Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlij. Capittel.

1

⁺ENde Iacob hoorende datmen in Egypten voetsel vercocht, heeft tot sijnen sonen gheseyt, Waerom sijdi so onacsem?

+ A

2

Ic heb ghehoort datmen in Egipten coren vercoopt, Reyst nederwaerts, ende coopt dat ons van noode es, op dat wij moghen te leuen blijuen, ende dat wi van armoeden niet en vergaen.

3

Hieromme sijn Iosephs thien broeders nederwaerts ghereyst, om coren te coopen in Egipten,

4

maer Beniamin worde van Iacob thuys ghehouden, want hy gheseyt hadde tot sijnen broeders, Hem mocht onder weghen eenich ongheluck by auontueren ouercomen,

5

dus sijn sij comen int lant van Egipten, metten anderen die oec reysden om te coopen. Want den dieren tijt was oeck int lant van Chanaan.

6

Ende Ioseph was een prince int lant van Egipten, ende nae sijnen wille worde het graen den volcke vercocht.

⁺Als nv sijn broeders hem aenbeden hadden,

+ B

7

ende hy die ghekent heeft, soe sprack hy straffelijc hemlieden aen, als tot uremdelinghen, ende hy vraechde van hemlieden, Van waer sijdi comen? Ende sij hebben gheantwoert, Wij comen wt den lande van Chanaan, om ons leuens nootdurft te coopen.

8

Ende nochtans al kende hy sijn broeders, hi en es van henlieden niet ghekent.

9

Ende gedachtich wesende der droomen die hy somtijts ghesien hadde, soe heeft hy tot hemlieden gheseyt, Ghy sijt bespieders, ende ghy sijt ghecomen om het crancste vanden lande te besien.

10

Ende sij hebben gheseyt, Ten es alsoe niet mijn heere, maer v dienaers sijn comen om spijsen te coopen.

11

Wij sijn alle gader eens mans kinderen, ende wij sijn vreetsamelijck ghecomen, ende v dienaers en hebben gheen quaet op handen.

12

⁺Den welcken hy heeft gheantwoert, Het es anders, ghy sijt comen om te bemercken die onstercke plaetsen des lants.

+ C

13

Maer sij hebben gheseyt, Wij v dienaers sijn twaelf ghebroeders, eens mans kinderen, int lant van Chanaan, die alder ioncste es by onsen vader, ende dander en leeft niet.

14

Het es (seyt hy) dat ick gheseyt hebbe, Ghy sijt bespieders,

15

Daerom ick sal nv van v lieden een ondersueck doen, by die salicheyt van Pharao, ghy en sult hier niet wtghaen, tot dat v ioncste broeder hier come.

16

Sendt eenen van v allen die hem hier brenghe, maer ghi sult int gheuanckenisse wesen tot dat bewesen worde oft warachtich oft valsch es, dat ghy gheseyt hebt. Oft anders (by der salicheyt van Pharao) soe sijdi bespieders.

17

Hierom soe heeft hy hemlieden der gheuanckenissen gheleuert drij daghen,

18

maer op den derden dach dede hi die wt den kercker brenghen ende heeft gheseyt, ⁺Doet dat ick gheseyt hebbe, soe suldi te leuen blijuen, want ic vreese Godt.

+ D

19

Eest dat ghy vreedtsamich sijt, soe laet een van uwen broeders inden kercker ghebonden blijuen, ende trect ghilieden wech, ende voert dat coren, welc ghy ghecocht hebt in v huysen,

20

ende brengt uwen ioncsten broeder tot my met v, op dat ick v woerden mach beproeuen, ende dat ghy niet en sterft.

Sij hebben ghedaen alsoe hi gheseyt hadde,

21

ende tot malcanderen gheseyt, Met rechte lijden wij dit, want wi teghen onsen broeder misdaen hebben, siende die bedructheyt sijnder zielen, als hi ons seere badt ende wi en verhoerden hem niet, daerom es dese tribulatie op ons comen.

22

Maer een van hemlieden Ruben ghenaemt, heeft gheseyt, En heb ict niet gheseyt? En wilt teghen het kint niet misdoen, ende ghy en hebt my niet ghehoort, siet nv wordt sijn bloet versocht.

23

⁺Maer sij en wisten niet dat Ioseph dit verstont, aen ghesien dat hy hemlieden doer eenen bedieder toesprac.

+ E

24

Ende hy keerde hem een weynich omme, ende heeft gheweent, ende wederom keerende heeft hy hen toeghesproken.

25

Ende opnemende Simeon en bindende in haer teghewoordicheyt, beual hij sijnen dienaers dat sij hemlieden sacken met tarwen vullen souden, ende dat sij elcs ghelt in sijn sacken legghen souden, ende gheuen hen daer toe prouande in den wech, die welcke hebben alsoe ghedaen.

26

Ende sij sijn wech ghereyst voerende coren op hen ezels.

27

Ende als daer een sijnen sack openghedaen hadde, om sijnen ezel voeder te gheuen in die herberghe, soe heeft hy dat ghelt ghesien int opperste van den sack,

28

ende heeft gheseyt tot sijnen broeders, Mijn ghelt es my wederghegheuen, siet het es inden sack. Ende sij alle te samen verwondert ende onstelt wesende, hebben tot malcanderen gheseyt, ⁺Wat es dit dwelc ons Godt ghedaen heeft?

+ F

29

Aldus sijn sij voerts comen bij Iacob haren vader int lant van Chanaan, ende sij vertelden hem alle dat hemlieden gheschiet was, segghende,

30

Die heere des lants heeft ons hert aenghesproken, ende hy meynde dat wi bespieders des lants waren.

31

Den welcken wi antwoorden, Wij sijn vreedtsamich, ende wij en hebben gheen listen op handen.

32

Wi sijn twaelf broeders al van eenen vader ghewonnen, die eene en leeft niet, ende die ioncste es by onsen vader int lant van Chanaan.

33

Ende hy seyde tot ons, Aldus sal ic beuinden dat ghy vreedtsamich sijt. Laet een van uwen broeders by mi, ende neemt nootdurft voer v huysghesinnen, ende gaet wech,

34

ende brengt uwen ioncsten broeder bi my, dat ic weten mach, dat ghy gheen bespieders en sijt, ende dat ghy dan desen moecht weder hebben, die hier gheuanghen blijft, ende voertaen moecht orlof hebben te coopen van als dat v belieuen sal.

35

⁺Ende als sij dese dinghen gheseyt hadden, ende sij hen coren wt storten souden, soe heeft een yeghelijck van hem lieden sijn gelt vonden ghebonden int opperste vanden sacken, ende als sij al te samen verscrict waren,

+ G

36

soe seyde hen vader Iacob, Ghij hebt ghedaen dat ic van mijnen kinderen berooft ben, Ioseph en leeft niet, Symeon es gheuanghen, ende Beniamin suldi wech leyden, alle dit quaet es op mij gheuallen.

37

Ende Ruben heeft hem gheantwoert, Doodet beijde mijn sonen eest dat ic v desen niet weder en brenghe, leuert hem in mijn handen, ende ic sal hem v weder leueren.

38

Ende hij seyde, Mijn sone en sal met v niet nederwaerts reysen, sijn broeder es doot, ende hij es alleen bleuen, waert sake dat hem eenich ongheluck toe quaeme int lant daer ghij henen reyst, so soudi mijn grys haer met rouwe ter hellen waerts leyden