Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺MAer Dina die dochter van Lia es wtghegaen om te sien die vrouwen van dien lande.

+ A

2

Ende als Sichem die sone van Hemor des Euiters, een prince van dien lande, haer ghesien hadde, soe heeft hy daer liefde toe ghecreghen, ende heeftse met cracht ghenomen ende beslapen, vercrachtende die maghet,

3

Ende sijn ziele es met haer aenghecleeft, ende met smeekende woerden heeft hy die bedroefde versmeeckt.

4

Ende hy es gheghaen tot Hemor sijnen vader, segghende, Neemt my dese ionghe dochter tot eender huysvrouwen.

5

Ende als Iacob dit gehoort hadde, die wijle dat sijn kinderen van daer waren, ende becommert met dat vee te weydden, soe heeft hy ghesweghen tot dat sij weder quamen.

6

Ende als Hemor die vader van Sichem wt comen was, om te spreken met Iacob,

7

siet, so quamen sijn sonen vanden velde, ende als sij ghehoort hadden datter ghebuert was, soe sijn sij seer gram gheweest, om dat hy een leelijck dinck bedreuen hadde teghen Israhel, ende dat hi vercrachtende die dochter van Iacob, een onbehoorlijck dinck ghedaen hadde.

8

Hierom heeft Hemor tot henlieden gheseyt, Sichem mijns soons ziele die is vast aenghecleeft aen v dochter, gheeft hem die tot eender huysvrouwen,

9

Ende laet ons van beyden sijden houwelijcken maken, gheeft ons v dochteren, ⁺ende neemt onse dochteren,

+ B

10

Ende woont met ons, Het lant es in uwer macht, bouwet dlant, doet comenschap, ende besidt dat.

11

Ende Sichem die seyde oec tot haren vader ende broeders, Laet my gratie voer v vinden, ende ick sal gheuen wat dat ghy eysschen sult,

12

vermeerdert die houwelijcke gaue, eysschet ghiften, ende ick sal gheerne gheuen wat dat ghylieden begheeren sult, alleen gheeft my dese ionghe

[p. *66]

dochter tot eender huysvrouwen.

13

Ende die kinderen van Iacob hebben gheantwort met bedroch tot Zichem ende sijnen vader wreet sijnde, om dat vercrachten van haer lieder suster.

14

Wij en moghen niet doen dat ghij begeert noch onse suster geuen eenen man die ombesneden es, dwelc bij ons verboden, ende een ombehoerlic dinc es,

15

Maer daer doer moghen wij ons met v verbinden, eest sake dat ghij wilt worden gelijck wij sijn, ende dat onder v lieden alle dat manlijck es besneden worde,

16

⁺Dan sullen wij onderlinghe gheuen ende nemen uwe ende onse dochteren, ende wij sullen met v lieden woonen, ende een volck worden,

+ C

17

Maer eest sake dat ghij v niet en wilt laten besnijden, soe sullen wij onse dochter wech nemen ende gaen van hier.

18

Desen eysch behaechde Emor ende Sychem sijnen sone wel,

19

Ende die ionghelinc en verbeyde niet maer hij heeft ter stont volbracht datter begheert was want hij was seer verlieft op die ionghe dochter, ende hij was die heerlijcste in alle sijns vaders huys.

20

Ende sij sijn gheghaen in die poerte vander stadt, ende hebben totten volcke gheseyt,

21

Dese mannen sijn vredelijck, ende begheren bij ons te woonen, Laetse comenscappen opt lant het lant bouwen, want tes groot ende wijt, ende theeft werckluijden ghebreck, haer dochters sullen wij tot huijsvrouwen nemen, ende die onse sullen wij hemlieden oec gheuen.

22

Maer daer es een dinck waer doer dat soe groot goet wtgestelt wort, Eest sake dat wij willen besnijden alle dat onder ons manlijck es, volghende die costume van desen volck,

23

soe sal haer goet, ende haer vee ende alle dat sij besitten onse wesen, alleen laet ons hem belieuen in dit stuck, soe sullen wij tsamen woonen, ende maken een volc,

24

Ende sij hebben alle te samen daer mede te vreden gheweest ende hebben allen dat manlijck was besneden.

25

⁺Ende (siet) opden derden dach als die pijne der wonden ten swaersten es, soe hebben Symeon ende Leui die broeders van Dina, sweerden ghenomen, ende sijn stoutelijck in die stadt ghegaen, ende hebben verslaghen alle dat manlijck was

+ D

26

ende daer mede hebben sij Emor ende Sychem oec verslaghen nemende Dina haer suster wt Sychems huijs.

27

Ende als sij wter stadt comen waren, soe sijn die ander Iacobs kinderen metter macht gheuallen op die verslaghenen, ende hebben die stadt ghepluystert, ter wraecken vander maghet vercrachtinghe.

28

Haer schapen, ende runderen, ende ezels, en alle datter opt lant, ende in die huysen was, hebben sij gherooft,

29

ende haer kinderen ende huysvrouwen hebben sij gheuanghen wech gheleyt.

30

Ende als sij dit stoutelijck bedreuen hadden, soe seyde Iacob tot Symeon ende Leui, Ghy hebt my verstoort, ende ghemaect dat ick ghehaet ben vanden Chananeen, ende Phereseen, die in dit lant woonen. Wij en sijn niet veele, ende sij sullen tsamen vergaderen, ende verslaen my, ende soe sal ick ende mijn huys te niet ghedaen worden.

31

Ende sij hebben gheantwoerdt, Waert behoorlijck, dat sij onse sustere alsoe misbruycken souden ghelijck een ghemeyn vrouwe.