Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvij. Capittel.

1

⁺HIerom es Ioseph inghegaen ende heeft Pharao ghebootschapt segghende, Mijn vader ende mijn broeders, haer scapen ende haer groot vee, met alle dat sij besitten, sijn ghecomen wt den lande van Chanaan, ende siet sij sijn versaemt in dlant van Gessen.

+ A

2

Ende hy heeft vijf mans van die wterste sijnder broeders voer den coninck ghestelt,

3

die welcke hy gheuraecht heeft, Wat es v werck? Sij hebben gheantwoert, Wij uwe dienaers sijn schaepherders wij ende onse vaders,

4

wij sijn in v lant comen, om aldaer ghelijc vreemdelinghen te woonen, want daer en es gheen weydde voer uwer dienaers vee, in alle dat lant van Chanaan, om dat den dieren tijt daer so groot gheworden is, Ende wi bidden v dat ghy ghebieden wilt, dat wij v dienaers moghen woonen int lant van Gessen.

5

Aldus heeft die coninck tot Ioseph gheseyt, ⁺V vader ende v broeders sijn tot v comen, Dat lant van Egipten es voer v,

+ B

6

doetse woonen in die beste stede, ende gheeft hemlieden het lant van Gessen. Ende eest dat ghy weet datter verstandighe mans onder hemlieden sijn, maect die meesters van mijnen vee.

7

Daernae heeft Ioseph sijnen vader binnen brocht by den coninck, ende hi heeft hem voer den coninc ghestelt, ende hi benedijde hem,

8

ende hem worde gheuraecht van Pharao, Hoe veel sijn die daghen ws leuens?

9

Ende hy antwoerde, die daghen van mijns leuens pelgrimagie, sijn hondert ende dertich iaren, cleyn ende quaet, ende sij en sijn noch niet comen tot mijnder vaders daghen, in die welcke sij pelgrimagie ghedaen hebben.

10

Ende als hy den coninck ghebenedijt hadde, soe es hy wt gheghaen.

11

⁺Ende Ioseph heeft sijnen vader ende broeders ghegeuen tot een besittinghe in Egipten lant, die beste stede des lants Ramesses, ghelijc Pharao beuolen hadde.

+ C

12

Ende hy voedde hen, ende alle sijns vaders huysghesin, gheuende eenen yeghelijcken sijnen nootdurft.

13

Want in alle die werelt was broots ghebreck, ende den dieren tijt hadde dlant verdruct, maer aldermeest dlant van Egipten ende van Chanaan,

14

wt welcken lande hy vergadert heeft alle tghelt van dat vercoopen des corens, ende heuet al ghedraghen in des conincks scatcamer.

15

Ende doen den coopers ghelt ghebrack, soe sijn alle die van Egipten comen, tot Ioseph, seggende, Gheeft ons broot, waer om moeten wij steruen voer v, by ghebreke vanden ghelde.

16

⁺Totten welcken hy heeft gheantwoert, Brengt v vee hier, ende ic sal v lieden daer voer teten gheuen, eest sake dat ghi gheen ghelt en hebt.

+ D

17

Ende als sij die ghebrocht hadden, soe heeft hy hemlieden spijse ghegheuen voer peerden, ende scapen, ende ossen, ende eselen, ende hi heeftse dat iaer onderhouden, voer die manghelinghe van haren beesten.

18

Ende sij sijn weder comen ten tweeden iare, ende hebben hem gheseyt, Wij laten onsen heere weten, dat ons (nae het ghebrec van ghelde) nv oec vee ghebreect, ende ten es v niet onbekent, dat wi anders niet meer en hebben dan onse lichamen ende landen.

19

Waer om sullen wi dan steruen, daer ghy dat siet? ende wij ende ons lant sullen v toebehooren, coopt ons ten dienste vanden coninck, ende gheeft ons saetcoren, op dat (by ghebreke van ackerluyden) het lant niet heel woest en worde.

20

⁺Hierom heeft Ioseph allen dlant van Egypten ghecocht, want een yeghelijc vercocht sijn erue om den grooten hongher. Ende hi heeft dat lant Pharaos eyghendom ghemaect,

+ E

21

ende alle des lants volck vanden wtersten palen van Egipten, tot sijnen lesten eynden toe,

22

sonder der priesters lant, dat hen vanden coninck ghegeuen was, den welcken oec wt die ghemeyn schueren ghesette spijse ghegeuen worde, ende daer om en sijn sij niet bedwonghen gheweest haer eruen te vercoopen.

23

Daer om heeft Ioseph gheseyt tot dat volck, Siet (als ghy nv aenmerckt) Pharao besidt v luyden, ende v lant, neemt saetcoren, ende besaeyt die velden,

24

op dat ghy vruchten moecht hebben. Het vijfste deel suldi den coninck gheuen, ⁺die ander vier deelen laet ic v lieden tot saetcoren, ende om teten voer v huysghesin, ende v kinderen.

+ F

25

Die welcke hebben gheantwoert, Onse salicheyt es in v handen, alleen bidden wi dat ons heere op ons wil sien, ende wij sullen den coninck blijdelijc dienen.

26

Van dien tijt voerts tot desen dach toe, soe wort den coninghen in alle dat lant van Egypten het vijfste deel betaelt, ende dat es gheworden als een wet, sonder dat lant der priesteren, welck vrij was van deser insettinghen.

27

Aldus heeft Israhel ghewoont in Egypten, dat es int lant van Gessen, ende hy heeft dat beseten, ende hy es bouen maten seer vermeerdert ende vermenichfuldicht.

28

Ende hy heeft in dat lant gheleeft seuenthien iaren, ende alle die dagen sijns leuens, sijn gheworden hondert ende seuenenveertich iaren.

29

⁺Ende als hy sach dat hem sijnen sterfdach naecte, soe heeft hi sijnen sone Ioseph gheroepen, ende hem gheseyt, Eest dat ick gratie voer v vonden hebbe, so legt v hant onder mijn dgye, ende ghy sult my barmherticheyt ende waerheyt doen, dat ghy my niet en begraeft in Egipten,

+ G

30

maer laet my slapen by mijn vaders, ende voert my wt dit landt, ende begraeft my in die begrauenisse van mijnen ouders. Ende Ioseph heeft hem gheantwoerdt, Ick sal doen dat ghy my gheboden hebt.

31

Hier om seyde hy, Sweert my dat. Ende als hy swoer, soe aenbadt Israhel den Heere, keerende hem tot het hoofteynde vanden bedde.

[afbeelding]