Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiij. Capittel.

1

⁺IAcob opheffende sijn ooghen, heeft Esau sien comen, ende vierhondert mannen met hem, Ende hy heeft die kinderen van Lia ende Rachel, ende van die twee dienstvrouwen ghescheyden,

+ A

2

ende hy stelde beyde die dienstvrouwen met haren kinderen int vorste, ende Liam met haer kinderen in die tweede plaetse, maer Rachel, ende Ioseph in die alder laetste,

3

Ende hy es voertghegaen, ende heeft seuenmael aenbeden neder ter eerden waert, tot dat sijn broeder aenquam.

4

Aldus es Esau sijnen broeder te ghemoete gheloopen, ende heeft hem omvanghen, ende omhelsende sijnen hals, ende cussende heeft hy gheweent,

5

Ende als hy sijn ooghen ophief, soe sach hy die vrouwen met haren kinderkens, ende hy seyde, ⁺Wat willen dese sijn? behooren dese v toe? Ende hy antwoerde, Het sijn die kinderkens die Godt my uwen dienaer ghegheuen heeft.

+ B

6

Ende die dienstvrouwen met haren kinderen sijn nader gecomen, ende hebben hem nederghebuycht,

7

Ende Lia es oec by comen met haren kinderen, ende als si oec alsoe aenbeden hadden, soe hebben ten lesten Ioseph ende Rachel oec aenbeden.

8

Ende Esau heeft gheseyt, Wat scharen sijn dit die my te ghemoete comen sijn? Ende hy antwoerde, Om dat ic voer mijnen heere soude moghen ghenade vinden.

9

Ende hy seyde, Ic heb seer veele mijn broeder, behoudt ghy dat v toebehoort.

10

Ende Iacob heeft gheseyt, Ic bidde v en wilt soe niet doen, maer heb ick gratie in v ooghen vonden, soe ontfanckt dese cleyn ghifte van mijnen handen, want ic hebbe v aensicht alsoe aensien ghelijc oft ic Gods aenschijn aensaghe

11

⁺Weest mi ghenadich, ende ontfanct mijn benedictie die ic v brocht hebbe, ende die my Godt verleent heeft, die alle dinghen verleent. Ende als hy van sijnen broeder ghedwonghen worde, soe heeft hy nauwelijcks dat willen ontfanghen,

+ C

12

ende heeft gheseyt.

Laet ons tsamen gaen, ende ic sal v een gheselle wesen ouer uwen wech.

13

Ende Iacob seyde, Mijn heere ghy weet wel dat ick teeder kinderkens hebbe, ende schapen ende runderen die beurucht sijn, ende doen ick dese int voertgaen te seer arbeyden, soe sullen alle die cudden steruen op eenen dach.

14

Mijn heere gae voer sijnen dienaer, ende ick sal allincxkens sijn voetstappen volghen, nae dat ic sien dat mijn cleyn kinderen sullen vermoghen, tot dat ic by mijnen heere comen sal te Seyr.

15

Ende Esau antwoerde, ick bidde v, laet emmer eenighe vanden luyden die met my sijn uwe ghesellen blijuen ouer uwen wech. Ten es (seyt hy) van gheenen noode, alleen behoef ick, mijn heere, ⁺dat ic mach ghenade vinden voer uwen ooghen.

+ D

16

>Aldus es Esau wederghekeert den wech daer hy doer comen was tot Seyr,

17

Ende Iacob es ghecomen te Socoth, ende als hi daer een huys gemaect, ende sijn tabernakelen gheslaghen hadde, soe heeft hy die plaetse ghenoemt Socoth.

18

Ende hi es voert ghetrocken tot Salem een stadt der Sichimiten, die daer leyt int lant van Chanaan, nae dat hy comen was wt Mesopotamien in Syrien, ende hy heeft ghewoont by die stadt.

19

Ende hy heeft een stuck lants ghecocht daer hy sijn tabernakelen op gheslaghen hadde van die kinderen van Hemor die Sichems vader was, om hondert lammeren.

20

Ende als hy daer eenen outaer opghericht hadde, so heeft hi daerop aengeroepen den alderstercsten Godt van Israhel