Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺DIT sijn die namen der kinderen van Israhel, die met Iacob in Egypten ghegaen waren, een yeghelijc es met sijn huysghesinne daer inne comen,

+ A

2

Ruben, Symeon, Leui, Iudas

3

Issachar, Zabulon, ende Beniamin,

4

Dan, ende Nepthtali, Gad, ende Aser,

5

Aldus waren alle dye zielen van dye wt Iacobs dgye comen waren tseuentich, Maer Ioseph was in Egypten,

6

Ende als hy ghestoruen was, met alle sijnen broeders, ende alle sijn gheslachte,

7

soe zijn die kinderen van Israhel ghewassen ende vermenichfuldicht, ghelijck oft sij ghegroeyt hadden, ende sijn bouen maten seer sterc gheworden, ende hebben het lant veruult.

8

⁺Ende binnen middelen tijden soe es daer een nyenwe coninck van Egypten opghestaen, die Ioseph onbekent was,

+ B

9

ende hy seyde tot sijnen volcke. Siet het volck der kinderen van Israhel es seer veel ende stercker dan wij sijn,

10

Dus coemt ende laet ons dat wijselijck verdrucken op dattet by auontueren nyet vermenichfuldicht en worden, ende waert datter een oorloghe teghen ons opstonde, dat sij hen dan met onsen vianden niet en vueghen, ende ons verwonnen hebbende wten lande ghaen,

11

Hierom heeft Pharao ouer hen wercmeesters ghestelt, dat dye hen souden quellen met ouerlastinghe ende sij hebben voor Pharao ghetimmert die steden der tabernakelen, Phiton, ende Ramesses,

12

⁺Ende hoe sij dye meer verdructen, soe dye meer vermenichfuldicht ende grooter worden,

+ C

13

Ende dye Egyptenaren haetten dye kinderen van Israhel ende sij benaudense, henlieden bespottende,

14

ende brachten hen leuen tot bitterheyt door harde wercken van cleem ende backsteenen, ende door alderhande dienst daer sij mede ghepraemt worden, om in die aerde te wercken.

15

Ende dye conick heeft gheseyt tot dye vroedevrouwen der hebreeusscen, waer afdye eene hiet Sephora, ende dander Phua, gebiedende, hen,

16

Wanneer ghy den hebreeusschen vrouwen als vroede vrouwen bystaen sult, ende den tijt des barens nakende es, eest dat een knechtken es, soe doodet, maer eest een meysken, soe behoudet.

17

⁺Maer die vroede vrouwen vreesden Godt, ende sij en deden niet nae des conincks van Egypten ghebodt, Maer sij behielden dye knechtkens,

+ D

18

Ende die coninck die vroede vrouwen ontboden hebbende tot hem, heeft gheseyt. Wat es dit dat ghy hebt willen doen, dat ghy die knechtkens behoudt?

19

Ende sij hebben gheantwoort. Dye hebreeussche vrouwen en sijn niet ghelijck dye Egypsche vrouwen, want sij hebben seluer dye conste der vroedevrouwen, ende sij baren, eer dat wij by hen comen,

20

Daerom heeft Godt den vroedevrouwen wel ghedaen, ende dat volck wies ende worde versterct bouen maten seer

21

Ende om dat dye vroedevrouwen Godt ghevreest hebben timmerde hy hen huysen,

22

Dus heeft Pharao alle sijnen volcke gheboden, segghende. Al watter gheboren wordt van mans natuer dat worpt inden vloedt, ende soe wat van vrouwen natuer es dat behoudt.