Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlv. Capittel.

1

⁺NIet langher en mocht hem Ioseph bedwinghen, daer veel luyden by hem stonden, waer om heeft hij beuolen, dat sij alle gader daer buyten gaen souden, ende datter niemant vreemders by wesen en soude, als sij malcanderen souden kennen.

+ A

2

Ende hy herft sijn stemme opghehauen ende gheweent, welc die Egiptenaers ende alle Pharaos huysghesin ghehoort hebben,

3

ende hy seyde tot sijnen broeders, Ick ben Ioseph, leeft mijn vader noch? Ende sijn broeders en conden hem gheen antwoerde gheuen, soe verscrict waren sij wt grooter vreesen?

4

⁺Tot den welcken hi heeft goedertierlijc gheseyt, Coemt hier by my. Ende als sij bi hem comen waren, Ic ben (seyt hy) Ioseph v broeder, den welcken ghi in Egipten vercocht hebt.

+ B

5

En wilt niet verscrict wesen, noch en laet v niet swaer duncken, dat ghy my vercocht hebt in dese landen, want Godt heeft my om v salicheyt, voer v hier ghesonden in Egipten.

6

Het es nv twee iaren voerleden, dat den dieren tijt begonst es opt lant, ende daer volghen noch vijf iaren, in die welcke men niet en sal connen ackeren noch mayen.

7

Ende Godt heeft my hier voer v ghesonden, om dat ghy soudt op aertrijck behouden worden, ende dat ghy soudt moghen v nootdurft hebben om te leuen.

8

⁺Ic en ben herwaerts niet ghesonden doer uwen raet maer doer Godts wille, die my ghemaect heeft, als die een vader van Pharao, ende een heere van alle sijnen huysghesin, ende een prince ouer alle dat lant van Egipten.

+ C

9

Daer om soe haest v ende reyst opwaerts na mijnen vader, ende segghet hem, Dit ontbiet v sone Ioseph, Godt heeft my ghemaect een heere ouer alle dat lant van Egipten, Coemt nederwaerts by my, en verbeyt niet, ende

10

ghy sult woonen int lant van Gessen, ende by my wesen, ghy ende v kinderen, ende uwer kinder kinderen, v schapen ende v groot vee, ende alle dat ghy besidt.

11

⁺Ende daer sal ick v voeden, (want daer comen noch vijf iaren vanden dieren tijt) op dat ghy oeck niet en verghaet, ende v huysghesin, ende alle dat ghy besidt.

+ D

12

Siet v ooghen ende die ooghen van mijnen broeder Beniamin sien, dat mijnen mont tot v lieden spreect.

13

Bootscapt mijnen vader alle mijn glorie, ende alle dat ghi in Egipten ghesien hebt. Haest v ende brengt hem by my.

14

Ende doen hy Beniamin sijnen broeder omhelsende geuallen was op sijnen hals, soe heeft hy gheweent, Ende desghelijcs heeft Beniamin oec gheweent op sijnen hals.

15

Ende Ioseph heeft alle sijn broeders ghecust, ende op eenen yeghelijcken gheweent, ende daer nae sijn sij verstout om met hem te spreken.

16

Ende het es ghehoort, ende met een feestelijcke sprake vermaert in des conincs hof. Iosephs

[p. *75]

broeders sijn comen, ende Pharao heeft blijde gheweest, ende alle sijn huysghesin.

17

Ende hy heeft tot Ioseph gheseyt, dat hy sijnen broeders soude ghebieden segghende, Ladet v beesten, en reyst nae dlant van Chanaan,

18

ende haelt van daer uwen vader ende v gheslachte, ende coemt tot my, ende ick sal v gheuen alle dat goet van Egipten, alsoe dat ghi sult moghen eten het merch vanden lande.

19

Ghebiedt hen oeck dat sij waghenen nemen wten lande van Egipten, om hen cleyn kinderen ende huysvrouwen ouer te voeren, ende segghet hen, ⁺Neemt uwen vader, ende coemt haestelijck herwaerts,

+ F

20

noch en laet niet achter van uwen huysraet, want alle die rijckdommen van Egipten sullen v toebehooren.

21

Ende die kinderen van Israhel hebben ghedaen alsoe hem beuolen was, den welcken heeft Ioseph waghenen ghegeuen nae Pharaos ghebodt, ende prouande onder weghen.

22

Ende hy dede voer een yeghelijcken halen twee eerlijcke cleederen, maer Beniamin gaf hy drijhondert silueren penninghen, met vijf vanden alderbeste cleederen, ende soe vele gelts ende cleederen sant hy sijnen vader oeck,

23

sendende daer toe noch thien ezelen, die welck ouervueren souden alderhande goet van Egipten, ende oec soe veel ezelinnen draghende tarwe ende brooden onderweghen.

24

Hierom heeft hy sijn broeders laten gaen, ende hen gheseyt doen sij wech trocken, ⁺En wilt onderweghen niet vergramt worden.

+ G

25

Ende sij wt Egipten opwaerts reysende, sijn comen int lant van Chanaan tot haren vader Iacob.

26

Ende hebben hem ghebootschapt segghende, Ioseph v sone leeft, ende hy heeft heerscappie ouer alle dat lant van Egipten. Als Iacob dit hoorde, soe was hem als oft hy wt eenen swaren droom ontspronghen hadde nochtans en gheloofde hy hemlieden niet,

27

maer sij vertelden hem daertseghen alle dat veruolch van deser saken. Ende als hy ghesien hadde die waghenen, ende alle dat Ioseph ghesonden hadde, soe es sijnen gheest wederom leuende gheworden,

28

ende hi seyde, Tes my ghenoech, eest dat Ioseph mijn sone noch leuet, Ick sal gaen ende hem sien eer ick sterue.