Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvij. Capittel.

1

⁺MAer Iacob woonde int lant van Chanaan, daer sijn vader een vreemdelinck gheweest hadde,

+ A

2

ende dit sijn, sijn geslachten, Ioseph doen hy sesthien iaren out was, voedde sijns vaders cudde met sijnen broeders, doen hy noch een kint was, ende hy was by die kinderen van Bala, ende Zelpha sijns vaders huysvrouwen, ende hy beschuldichde sijn broeders by sijnen vader van een die alder quaetste sonde.

3

Ende Israhel hadde Ioseph lief bouen alle sijn kinderen, om dat hy hem in sijn oude daghen ghewonnen hadde, ende hi heeft hem eenen rock ghemaeckt van verscheyden verwen.

[p. *68]

4

Maer sijn broeders siende dat hi van haren vader bouen allen sijn sonen bemint was, hebben hem ghehaet ende sij en consten hem niet vredelijck toeghespreken.

5

Ende het es ghebuert dat hy sijnen broeders vertelde eenen droom die hy ghesien hadde, ⁺welck was een oyrsake dat sij noch meerder haet tegen hem creghen.

+ B

6

Ende Ioseph seyde tot hen, Hoort mijnen droom die ick ghesien hebbe,

7

Mij dochte dat wi opt velt schoouen bonden, ende als oft mijnen schoof hem oprechte ende stonde, ende dat vlieder schoouen daer rontsomme staende mijnen schoof aenbaden.

8

Ende sijn broeders hebben hem gheantwoerdt, Sult ghy dan ons coninck wesen? oft sullen wi onder v macht comen? Daer om heeft dese sake van desen droomen ende woorden een voetsel gheweest van nijdicheyt, ende van hate.

9

Noch heeft hi eenen anderen droom ghesien, den welcken hy sijnen broeders oeck heeft vertelt, ende gheseyt, Ick heb doer eenen droom ghesien, als oft die sonne ende mane ende elf sterren my aenbaden,

10

⁺dwelck als hy sijnen vader ende sijnen broeders vertelt hadde, soe heeft hem sijn vader ghestraft ende gheseyt, Wat beteekent desen droom die ghi gedroomt hebt? Wat meyndi, sullen ick ende v moeder, ende v broeders v aenbidden op aertrijck?

+ C

11

Daerom benijden hem sijn broeders, maer sijn vader bemercte dese sake al swijghende.

12

Ende als sijn broeders om haers vaders cudden te weyden woonden te Sichem,

13

soe seyde Israhel tot hem, V broeders voeden die schapen te Sichem, coemt ick sal v tot hemlieden senden. Ende als hi antwoerde,

14

ic ben hier, soe seyde hy tot hem, Gaet henen, ende besiet oft met uwen broeders, ende met dat vee al wel gaet, ende brengt my die bootschap wederom, hoet daer ghaet. ⁺Als hi dus ghesonden was wt die dellinghe van Hebron, soe es hy ghecomen tot Sichem,

+ D

15

ende een man heeft hem vonden dolende opt velt, ende hem ghevraecht, wat hi sochte.

16

Ende hy antwoerde, Ic soeck mijn broeders, segt mi doch waer sij die schapen voeden.

17

Ende die man heeft tot hem gheseyt, Sij sijn van hier ghegaen, want ic heb hen hooren segghen, Laet ons ghaen te Dothaim. Aldus es Ioseph ghegaen nae sijn broeders, ende hy vantse te Dothaim.

[afbeelding]

18

Ende als sij hem van verre ghesien hadden, eer dat hy by hemlieden quam, soe peysden sij, dat sij hem dooden souden.

19

Ende sij spraken tot malcanderen, Siet den droomer coemt daer,

20

coemt laet ons hem dootslaen, ende worpen hem in eenen ouden put, ende wij sullen seggen, Een alder quaetste wilt dier, heeft hem verslonden, ende dan salmen sien wat hem sijn droomen baten.

21

⁺Doen Ruben dit hoorde, soe arbeyde hy om hem te verlossen wt haren handen,

+ E

22

ende hi seyde, En doot sijn ziele niet, noch en stort gheen bloet, maer worpt hem in desen put, die in die woestine es, ende houdt v handen onschuldich, maer dit seyde hy om dat hy hem wilde verlossen wt haren handen, ende hem sijnen vader wederom leueren.

23

Hier om alsoe haest als hy by sijn broeders comen was, soe hebben sij hem ghebloot van sijnen rock totten voeten comende, ende van verscheyden verwen,

24

ende sij wierpen hem in dien ouden put, daer gheen water in en was.

25

⁺Ende sittende om broot te eten, hebben sij die Ismahelijters ouer dlant reysende, sien comen van Galaad met haren kemels, draghende specerije, herst, ende myrre nae Egipten.

+ F

26

Hier omme heeft Iudas gheseyt tot sijnen broeders, Wat salt ons baten, eest dat wij onsen broeder dooden, ende dat wij sijn bloet verborghen?

27

Tes beter datmen hem den Ismaheliten vercoope, ende dat ons handen niet besmet en worden, want het es doch ons broeder ende ons vleesch. Ende sijn broeders waren te vreden met sijnen woerden.

28

Ende doen die coopluyden van Madian, daer voerby quamen, hem wten put treckende, hebben sij hem den Ismaheliten vercocht om twintich silueren penninghen, die welcke hem hebben in Egipten gheleyt.

29

Ende Ruben wederghehaen sijnde totten put, en vant dat kint niet,

30

ende met gheschoerde cleederen gaende tot sijn broeders, heeft gheseyt, ⁺Dat kint en sietmen nerghers, ende waer sal ick henen ghaen?

+ G

31

Maer sij hebben sijnen rock ghenomen, ende hebben dien ghesteken int bloet van eenen ionghen bocxken, dat sij ghedoot hadden,

32

sendende die ghene die dat tot haren vader draghen souden, ende segghen, Desen rock hebben wij vonden, besiet oft ws soens rock es, oft niet.

33

Ende als die vader dien kende, soe seyde hy, Het is mijns soons rock, een alder quaetste wilt dier heeft hem verbeten, een beeste heeft Ioseph verslonden.

34

Ende sijn cleederen schoerende, heeft hy een harich cleedt aenghedaen, beschreyende sijnen sone menighen tijt.

35

Ende als alle sijn kinderen verghadert waren om haers vaders rouwe te versueten, soe en wilde hy gheenen troost ontfanghen, maer hy seyde, Ick sal nederdalen by mijnen sone al weenende ter hellen`waert. Ende die wijle dat hy in sijnen rouwe bleef,

36

soe hebben die Madianiters Ioseph in Egypten vercocht Putiphar, die een gesneden man was, ende een ritmeester van Pharao.