Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliij. Capittel.

1

⁺BInnen desen middelen tijt, soe heeft den hongher alle het lant seer verdruct.

+ A

2

Ende als alle den cost verteert was die sij wt Egipten bracht hadden, soe heeft Iacob gheseyt tot sijnen kinderen, Gaet wederom ende coopt ons een luttel etens

3

Ende Iudas heeft gheantwoert, Die man heeft ons

[p. *73]

beuolen met eenen eedt, segghende, Ghi en sult mijn aensicht niet sien, ten sij dat ghy uwen ioncsten broeder met v brenghet.

4

Daerom wildi hem met ons senden, soe sullen wi tsamen gaen, ende coopen dat ghy van doene hebt.

5

Maer en wildi dat niet doen, so en sullen wi niet gaen, Want (alsoe wi dicmael gheseyt hebben) die man heeft ons beuolen segghende, Ghi en sult mijn aenschijn niet sien, sonder uwen ioncsten broeder.

6

Ende Israhel heeft tot hemlieden gheseyt, ⁺Dit hebdi tot mijnder allendicheyt ghedaen, dat ghi hem te kennen ghaeft, dat ghy noch eenen broeder hadt.

+ B

7

Ende sij antwoorden, Die man vraechde ons van stuck te stuck alle ons gheslachte, oft ons vader noch leefde, oft wi noch eenen broeder hadden, ende wi hebben hem veruolghens gheantwoerdt nae dat hy gheuraecht hadde. Consten wi weten, dat hi segghen soude, Brenghet uwen broeder met v?

8

Ende Iudas heeft noch tot sijnen vader gheseyt, Seyndt dat kint met my, dat wi moghen reysen, ende dat wi moghen het leuen onderhouden, op dat wij niet en steruen met onsen cleynen kinderen.

9

Ick neem dit kint te mijwaerts, eysschet van mijnder hant, eest sake dat ict v niet weder en brenghe, soe sal ic der sonden schuldich sijn eewelijck.

10

Want en hadde dit niet wtghestelt gheweest, wi waren nv die tweede reyse van daer comen.

11

⁺Hierom heeft Israhel hen vader tot hen gheseyt, Moet emmer te male alsoe wesen, soe doet dat v belieft, Neemt vanden besten vruchten des lants in v vaten, ende draecht den man ghiften, een luttel hersts, ende honichs, wieroocs, ende mirre, ende thermentijns ende amandelen.

+ C

12

Ende draecht oeck dobbel ghelt met v lieden, ende tghelt dat ghy in die sacken vont, draecht weder derwaerts, dat by auontuere by dolinghe niet en sij ghedaen.

13

Ende uwen broeder neemt wech, ende reyst tot den man.

14

Ende mijn Godt almachtich make hem tot v versoenlijck, ende dat hy met v weder sende uwen broeder dien hy daer gheuanghen houdt, ende oec desen Beniamin, maer ick sal sonder kinderen wesen, als een die van sijnen kinderen berooft es.

15

⁺Hierom hebben die mans ghiften ghenomen, ende dobbel ghelt, ende Beniamin, ende sij sijn nederwaerts ghereyst in Egipten, ende hebben ghestaen voer Ioseph.

+ D

16

Ende als hy die ghesien hadde ende Beniamin tsamen, soe heeft hy sijnen hoofmeester gheboden segghende, Leyt die mannen in huys, ende slaet offeranden doot, ende bereyt eenen maeltijt, want sij sullen ten middaghe met my eten.

17

Ende hy heeft ghedaen alsoe hem beuolen was, ende die mans in huys gheleyt.

18

Ende daer veruaert sijnde, seyden sij tot malcanderen, Wi worden hier binnen gheleyt om tghelt dat wi in onse sacken wederbrocht hebben, om dat hi ons met bedecte valscheyt soude bestricken, ende dat hy ons, ende onse esels soude met ghewelt brenghen onder sijn bedwanc.

19

Daerom soe hebben sij int portael van den huyse den hoofmeester aenghegaen,

20

⁺ende gheseyt, Wi bidden v heere wilt ons hooren. Hier voer tijts hebben wi hier gheweest, om nootdurft te coopen,

+ E

21

ende als wij dat ghecocht hadden ende in die herberghe comen waren, soe deden wij onse sacken open ende vonden het ghelt int opperste vanden sacken, dwelck wij int selue ghewicht weder ghebrocht hebben.

22

Oeck soe hebben wij ander ghelt mede bracht om te coopen dat ons van noode es. Wi en weten niet wie dat ghelt weder in onse sacken heeft gheleyt.

23

Maer hy heeft gheantwoert, Vrede sij met v lieden, en wilt niet vreesen, V Godt ende ws vaders God heeft v dese scatten in v sacken ghegheuen, Want het ghelt dat ghy my ghegheuen hebt van weerden, dat heb ic. Ende hy heeft Simeon wten kercker by hen ghebrocht.

24

Ende als hy hen in huys gheleyt hadde, so bracht hi water, ende sij hebben hen voeten ghewasschen, ende hy heeft haren ezels voeder ghegheuen.

25

Maer sij bereyden haer ghiften teghen dat Ioseph ten middaghe thuys comen soude, ⁺want sij hadden ghehoort, dat sij daer broot eten souden.

+ F

26

Hierom es Ioseph in sijn huys comen, ende sij hebben hem die ghiften gheoffert, houdende die in haer handen, ende si aenbaden nedergheboocht ter aerden.

27

Ende als hy hen goedertierlijcken ghegroet hadde, so vraechde hi hen segghende, Es den ouden man v vader noch wel varende, daer ghy my af gheseyt hadt? Leeft hi noch?

28

Ende sij hebben gheantwoert, Onse vader v dienaer es noch ghesont, hy leeft noch. Ende nederbuyghende hebben sij hem aenbeden.

29

Ende Ioseph sijn ooghen opheffende, heeft ghesien sijnen broeder Beniamin wt sijnder moeder lichaem gheboren, ende heeft gheseyt, Es dit v ioncste broeder, daer ghy my af gheseyt hadt? Ende wederom seyde hy, God sij v ghenadich mijn sone.

30

⁺Ende hy haeste hem, want die binnenste sijnder herten waren beroert ouer sijnen broeder, ende die tranen borsten hem wt, ende in sijn slaepcamer gaende heeft hy gheweent.

+ G

31

Ende anderwerf (nae dat hy sijn aensicht ghewasschen hadde) wtcomende heeft hy hem seluen bedwonghen ende gheseyt, Legt broot.

32

Ende als dat voergheleyt was, Ioseph besonder, ende sijnen broeders besonder, ende den Egiptenaren die daer mede ter maeltijt waren oeck besondere (want tes den Egiptenaren ongheorlooft metten Hebreusschen te eten, ende sij houden sulcken maeltijt voer ontamelijc)

33

soe sijn si gheseten, in sijnder teghenwoerdicheyt die ierste gheboren, nae sijn ierste gheboerte, ende die ioncste nae sijn ouderdom. Ende sij verwonderden hem bouen maten seere

34

vanden deelen die sij van hem ontfanghen hadden, ende dat meeste deel quam voer Beniamin, alsoe dat hy vijf deelen meer hadde, ende sij hebben ghedroncken, ende sijn met hem verhuecht gheworden.