Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺DAer en tusschen soe heeft Godt gheseyt tot Iacob, Staet op, ende climt op nae Bethel, ende woont daer, ende maect Gode eenen outaer die v openbaerde doen ghy vloodt voer uwen broeder Esau.

+ A

2

Dus heeft Iacob alle sijn huysghesin tsamen roepende, gheseyt, Doet wech alle die vreemde goden, die onder v lieden sijn, ende wordt suyuer, ende verandert v cleederen.

3

Staet op, ende laet ons opwaerts trecken na Bethel, ende daer eenen outaer maken Gode, die my verhoort heeft op den dach mijns lijdens, ende die met my was, ouer wech.

4

Hier omme hebben sij hem ghegheuen alle die vremde goden die sij hadden, ende die oorringhen die in haer ooren waren, ende hy heeftse begrauen onder eenen Therebintijn boom, die es achter die stadt Sichem.

5

Ende als sij vertrocken waren, soe heeft den grouwel des Heeren alle die steden beuanghen, die daer rontsomme waren, alsoe dat sij niet en dorsten hen veruolghen doen sij wech reysden.

6

Aldus es Iacob ghecomen tot Luza, ⁺welck es int lant van Chanaan toeghenaemt Bethel, hy ende alle tvolck met hem.

+ B

7

Ende hy heeft daer eenen outaer ghetimmert, ende hy heeft den naem van die plaetse ghenoemt Godts huys, want daer openbaerde hem Godt, doen hy vloodt van sijnen broedere.

8

Opden seluen tijt es ghestoruen Debora die voester van Rebecca, ende sij es begrauen aen dat nederste van Bethel onder een eycke, ende die plaetse worde ghenoemt die eycke des weenens.

9

Maer Godt heeft wederom gheopenbaert Iacob, nae dat hy comen was van Mesopotamien in Syrien, ende hy heeft hem ghebenedijt,

10

segghende, Ghy en sult voertaen niet meer Iacob heeten, maer Israhel sal uwen naem wesen. Ende hy heeft hem Israhel ghenaemt,

11

ende hem gheseyt, Ic ben Godt almachtich, Wast ende wordt vermenichfuldicht, want luyden, ende volck van verscheyden gheslachten sullen van v comen, ende coninghen sullen wt uwen lendenen comen.

12

⁺Ende het lant dat ick Abraham ende Isaac ghegheuen hebbe, sal ick v gheuen ende uwen sade nae v.

+ C

13

Ende hy ghinck van hem,

14

maer hy rechte een tijtele van steenen, ter plaetsen daer hem Godt aenghesproken hadde, ende storte daer op natten offer, ende storte daer olie wt,

15

ende noemde die plaetse Bethel.

16

Maer doen hy van daer vertrocken was, soe es hy inden voersomer ghecomen int lant van daermen gaet nae Ephrata, tot welcker plaetsen, doen Rachel den arbeyt creech,

17

begonste sij in perikel te comen, om die swaricheyt des barens. Ende die vroede vrouwe seyde tot haer, En wilt niet vreesen, want ghy sult desen sone oeck hebben.

18

Maer als haer die ziele ontginck van pijnen, ende dat sij by na doot was, soe noemde sij haren sone Benoni, dat es te segghen, mijnder pijnen sone, maer sijn vader noemde hem Beniamin, dat es een sone der rechter hant.

19

Aldus soe es Rachel ghestoruen, ende sij es begrauen inden wech, die gaet nae Ephrata, dit es Bethlehem.

20

Ende Iacob heeft eenen tijtel op haer graf ghericht, ende dits den tijtel van Rachels graf, tot op desen dach toe.

21

⁺Ende hy es van daer gheghaen, ende heeft sijn tenten gheslaghen leden den torre der cudden.

+ D

22

Ende als hy in dat lantschap woonde, soe es Ruben gheghaen ende heeft gheslapen met Bala sijns vaders concubine, dwelck hem niet verholen en bleef.

[p. *67]

Ende Iacob hadde twaelf sonen,

23

Die sone van Lia Ruben dierste gheboren, ende Symeon ende Leui, ende Iudas, ende Issachar, ende Zabulon.

24

Die sonen van Rachel Ioseph, ende Beniamin.

25

Die sonen van Bala Rachels dienstvrouwe, Dan, ende Nephthali.

26

Die sonen van Selpha, Lia dienstvrouwe, Gad ende Aser. Dit sijn Iacobs sonen die hem gheboren sijn te Mesopotamien in Syrien.

27

Ende Iacob es oec ghecomen by Isaac sijnen vader te Mambre, een stadt des lants Arbee, dit is Hebron, daer Abraham ende Isaac vreemdelinghen gheweest sijn.

28

Ende Isaacs daghen sijn veruult gheweest hondert ende tachtentich iaren.

29

Ende van outheden verteert, es hy ghestoruen, ende hy es versaemt met sijnen volcke, wesende out ende vol daghen, ende Iacob ende Esau sijn sonen hebben hem begrauen.