Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺ENde Iacob es gereyst voerts ouer den wech die hy begonst hadde, ende hem hebben Godts enghelen ontmoet,

+ A

2

Ende als hy die ghesien hadde, soe seyde hy, Dit syn Godts heyren, ende hy noemde die plaetse Mahanaim, dat es heyrlegher.

3

Maer hy heeft oec boden ghesonden tot Esau sijnen broeder voer hem, int lant van Seyr, in dat lantscap van Edom,

4

ende hemlieden gheboden segghende, Aldus suldi mijnen heere Esau segghen, Dit seyt v broeder Iacob, Ic heb een vremdelic gheweest by Laban, ende daer ben ick gheweest tot desen dach toe,

5

Ic heb ossen, ende esels, ende schapen, ende knechten, ende dienstvrouwen, ende ick sende nv een beuelbootscap tot mijnen heere, op dat ic mach gratie vinden voer v ooghen.

6

Ende die boden sijn wedercomen tot Iacob segghende, ⁺Wi hebben gheweest by Esau uwen broeder, ende siet hy coemt haestelijc v te gemoete met vierhondert mannen.

+ B

7

Ende Iacob die vreesde seere, ende veruaert sijnde heeft hy dat volck dat met hem was, ghedeylt, ende oec die cudden, ende die schapen, ende die runderen, ende die kemels in twee scharen

8

segghende, Eest dat Esau tot deen schare coemt ende die verslaet soe sal die ander schare die daer ouerblijft, behouden worden.

9

Ende Iacob seyde, Godt mijns vaders Abraham, ende Godt mijns vaders Isaac, Heere die mi gheseyt hebt, ⁺keert wederomme in v lant ende in die stede daer ghy gheboren sijt, ende ic sal v weldoen,

+ C

10

Ic ben minder dan alle uwe bermherticheden ende der waerheyt, die ghy voldaen hebt uwen dienaer, Met mijnen stoc ben ick doer dese iordane ghegaen ende nv come ic wederomme met twee scharen,

11

verlost my wt Esau mijns broeders hant, want ic vreese hem seere, op dat hy by auontueren comende niet en verslae die moeder met die kinderen,

12

Ghy hebt gheseyt dat ghy my wel doen soudt, ende mijn saet verbreyden als dat sant der zee, ⁺welc men van grooter menichten niet tellen en mach.

+ D

13

Ende als hi daer dien nacht gheslapen hadde, soe heeft hy ghiften ghescheyden wt alle dat hy hadde, voer Esau sijnen broeder,

14

tweehondert gheyten, twintich bocken, tweehondert schapen, ende twintich rammen,

15

dertich suyghende kemelen met haren ionghen, veertich coeyen ende twintich verren, twintich ezelinnen ende haer thien ionghen.

16

Ende hi heeft dese cudden elc bisonder ghesonden met sijnen knechten, ende hi seyde tot sijnen knechten, ⁺Gaet voer my, op datter mach ruymte wesen tusschen deen cudde ende dander.

+ G

17

Ende hy heeft den iersten beuolen segghende,

Eest dat mijn broeder Esau v te ghemoet coemt ende dat hy v vraecht, Wien gaet ghy aen? oft werwaert gaedi? oft wien behoren dese toe die ghi volcht?

18

soe suldi antwoerden, Sij behooren toe Iacob uwen broeder, hy heeft sijnen heere Esau ghiften ghesonden, ende hy coemt oec achter ons.

19

Desghelijcs gheboodt hy oec den tweesten ende den derden, ende allen den ghenen die de cudden volchden, segghende, Dese selue woorden suldi oec segghen tot Esau als ghi hem vonden hebt,

20

ende dit noch daer toe segghen, Ende hi v dienaer Iacob die volcht seluer oec onsen ganc,

[p. *65]

want hy seyde ick sal hem versoenen met ghiften die daer voer gaen, ende daer nae sal ic hem sien, by auontueren sal hy mijnder ghenadich wesen.

21

⁺Hieromme sijn die ghiften voer hem gheghaen, maer hy es dien nacht inden legher bleuen,

+ F

22

Ende als hy des morghens vroech opghestaen was, soe heeft hi sijn twee huysvrouwen ghenomen, ende soe veel dienstvrouwen, met elf sonen, ende hy passeerde dat groot water van Iaboc,

23

Ende als hijt al ouergebracht hadde dat hem aenghinck,

24

soe bleef hy alleen.

Ende siet daer worstelde een man met hem tot smorghens toe,

25

Die welcke als hy sach dat hy hem niet en const verwinnen, soe raecte hy die senue van sijnder dgyen, ende terstont verdorde die,

26

Ende hi seyde tot hem, Laet my gaen, want den dagheraert es opghegaen. Ende Iacob heeft gheantwoert, Ic en sal v niet laten gaen, ten sij dat ghi my benedijt.

27

Doen seyt hi, Hoe es uwen naem? Hi antwoerde Iacob.

28

Ende hi seyde, Ghi en sult voertaen niet meer Iacob heeten, maer Israhel, want hebdi teghen Godt sterc geweest, hoe veel te meer suldi machtich wesen teghen die menschen?

29

⁺Iacob die vraechde hem, Segghet my met wat naem sijdi ghenaemt? Hi antwoerde, Waerom vraechdi nae mijnen naem? Ende hy gebenedijde hem op die selue stede.

+ G

30

Ende Iacob noemde die stede Phanuel, segghende, Ic heb den Heere gesien, aensicht teghen aensicht, ende mijn ziele es salich gheworden.

31

Ende als hy Phanuel doer gepasseert was, soe es hem terstont die sonne opghegaen, maer hy hincte met den eenen voet,

32

Daerom en eten die kinderen van Israhel die zenue niet die daer verdorret es in die dgye van Iacob, tot op desen dach toe, om dat hy die zenue sijnder dgyen raecte, ende dat die ongheuoelijck gheworden es.