Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺OPden seluen tijt es Iudas afghereyst van sijnen broeders, ende es ghekeert tot eenen man van Odollam, Hyram genaemt,

+ A

2

ende aldaer sach hy een Cananeus menschen dochter ghenaemt Sua, ende als hy die hadde tot eender huysvrouwen ghenomen, soe heeft hy hem met haer versaemt.

3

Die welcke heeft ontfanghen ende ghebaert eenen sone, den welcken si noemde Her.

4

Ende doen si wederomme ontfanghen hadde, heeft sij dien sone als hy gheboren was ghenaemt Onan.

5

Ende sij heeft noch den derden sone ghebaert, den welcken si ghenoemt heeft Sela, ende doen dien gheboren was, soe en baerde sij voerts niet meer.

6

Maer Iudas heeft sijnen ierste gheboren sone Her

[p. *69]

een huysvrouwe ghegheuen Thamar ghenaemt.

7

⁺Ende Her Iudas ierste gheboren sone was arch voer den Heere, ende hy es van hem ghedoodt.

+ B

8

Daerom heeft Iudas gheseyt tot Onan sijnen sone, Gaet versaemt v met ws broeders huysvrouwe, op dat ghy uwen broeder moecht saet verwecken.

9

Maer hy wel wetende dat die kinderen hem niet en souden gheboren worden, versamende hem met sijn broeders huysvrouwe storte hy tsaet op daerde, om datter gheen kinderen en souden af gheboren worden in sijns broeders naem.

10

Ende daerom heeft hem God gheslagen, want hy een afgrijselijck dinck dede.

11

Daerom soe heeft Iudas geseyt tot Thamar sijn behoude dochter, Blyft weduwe in ws vaders huys, tot dat Sela mijn sone groot ghewassen sij, want hy sorgde dat hy oec steruen soude ghelijck sijn broeders. Ende sij es wech ghegaen, ende heeft ghewoont in haers vaders huys.

12

Ende alst veel daghen voerleden was, soe es Sua Iudas huysvrouwe ghestoruen, ende als hy nae den rouwe ghetroost was, ⁺soe es hy opwaerts ghereyst tot sijnder scapen scherders, hi ende Hyras sijn schaepherder van Odollam, sijn gheghaen tot Thamnas.

+ C

13

Ende het es Thamar gheseyt, hoe dat haer sweer opwaerts reysde tot Thamnas om sijn schapen te scheren.

14

Ende doen sy afgheleyt hadde die cleederen van haren weduwelicken staet, soe heeft sij eenen wimpeldoeck aenghedaen, ende aldus verandert hebbende haer cleederen, heeft sij gheseten int scheyden van twee weghen, aldaer men ghaet nae Thamnas, om dat Sela ghewassen was, ende dat sij dien niet en hadde ontfaen tot eenen man.

15

Ende als Iudas haer sach, soe meynde hy dat een ghemeyn vrouwe gheweest hadde, ⁺want sij hadde haer aensicht bedeckt datmen haer niet kennen en soude.

+ D

16

Ende hy tot haer incomende heeft gheseyt, Laet my met v versamen, maer hy en wist niet dat sijn behoude dochter was. Ende doen sij antwoerde, wat wildi my gheuen dat ghy mijns versamens moecht ghebruycken?

17

soe heeft hy gheseyt, Ick sal v wten cudden een bocxken senden. Ende doen sij seyde, Ick sal ghedooghen dat ghy wilt, eest dat ghy my eenen pant gheuet, tot dat ghy my sendt, dat ghi beloeft.

18

Soe heeft Iudas gheseyt, Wat wildi v voer eenen pant ghegheuen hebben? Sij antwoerde, uwen vingher rinck, ende uwen arm rinck, ende uwen stock die ghy in v hant hebt. Dus heeft die vrouwe met een versamen, ontfanghen,

19

ende sij es opghestaen, ende wech gheghaen, ende als sij afgheleyt hadde het habijt dwelck sij aen ghedaen hadde, soe heeft sij haer weder met wedulijcke cleederen ghecleedt.

20

Ende Iudas heeft een bocxken ghesonden met sijnen schaepherder den Odollamiter, dat hy weder halen soude den pant die hy der vrouwen ghegheuen hadde, ende als hy haer niet en vant,

21

⁺soe heeft hi die luyden van dier plaetsen gheuraecht, Waer es die vrouwe die hier gheseten heeft opden tweescheydeghen wech? Ende doen sij alle seyden, Hier en heeft gheen ghemeyn vrouwe gheweest,

+ E

22

soe es hy weder ghekeert tot Iudas ende heeft gheseyt, Ic en hebse niet vonden, ende oeck soe seyden my die luyden van dier plaetsen, dat daer noyt ghemeyn vrouwe gheseten en heeft.

23

Ende Iudas seyde, Laetse dat houden voer haer, sij en sal ons emmer niet connen van loghenen straffen, Ick heb een ionck bocxken ghesonden, dwelck ic beloeft hadde, ende ghy en hebtse niet gheuonden.

24

⁺Maer siet nae drij maenden, so werde Iudas ghebootschapt vanden sommighen die seyden, Thamar v behoude dochter heeft oncuyscheyt bedreuen, ende men siet dat haren buyck groot wordt. Ende Iudas heeft gheseyt, Brengtse voerts, dat sij mach verbrant worden.

+ F

25

Ende als sij ter pijnen gheleyt worde, soe sandt sij tot haren sweer, segghende, Ick heb ontfanghen vanden man die dese dinghen toebehooren, Besiet wien dat desen vingher rinck, ende armrinck, ende desen stock toebehooren.

26

Ende als hi die ghiften kende, soe seyde hy, Sij es rechtuerdigher dan ick, want ick en heb haer Sela mijnen sone niet ghegheven. ⁺Maer nochtans en heeft hy haer niet meer bekent.

+ G

27

Ende als den tijt van baren naecte, soe sijnder tweelinghen in haer lichaem gheuonden. Ende in dat voertcomen der kinderen, soe stack die een sijn hant voerts, ende daer bant die vroede vrouwe eenen purpuren draet aen, segghende,

28

Dese sal voer wt comen,

29

ende doen die sijn hant wederom track, soe es dander wtcomen, ende die vrouwe heeft gheseyt, Waer om, es om uwen wille die liese gheschoert? Ende om dese sake soe noemde sij hem Phares.

30

Ende daernae es sijn broeder wtcomen, aen wiens hant was den purpuren draet, den welcken sij noemde Zara.