Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺MAer Ioseph die is gheleydt in Egyptenlant, ende Putiphar een ghesneden Pharaons, een prince van sijnen heyre, een Egiptsch man heeft hem ghecocht wt der Ismaheliters handen, vanden welcken hy daer ghebrocht was.

+ A

2

Ende die Heere was met hem, ende hy was een gheluckich mensch in alles dat hy dede, ende hy woonde in sijns heeren huys,

3

die wel wiste dat die Heere met hem was, ende dat al van den Heere gheuordert worde in sijn handen, wat hi hanteerde.

4

Ende Ioseph heeft gratie vonden voer sijnen heere, ende hy diende hem, ende es van hem ouer al ghestelt, ende alsoe regeerde hy dat huys welck hem beuolen was, ende alle dat hem ouerghegheuen was,

5

ende die Heere heeft des Egiptenaers huys gebenedijt om Iosephs wille, ende hy heeft vermenichfuldicht, ⁺soe wel in huysen als in landen, alle sijn goet,

+ B

6

ende hy en nam gheen kennisse anders dan van tbroot dat hy adt. Ende Ioseph was schoon van aensicht, ende fraey van aensien.

7

Ende nae veel daghen, soe heeft sijn vrouwe haer ooghen op Ioseph gheslaghen, ende heeft gheseyt, Slaept by my,

8

Maer hi gheensins willende hooren nae dat onbehoorlijck werck, heeft tot haer gheseyt Siet, mijn heere en weet niet wat hy in sijn huys heeft, want hy heuet my al ouerghegheuen,

9

ende daer en es niet, ten es al in mijnder macht, oft ten es my al van hem ouerghegheuen, wtghenomen ghy alleen, die sijn huysvrouwe sijt, Hoe soude ic dan moghen dit quaet bedrijuen, ende sondighen teghen mijnen heere?

10

Sulcke woorden heeft sij alle daghe ghesproken, ende die vrouwe was den ionghelinc seer lastich, maer hy ontseyde die oneerlickheyt.

11

⁺Ende het es gheboert op eenen dach dat Ioseph in huys quam, ende eenderhande werck dede, sonder yemants by sijn,

+ C

12

ende sij grijpende die slippe van sijnen cleede, seyde, Slaept by my, Ende hy heeft den mantel in haer handen ghelaten, ende es gheuloden ende wtgheloopen.

13

Ende als dat wijf sach denmantel

[p. *70]

in haer handen, ende dat sij versmaet was,

14

soe heeft sij bi haer gheroepen die luyden van haren huyse, ende gheseyt tot hemlieden, Siet, hy heeft ons desen Hebreeusschen man hier inne ghebracht, dat hy ons beschamen soude, Hy is binnen by my ghecomen, om hem met my te versamen, ende doen ic riep,

15

ende hy mijn stemme hoorde, soe liet hy achter den mantel die hy hadde, ende liep wech daer buyten.

16

Hier omme tot een seker bescheedt der waerheyt heeft sij den mantel behouden, ende dien haren man ghetoont als hy weder thuys quam,

17

ende sij seyde, ⁺Desen Hebreusschen knecht, den welcken ghy hier brocht hebt, es binnen by my ghecomen om mi te beschamen,

+ D

18

ende als hy my hoorde roepen, soe liet hy sijnen mantel achter, dien ic hiel, ende vloodt buyten wech.

19

Als die heere dese dinghen gehoort hadde, ende te seer gheloofde sijns wijfs woorden, soe es hi seer ghestoort gheweest.

20

Ende hy heeft Ioseph ouerghegeuen inden kercker, daer des conincks gheuanghenen bewaert worden, ende daer was hy ghesloten,

21

Maer die Heere was met Ioseph, ende hy heeft bermherticheyt met hem ghedaen, ende hem gratie verleent, in die ooghen vanden ouersten des kerckers,

22

Die welcke heeft hem in sijn handen gheleuert alle die gheuanghenen die daer int gheuanghenisse waren, ende wat daer gheschiede, dat was onder Ioseph.

23

Ende die ouerste des kerckers en nam gheen kennisse erghers af, want hy hadt hem al beuolen, ende die Heere was met hem, ende alle sijn wercken bestierden hy.