ende hy heeft mi verlost wt Pharaos hant,

23

Maer nae veel tijts es dye coninck van Egypten ghestoruen, Ende die kinderen van Israhel suchtende om hen wercken hebben gheroepen,

24

ende haren roep es tot Godt opgheclommen van den wercken, Ende Godt heeft hen suchten ghehoort, ende hi es ghedachtich worden des verbonts dat hy ghemaeckt hadde met Abraham, Isaac, ende Iacob,

25

Ende dye Heere heeft die kinderen van Israhel aensien ende hi heeftse verlost.