Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliiij. Capittel.

1

⁺MAer Ioseph heeft sijns huys hoofmeester gheboden segghende, Vult hen sacken met coren, alsoe vele als daer in mach gaen, ende legt het ghelt van eenen yeghelijcken, bouen in haer sacken.

+ A

2

Maer mijnen silueren cop, ende den prijs vanden coren, welck hy ghegheuen heeft, suldi legghen bouen inden sack vanden ioncsten, ende tes also ghedaen.

3

Ende als den dach opgheresen was, soe heeftmen hen laten ghaen met haren eselen.

4

Ende als sij nv wter stadt waren, ende een luttelken voerts gereyst, soe heeft Ioseph gheroepen sijnen hoofmeester ende gheseyt, Staet op ende veruolcht die mans, ende als ghy die achterhaelt hebt, soe segghet, ⁺Waerom hebdi goet met quaet gheloont?

+ B

5

Den cop die ghy ghestolen hebt, dat es den ghenen daer mijn heere wt drinckt, ende daer mede dat hy te propheteren plach, ghy hebt een seer quaet stuck ghedaen.

6

Ende hy heeft ghedaen alst hem beuolen was. Ende als hy die mans achterhaelt hadde, soe heeft hy hen dit al van woerde te woerde geseyt.

7

Die welck hebben gheantwoert, Waerom spreeckt onse heere aldus, dat sijn dienaers alsulcken quaet werc souden ghedaen hebben?

8

Het ghelt dat wi vonden bouen in onse sacken, dat hebben wi v wederghebrocht wt den lande van Chanaan, ende hoe soudet

[p. *74]

moghen warachtich sijn, dat wi souden siluer oft gout wt ws heeren huys gestolen hebben?

9

Aldus by den welcken van uwen dienaren beuonden wordt tghene dat ghy soect, laet dien dooden, ende wij sullen ons heeren slauen blijuen.

10

⁺Ende hy heeft tot hen gheseyt, Laet dit gheschieden nae v woert, bij den welcken dat dit vonden wort, die sal mijn dienaer wesen, maer ghylieden sult onsculdich wesen.

+ C

11

Aldus soe hebben sij haestelijck haer sacken afgheleyt ter eerden, ende een yeghelijck den sijnen open ghedaen.

12

Ende als hy die ondersocht hadde, beghinnende vanden outsten totten ioncsten, soe heeft hy den cop vonden in Beniamins sack.

13

Ende hebbende haer cleederen gheschoort, ende haer ezels weder geladen, sijn sij weder in die stadt gecomen

14

Ende Iudas es dierste met sijnen broeders binnen geghaen by Ioseph, want hi en was noch van dier plaetsen niet gegaen, ende sij sijn alle te samen, voer hem plat ter eerden neder gheuallen.

15

Tot den welcken hy seyde, ⁺Waerom hebdi aldus ghedaen? en weet ghi niet datter niemant mijns ghelijc en es in die conste van waersegghen?

+ D

16

Tot wien Iudas heeft gheseyt, Wat sullen wij mijnen heere antwoerden? oft wat sullen wi segghen? oft wat mogen wi nae recht voertbrenghen tot onser onscult? Godt heeft die onrechtuerdicheyt van uwen dienaers vonden, siet wij sijn alle gader slauen mijns heeren, wij ende oec die ghene by den welcken den cop gheuonden es.

17

Ende Ioseph antwoerde, Dat sij verre van my, dat ic alsoe soude doen, maer die den cop gestolen heeft, die sal mijn slaue wesen, maer gaet ghy vrij wech tot uwen vader.

18

Maer Iudas nadercomende, heeft cloeckelijc gheseyt, Ic bid v mijn heere laet doch uwen dienaer een woert in v ooren spreken, ⁺ende en wilt niet gram wesen op uwen dienaer, want ghy sijt doch naest Pharao

+ E

19

mijn heere. Ghy vraechde ierstmael uwen dienaers, Hebdi noch eenen vader oft eenighen broeder?

20

Ende wij hebben v mijnen heere gheantwoerdt, Wij hebben eenen vader die oudt es, ende een cleyn kint dat welc hem gheboren es in sijn ouderdom, wiens broeder van eender moeder gheboren is gestoruen, ende dese heeft sijn moeder alleene, ende ons vader heeft dat kint seer teederlijcken lief.

21

Ende ghy seyt tot uwen dienaers, Brengt dien by my, ende ic sal mijn ooghen op hem legghen.

22

Ende wi gauen mijnen heere te kennen, ⁺Dit kint en mach sijnen vader niet laten, want laet hi hem, soe sal hy steruen.

+ F

23

Ende ghy hebt tot uwen dienaers gheseyt, Ten sij dat v ioncste broeder met v come, so en suldi niet meer mijn aenschijn sien.

24

Hierom doen wij opghecomen waren tot uwen dienaer onsen vader, soe hebben wij hem gheseyt alle dat mijn heere ghesproken hadde.

25

Ende ons vader heeft gheseyt, Gaet wederomme ende coopt ons een weynich terwe.

26

Ende wij hebben tot hem gheseyt, Wij en moghen niet gaen, ten es dat ons ioncste broeder met ons af treckt, soe sullen wi tsamen reysen, anders soe en dorren wij voer des mans aensicht niet comen, als dese daer niet by en ware.

27

Ende hy heeft daer op gheantwoert, Ghi weet wel dat mijn huysvrouwe mi twee sonen ghebaert heeft.

28

Den eenen es wtghegaen, ende ghi hebt geseyt, Een beeste heeft hem verslonden, ende tot noch toe en es hy nerghens ghesien.

29

Eeest sake dat ghy desen oeck wech leyt, ende dat hem iet ouer wech miscoemt, ⁺soe suldi mijn grijs haer met druck ter hellen waerts leyden.

+ G

30

Hier omme eest dat ic by uwen dienaer, onsen vader come, ende dat het kint daer by niet es sij (aenghesien dat sijn ziele, aen die ziele van dit kint hanghet)

31

ende hy siende wordt dat het kint met ons niet en es, soe sal hy steruen, ende v dienaers sullen sijn grijs haer met drucke ter hellen waerts leyden.

32

Dus laet my v eyghen knecht wesen, die dit kint op mijn trouwe ontvanghen hebbe, ende daer voer ghesproken segghende, Eest sake dat ick hem niet weder en brenghe, soe sal ic der sonden teghen mijnen vader eewelijck sculdich wesen.

33

Daerom sal ic v dienaer voer dit kint in mijns heeren dienst blijuen, ende laet dat kint met sijnen broeders opwaerts reysen.

34

Want ick en mach tot mijnen vader niet wedercomen, alst kint daer niet by en ware, op dat ic daer niet by en stae als een ghetuyghen des iammers, welc mijnen vader oueruallen sal.