Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .L. Capittel.

1

⁺ALs Ioseph dat sach, soe viel hy op sijns vaders aensicht weenende ende cussende hem,

+ A

2

Ende hy heeft sijnen dienaers den medecinen beuolen, dat sij sijnen vader met costelijcke specien saluen souden,

3

Ende als sij dit deden nae dat ghebodt, soe sijnder veertich daghen ouerghegaen, want dit was dye maniere der ghesalfder dooder lichamen, ende dye van Egypten beweenden hem tseuentich daghen.

4

Ende als dye daghen der beschreydinghen ouer waren, soe seyde Ioseph tot dat huysghesin van Pharao, Eest dat ick gratie voor v ooghen vonden hebbe, soe segghet in dye ooren van Pharao

5

om dat mijn vader my besworen heeft, segghende, Siet ick sterue, ghy sult my begrauen in mijn graf het welck ick voor my ghegrauen hebbe int lant van Chanaan, Daerom laet my optrecken ende mijnen vader begrauen, ende dan sal ick weder comen

6

Ende Pharao heeft tot hem gheseyt. Trect opwaerts ende begraeft uwen vader alsoe ghy besworen sijt.

7

⁺Ende als hy opwaerts reysde soe sijn alle die ouders van Pharaos huysghesin met hem ghegaen, ende alle die outste des lants van Egipten ende

+ B

8

Iosephs huysghesin met sijnen broeders sonder haer cleyn kinderen, ende cleyn vee, ende groot vee, die welcke sij int lant van Gessen ghelaten hebben.

9

Ende hy hadde oock in sijn gheselscap waghenen, ende volck te peerde, alsoe dat eenen grooten hoop volcks gheworden es,

10

Ende sij sijn ghecomen op den dorschvloer van Atad, welck gheleghen es ouer dye iordane, ende daer hebben sij seuen daghen lanck dye wtvaert ghehouden met een seer groot ende machtich gheschrey,

11

Dwelck als die inghesetenen des landts van Chanaan ghesien hadden, soe seyden sij. Dits een seer groote beschrydinge voer die Egyptenaren, Ende daer om es die plaetse ghenoemt dye beschreydinghe van Egypten.

12

Hierom hebben Iacobs kinderen ghedaen ghelijck hy hen beuolen hadde,

13

ende sij hebben hem ghedraghen int lant van Chanaan ende begrauen in dye dobbel speluncke, Welck Abraham metten acker ghecocht hadde tot een erfbegrauenisse, van Ephron den Hethiter, teghen ouer Mambre.

14

⁺Ende Ioseph es wederom in Egypten ghegaen met sijnen broeders, ende met alle den gheselscappe doen hy sijnen vader begrauen hadde,

+ C

15

Ende doen hen vader doot was, soe hebben Iosephs broeders ghevreest ende tot malcanderen gheseyt, Op dat hy by auontueren niet ghedachtich en sij des onrechte dat hy gheleden heeft, ende ons loone van alle tquaet dat wij hem ghedaen hebben,

16

dus hebben sij hem te kennen ghegheuen, segghende. V vader heeft ons beuolen eer hy storf,

17

dat wij v dit met sijnen woorden segghen souden. Ick bidde v dat ghy vergheten, wilt het groot misdaet uwer broederen, ende dye groote sonde ende archeyt dye sij v ghedaen hebben, ende wij bidden v oeck dat ghy Gods knecht, uwen vader dit onrecht vergheuen wilt. Als Ioseph dese woorde hoorde soe weende hy,

18

ende sijn broeders quamen tot by hem, ende aenbiddende ghebuycht ter aerden, hebben sij gheseyt, Wi sijn v dienaers.

19

Totten welcken hy antwoorde. En wilt niet vreesen, moghen wi Gods wille wederstaen?

20

⁺Ghy hebt ghedacht my quaet te doen, maer Godt heeft dat int goede verkeert, om dat hy my verheffen soude, alsoe ghy siet te deser tijt, ende om dat hy veel volcks behouden soude,

+ D

21

En wilt niet vreesen, ick sal v voeden, ende uwe cleyne kinderen, ende hy heeftse ghetroost, ende soetelijck ende sachtelijck aenghesproken.

22

Ende Ioseph heeft in Egypten ghewoont met alle sijns vaders huysghesin, ende gheleeft hondert ende thien iaren, Ende hy heeft Ephraims kinderen ghesien tot dye derde afcoemste, Ende dye kinderen van Machyr sone van Manasses, zijn gheboren op Ioseph schoot.

23

Ende als dese dinghen voerleden waren, soe heeft Ioseph gheseyt tot sijnen broeders. Nae mijn doot sal v Godt besoecken, ende v doen optrecken wt dit lant, nae dat landt, welck hy Abraham, Isaac, ende Iacob belooft heeft,

24

Ende doen hi hen besworen hadde ende gheseyt. God sal v lieden besoecken, ende draecht mijn ghebeente met v wech van hier,

25

soe es hi ghestoruen nae dat hi hondert ende thien iaren gheleeft hadde, Ende met costelijcke specien ghesalft, es hi gheleyt in een kiste int lant van Egypten.

Hier voleynt dat boeck welck Genesis wordt ghenoemt, het ierste boeck Moysi.