Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlix. Capittel.

1

⁺ENde Iacob heeft sijn kinderen gheroepen ende gheseyt tot hen. Vergadert v, dat ick v te kennen gheue dat v toecomende es in dye laetste dagen,

+ A

2

Vergadert v ende hoort Iacobs kinderen, hoort Israhel uwen vader.

3

Ruben mijn eerste geboren sone, ghi sijt mijn stercheyt ende tbeghinsel van minen lijden. Deerste in die gauen die meeste van beuele,

4

Ghi sijt wtgestort ghelijck water, en wast niet, want ghi hebt gheclommen op ws vaders bedde, ende sijn rustplaetse besmedt.

5

Symeon ende Leui ghebroeders, strijdende vaten der boosheyt,

6

In haren raet en moet mijn ziele niet comen, ende in haer vergaderinghen en sij mijn glorie niet, Want in haer rasende gramschap hebben sij den man ghedoot, ende met haren wille hebben sij den muer ondergrauen,

7

Vermalendijt si haer rasende gramschap, want die hartneckich es, ende haer verbolghentheyt, want die hart es, Ick salse verdeylen in Iacob, ende verstroyen in Israhel.

8

⁺Iuda v broeders sullen v louen, v handen sullen in die necken uwer vianden wesen, ws vaders sonen sullen v aenbidden,

+ B

9

Iudas ghy sijt een welpen van eenen leeuwe, mijn sone ghy sijt opghegaen totten roof, ende rustende sidy neder gheleghen als eenen leew, ende ghelijck een leeuwinne, wie sal hem ontwecken?

10

Den conincklijcke scepter en sal van Iuda niet af genomen worden, noch vorst van sijnder dgyen, tot dat hy come, die ghesonden sal worden, ende hi sal het verbeyden der heydenen sijn,

11

Bindende sijn vuelen aen den wijngaert ende aenden wijnstock (o mijn sone) sijn ezelinnen, hy sal sijn eerlijc cleedt inden wijn wasschen, ende sinen mantel in dat bloet vanden wijndruyuen,

12

Sijn ooghen sijn schoonder dan wijn, ende sijn tanden witter dan melck.

13

Zabulon sal op den oeuer vander zee woonen, ende in die hauene der schepen ghenakende tot Sydon.

14

Issachar eenen stercken esel liggende tusschen dye palen,

15

Hy heeft die ruste ghesien dat si goet was, ende die aerde dat si die beste was, ende hy heeft sijn scouder daer onder ghestelt om te draghen, ende es gheworden dienende onder tribuyt.

16

⁺Dan sal sijnen volck recht doen, ghelijck oeck een ander gheslachte in Israhel.

+ C

17

Laet Dan worden een slange in den wech, ende een cerastes in die pade, bitende des peerts clauwen, dat dye berijder van dyen achterwaerts valle.

18

Heere ick sal uwen salichgheuer verwachten.

19

Gad sal ghegort voer hem vechten, ende hy sal van achter ghegort worden.

20

Aser sijn broot es vet ende hy sal den coninghen wellusticheden gheuen.

21

Nephtali es eenen wtghelaten hert, ende gheuende wtspraken der schoonheyt.

22

Een aenwassende sone es Ioseph, een aenwassende sone ende schoon van aensien, die dochteren hebben gheloopen op dye mueren,

23

maer si hebben hem vergramt, ende ghekeuen, ende hebben hem benijdt, die ghene dye schichten hebben,

24

Sijnen boghe es inden stercken gheseten, ende die banden van sijnen armen ende handen sijn ontbonden, door dye hant des machtighen van Iacob, daer wt es dye herder comen, den steen van Israhel,

25

Ws vaders Godt sal v hulper wesen, ende die almachtighe sal v ghebenediden, met

[p. *78]

dye benedictien des hemels van bouen, met dye benedictien des afgronts nederwaerts ligghende met dye benedictien der borsten ende des buycks,

26

⁺Dye ghebenedijdinghen ws vaders sijn versterct doer sijnder vaderen benedidinghen, tot dat comen soude die begheerte der eewigher hoeuelen, Laetse worden int hooft van Ioseph, ende opden top des hoofts van den nazareus, onder sijn broederen.

+ D

27

Beniamin een grijpende wolf, des morghens vroech sal hy den roof eten, ende des auonts sal hy dye roouen wtdeylen.

28

Alle dese sijn in die twaelf gheslachten van Israhel, Dese woorden heeft hen vader tot hen ghesproken, ende hy heeft elck ghebenedijt met haer eyghen benedictie,

29

ende hen beuolen, segghende. Ick worde versaemt met mijnen volcke, begraeft my met mijnen vaderen in die dobbel speluncke, die daer es opden acker Ephron des Hethiters,

30

teghen ouer mambre int lant van Chanaan, welcke speluncke metten acker, Abraham ghecocht heeft van Ephron den Hethiter, tot een erf begrauenisse,

31

Daer hebben sij hem begrauen ende Saram sijn huysvrouwe, Daer es Isaac begrauen met Rebecca sijn huysvrouwe, ende daer leydt Lia oock begrauen.

32

Ende als voleyndt waren die gheboden, waermede hy sijn kinderen leerde, soe heeft hy sijn voeten verghadert opt beddeken, ende es gestoruen, ende versaemt met sijnen volcke.