Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlviij. Capittel.

1

⁺ALs dese dinghen aldus gheschiet waren, so worde Ioseph ghebootscapt dat sijn vader cranck was, die welcke heeft met hem ghenomen beyde sijn sonen, Manasses ende Ephraim, ende heeft bestaen te reysen.

+ A

2

Ende het es den ouden man gheseyt, Siet v sone Ioseph coemt tot v. Ende hi worde versterct, ende ghinck opt bedde sitten.

3

Ende als Ioseph binnen by hem comen was, soe

[p. *77]

heeft hy gheseyt, God almachtich heeft my gheopenbaert te Luza, welck es in dlant van Chanaan ende hy heeft mi ghebenedijt

4

ende gheseyt, Ick sal v vermeerderen ende vermenichfuldighen, ende ic sal v maken tot groote menichte van volcke, ende ic sal v dit lant gheuen, ende uwen sade nae v tot een eewighe besittinghe,

5

Daer om v twee sonen die v geboren sijn int lant van Egipten, eer ic hier tot v quam, sullen mijne wesen, Ephraim ende Manasses, die sullen mijne gherekent worden, ghelijck Ruben ende Symeon,

6

⁺Maer die andere die ghi crijgen sult nae dese die sullen uwe sijn, ende si sullen met haerder broederen namen ghenaemt worden in haer besittinghen,

+ B

7

Want doen ick quam van Mesopotamien soe es my Rachel af ghestoruen in dlant van Chanaan, op den seluen wech, ende het was in die lenten tijt, ende ick quam doen in Ephrata, ende ick begroefse omtrent den wech van Ephrata, die anders ghenoemt wort Bethleem.

8

Ende als hy Iosephs sonen sach, soe seyde hy tot hem, Wie sijn dese?

9

Ende hi heeft geantwoort, Dit sijn mijn sonen die mi Godt ghegeuen heeft, te deser plaetsen, Brenctse (seyt hy) tot my, dat icse mach ghebenedijden.

10

Want Israhels ooghen waren verduystert van grooten ouderdom, ende hy en conste nyet claerlijck ghesien, Ende als die kinderen bi hem brocht waren, soe heeft hy die ghecust, ende omhelst,

11

ende gheseyt tot sijnen sone. Ick en ben nyet bedroghen gheweest van v te aenschouwen, ende daer toe heeft my Godt oeck v saet ghetoont.

12

Ende als Ioseph die kinderen van sijns vaders schoot ghenomen hadde, soe heeft hy aenbeden neder ter aerden,

13

⁺Ende hy stelde Ephraim aen sijn rechte hant, dat es aen Israhels slincker hant, maer Manassen stelde hy aen sijn slincke hant, te weten aen sijns vaders rechte hant, ende alsoe bracht hy die beyde aen hem,

+ C

14

Dye welcke heeft wtghereyct sijn rechtehant ende dye gheleydt op Ephraims hooft des ioncsten broeders ende sijn slincke hant op Manasses hooft dye dierste geboren was, veranderende sijn handen.

15

Ende Iacob heeft Iosephs kinderen ghebenedijt ende gheseyt. God voor wiens aenschijn mijn vaderen Abraham ende Isaac ghewandelt hebben, Godt die mi voedt van mijnder ioncheyt af, tot desen dach toe,

16

Die Enghel dye my verlost heeft van allen quade, wil dese kinderen ghebenedijden, ende laet mijnen naem aengeroepen worden ouer hen, ende oeck dye namen mijnder vaderen Abraham, ende Isaac, ende laetse wassen tot groote menichte op die eerde.

17

⁺Maer Ioseph (siende dat sijn vader sijn rechte hant gheleyt hadde op Ephraims hooft) heeft dat swaerlijck ghenomen, ende hi heeft sijns vaders hant ghenomen, willende dye opheffen van Ephraims hooft, ende die verlegghen op Manasses hooft,

+ D

18

Ende hy heeft tot sinen vader geseyt. Ten behoort alsoe niet vader, want dit es dierste gheboren sone, legget v rechte hant op sijn hooft,

19

Maer hy en wilde nyet doen segghende. Ick weet wel (mijne sone) ick weet wel, dese sal oeck voorwaer tot vele volcs wesen ende vermenichfuldicht worden, Maer sijn broeder die iongher es, sal meerder worden dan hy, ende sijn saet sal wassen tot veel natien.

20

Ende hy heeft die kinderen op dien tijt ghebenedijt segghende. Door v sal Israhel gebenedijt worden, ende men sal segghen, Godt wil v doen, also hy Ephraim ende Manasses ghedaen heeft, Ende hy heeft Ephraim voor Manasses ghestelt.

21

Ende hy heeft tot Ioseph sinen sone gheseyt. Siet ick sterue, ende Godt sal met v wesen, ende v weder leyden tot uwer vaderen lant.

22

Ic gheue v een deel buyten uwen broeders dat ick met mijnen swaerde ende boghe wt der Amorrhiters handen verworuen hebbe.