Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺MAer Rachel siende dat si onuruchtbaer was, heeft haer suster benijdt, ende heeft tot haren man gheseyt, Gheeft my kinderen, oft anders sal ic steruen,

+ A

2

Ende Iacob op haer gram wesende, heeft gheantwoert, Ben ic v in Godts stede, die v benomen heeft die vrucht ws lichaems?

3

Ende sij heeft gheseyt, Ick heb een dienstvrouwe, Bala, versaemt v met haer, op dat sij mach op mijnen schoodt baren, ende ick van haer kinderen hebben,

4

ende sij gaf hem Balam ten houwelijck,

5

Ende als die man met haer versaemt es, soe heeft sij ontfanghen ende ghebaert eenen sone,

6

ende Rachel heeft gheseyt, die Heere heeft my recht ghedaen, ende mijn stemme verhoort, gheuende my eenen sone, ende daerom heeft sij hem ghenoemt Dan,

7

Ende Bala wederomme ontfanghende heeft noch eenen sone ghebaert,

8

waerom dat Rachel heeft gheseyt, ⁺Die Heere heeft my ghelijck ghemaect mijnder suster, ende ic ben vroem gheworden, ende sij heeft hem ghenoemt Nephthali.

+ B

9

Ende Lia gheuoelende dat sij niet meer en baerde, heeft Selpham haer dienstvrouwe haren man ghegheuen,

10

ende als die ontfanghen hadde, ende eenen sone baerde,

11

soe heeft Lia gheseyt, Gheluckichlijck, ende daerom gaf sij hem den naem, Gad,

12

Ende Selpha heeft noch eenen sone ghebaert,

13

Ende Lia heeft gheseyt, Dats voer mijn salicheyt, want nv sullen die vrouwen my salich heeten, ende daerom heeft sij hem Aser ghenoemt.

14

Ende als Ruben wtghegaen was te velde, ten tijde van der terwen oost, soe heeft hy vruchten van Mandragora vonden, die welcke hi Lia sijnder moeder heeft gebracht, Ende Rachel seyde, Gheeft my een deel van ws soons Mandragoren,

15

Ende sij antwoerde, Duncket v een cleyn dinc, dat ghy my mijnen man ontnomen hebt, tensij dat ghi my oeck ontneemt mijns soons Mandragoren? Ende Rachel seyde, Laet hem desen nacht bi v slapen voer ws soons Mandragoren.

16

⁺Ende doen Iacob des auonts wten velde quam, soe es Lia hem te ghemoete ghegaen, ende heeft hem gheseyt, Ghy sult v met my versamen, want ick heb v met eenen loon ghehuert, om mijns soons Mandragoren. Ende hy heeft dien nacht by haer gheslapen,

+ C

17

Ende Godt heeft haer ghebedt verhoort, ende sij heeft ontfanghen, ende ghebaert den vijfsten sone,

18

ende sij seyde, Godt heeft my gheloont om dat ick mijn dienstwijf mijnen man ghegheuen hebbe, ende sij heeft hem ghenoemt Issachar,

19

Ende Lia wederomme ontfanghende, heeft den sesten sone ghebaert

20

ende sij seyde, God heeft my begaeft met een goede ghifte, dus sal dese reyse mijn man oeck met my wesen, om dat ick hem ses sonen heb voertghebracht, ende daerom heeft sy hem ghenoemt Zabulon,

21

Ende nae dien soe baerde sij een dochter ghenaemt Dina.

22

⁺Ende die Heere denckende op Rachel heeft haer verhoort, ende haer lichaem ontsloten,

+ D

23

ende sij heeft ontfanghen ende ghebaert eenen sone segghende, God heeft nu mijn verwijt wech ghenomen,

24

ende si heeft hem ghenaemt Ioseph, segghende, God gheue my hier toe noch eenen anderen sone.

25

Maer als Ioseph gheboren was, soe heeft Iacob gheseyt tot sijnen swegher, Gheeft my orlof dat ick mach wederom gaen nae mijns vaders lant, ende nae mijn eertrijcke,

26

Gheeft my mijn huysvrouwen ende mijn kinderen, daerom ick v ghedient hebbe, dat ick wech gae, want ghy weet den dienst daer mede ic v ghedient hebbe.

27

Ende Laban heeft tot hem gheseyt Laet my gratie vinden voer v aensicht, Ic heb by experientie beuonden dat my Godt ghebenedijt heeft doer v,

28

Stelt uwen loon die ick v gheue.

29

Ende hy heeft gheantwoert, Ghy weet wel hoe dat ick v ghedient hebbe, ende hoe groot dat v goet gheweest es in mijn handen,

30

⁺Ghy hadt luttel eer ic by v quam, ende nv sijdi rijck gheworden, ende die Heere heeft v ghebenedijt te mijnder incoemsten, daer om eest recht dat ic oec eens mijn huys besorghe.

+ E

31

Ende Laban seyde, Wat sal ick v gheuen? Ende hy seyde, Ick en begheer niet, maer eest dat ghy doen wilt dat ick begheere, soe sal ic weder v vee voeden ende hoeden.

32

Gaet allen v cudden omme, ende scheyt wt, alle die bonte scapen, ende welcker vlies van menigherley verwen es, ende alle datter rootachtich ende beplact ende van versceyder verwen es, soe wel onder die scapen als onder die gheyten, dat sal mijnen loon wesen,

33

Ende morghen sal mijn rechtuerdicheyt my antwoerden, als den behaechden tijt comen sal voer

[p. *63]

v, ende alle datter niet menigherley en is, ende beplact ende rootachtich, soe wel onder die schapen als onder die gheyten, daer af suldi my van dieften straffen.

34

⁺Ende Laban heeft gheseyt, Ick neemt in dancke dat ghy begheert.

+ F

35

Ende hy heeft op dien dach wtghescheyden die bonte ende beplecte gheyten ende schapen, bocken, ende rammen, maer alle die cudden van eender verwen, te weten van witte oft swerte vellen, gaf hy in sijnder kinderen hant,

36

Ende hy stelde een ruymte van drij dachreysen tusschen hem, ende sijnen behouden sone die sijn ander cudden weydde.

37

Doen heeft Iacob ghenomen roeykens van populier boomen, ende van amandel boomen, ende van platanus boomen, ende sceldese eensdeels, ende als die scorssen afghetrocken waren, sachmen in die gheschelde roeden witticheyt, maer daer sij gheheel waren, daer bleuen sij groen, ende aldus es die verwe verscheyden gheworden,

38

Ende hy leyde die roeden in die waterbacken, daer het water inne gegoten worde, dat die cudden souden dese roeden voer ooghen hebben als sij quamen drencken, ende int aensien van dien ontfanghen.

39

⁺Ende het es gheschiet, dat die schapen hebben aensien dese roeden in die hitte des bespringhens, ende hebben voertbrocht bonte, van verscheyden verwen, ende van beplacte vellen.

+ G

40

Ende Iacob scheyde die cudden, ende hi leyde die roeden in die waterbacken voer die ooghen vanden rammen, ende alle dat heel wit ende swert was dat behoerde Laban toe, ende dandere behoerde Iacob toe, in versceyden cudden van malcanderen.

41

Hier omme wanneer dat inden vorsten tijde die schapen bespronghen worden, soe leyde Iacob die roeden in die waterbacken, voer der rammen ende der oyen ooghen, dat sij ontfanghen souden int aensien van dien.

42

Maer alst den spaden loop was, ende den lesten ontfanck, dan en leyde hy die roeden niet, Ende het es gheschiet aldus dat die spadelinghen worden Labans, ende die vroechtijdighe worden Iacobs,

43

Ende die mensch es bouen maten seer rijck gheworden, ende hy hadde veel cudden veets, veel dienstvrouwen ende dienaers, kemels ende ezels.