Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xl. Capittel.

1

⁺ALs dese dinghen dan ghebuert waren, soe eest gheschiet datter twee ghesneden dienaers teghen haren heere misdeden, te weten des conincs van Egypten schencker, ende die backer.

+ A

2

Ende Pharao op hen gram sijnde (want die eene was douerste vanden schenckers, ende dander vanden backers)

3

heeftse beyde doen steken inden kercker van den ritmeester, daer Ioseph oec in gheuanghen was,

4

Maer die kerckermeester heeftse Ioseph in sijn hant gheleuert, die welcke hemlieden oec ghedient heeft, ende alst nv eenen cleynen tijt voerleden was, soe sijn dese int gheuanghenisse bleuen.

5

Ende sij hebben beyde ghedroomt op eenen nacht nae die beduydenisse die hem diende.

6

Ende als Ioseph des morghens by hemlieden comen was, ende sach dat sij droeuich waren,

7

soe heeft hy hen gheuraecht, segghende, Waerom es v aensicht heden droeuer dant pleech?

8

Die welcke hebben gheantwoerdt, Wij hebben eenen droom ghesien, ende daer en niemant die ons desen mocht beduyden. ⁺Ende Ioseph heeft tot hemlieden gheseyt, En behoort die beduydenisse Gode niet toe? segt my wat ghy ghesien hebt.

+ B

9

Ende die ouerste der scenckers heeft ierstmael sijnen droom vertelt. Ick sach voer my eenen wijnstruyck

10

(daer drij rancken aen waren) allencxkens wassen, ende botten crijghen, ende nae die bloemen druyuen rijpen,

11

ende Pharaos cop in mijn hant, Dus nam ic die druyuen ende doude die wt inden cop, den welcken ic hiel, ende ick gaf Pharao den cop.

12

Ende Ioseph antwoerde, Dit es die beduydenisse vanden droom, Die drij rancken, sijn noch drij daghen,

13

nae die welcke sal Pharao ws dienst gedachtich wesen, ende hi sal v weder stellen in uwen iersten staet, ⁺ende ghi sult hem weder den cop gheuen, nae uwer officien, ghelijck ghy te voren pleecht te doene.

+ C

14

Alleene wilt mijnder ghedachtich wesen, alst v wel gaet, ende ghy sult bermherticheyt met my doen, dat ghy Pharao vermaent, dat hi my wt desen kercker verlosse,

15

want ic ben dieflijck wech gheuoert wt den Hebreusschen lande, ende hier sonder mijn scult in desen put gesteken.

16

Die meester der backers (siende dat hy wijselijck dien droom verclaert hadde) heeft gheseyt, Ende ic heb eenen droom ghesien, dat ick drij coruen meels hadde op mijn hooft,

17

ende dat ic in den eenen corf (welc den alder oppersten was) droech alderhande spijsen, welc men maken mach nae der backers conste, ende dat die voghelen daer wt aten.

18

⁺Ende Ioseph heeft gheantwoert, Dit es die beduydenisse des drooms, Die drij coruen, dat sijn noch drij daghen,

+ D

19

nae die welcke sal Pharao v hooft afnemen, ende hi sal v hanghen aen tcruys, ende die voghelen sullen v vleesch verschoeren.

20

Ende daer nae opden derden dach, soe waert den dach van Pharaos gheboerte, die welcke doen gaf eenen grooten maeltijt sijnen dienaers, ende ouer maeltijt, soe worde hy denckende op den meester vanden scenckers, ende op den ouersten vanden backers,

21

Ende hy heeft den eenen wederghestelt in sijn plaetse, dat hy hem soude te drencken gheuen,

22

Ende den anderen hinc hy aen een galghe, om dat die waerheyt des beduyders soude ghetoont worden.

23

Nochtans die ouerste der scenckers (alst wel met hem ghinck) heeft sijnen beduyder vergheten.

[afbeelding]