Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺ALdus reysende es Iacob ghecomen int oosten lant,

+ A

2

ende hy heeft opt velt eenen put ghesien ende drij cudden schapen daer by ligghende, want wt dien put worde den vee te drincken ghegheuen, ende den mont vanden put was met eenen grooten steen ghesloten,

3

Ende het was die maniere datmen dien steen afwentelde als alle die schapen vergadert waren, en als die cudden versaet waren, soe leyden sij den steen weder op den mont vanden put,

4

Ende hy seyde tot die herders, Broeders van waer sijdi? Ende sij hebben geantwoert, Van Haran,

5

Ende hy heeft hen gheuraecht seggende, En kendi Laban niet Nachors sone? Ende sij hebben gheseyt, wij kennen hem,

6

Es hy oec ghesont (seyt hy)? Sij seyden, hy es welvarende, ende siet Rachel sijn dochter coemt met haren cudde.

7

Ende Iacob heeft geseyt, Het es noch langhe dach, ende ten es noch gheen tijt om die cudden ter coyen te drijuen, gheeft die schapen ierst te drincken, ende leytse alsoe weder ter weyden.

8

Die welcke hebben gheantwoerdt, Wij en moghen tot dat alle dat vee verghadert es, ende dat wij dan den steen vanden mont des puts aflegghen, om die cudden te drincken te gheuen.

9

⁺Ende siet die wijle dat sij noch spraken, soe quam Rachel met haers vaders schapen, want sij hoedde een cudde.

+ B

10

Ende als Iacob haer ghesien hadde, ende wiste dat sijns ooms dochter was, ende dat dit waren Labans sijns ooms schapen, soe heeft hi den steen afghedaen, daer den put mede besloten was,

11

Ende als hy dat cudde hadde te drincken ghegheuen, soe heeft hy haer ghecust, ende heeft met luyder stemmen gheweent,

12

Ende hy heeft haer te kennen ghegeuen dat hy haers vaders broeder was, ende een sone van Rebecca, ende sij heeft dat haestelijck haeren vader te kennen ghegheuen,

13

Die welcke ghehoort hebbende dat Iacob sijns susters sone comen was, soe es hy hem te ghemoete gheloopen, ende heeft hem omuanghen, ende ghecust, ende gheleyt in sijn huys, Ende als hy ghehoort hadde die saken van sijnder reysen,

14

soe heeft hi gheantwoert, Ghij sijt mijn ghebeente ende mijn vleesch. Ende als die daghen van eender maent ouer waren,

15

soe heeft hy tot hem gheseyt, Suldi my voer niet dienen om dat ghij mijn broeder sijt? Segt, wat loon dat ghy hebben sult,

16

⁺Ende hy hadde twee dochteren, die meeste was ghenaemt Lia, maer die ioncste hiet Rachel,

+ C

17

maer Lia hadde leepe ooghen, Rachel die was schoon van aensicht ende fraey van ghedaente,

18

die welcke Iacob liefhebbende heeft gheseyt, Ic sal v seuen iaeren dienen om Rachel v ioncste dochter.

19

Ende Laban antwoerde, Tes beter dat ic v die

[p. *62]

gheue,dan eenen anderen man, blijft by my.

20

Dus heeft Iacob om Rachel ghedient seuen iaren, ende het dochten hem luttel daghen te sijne, ouermidts die grootheyt der liefden.

21

Ende hy heeft tot Laban gheseyt, Gheeft mi mijn huysvrouwe, want den tijt es nv volbrocht dat ic met haer versamen soude,

22

Die welcke veel scharen van vrinden ter maeltijt gheroepen hebbende, heeft die bruyloft ghemaect.

23

Ende tsauonts heeft hy Liam sijn dochter by hem binnenbracht,

24

gheuende sijnder dochter een dienstvrouwe Zelpha ghenaemt.

Ende doen Iacob nae der ghewoenten met haer versaemt es gheweest, heeft hy des morghens vroech ghesien Liam,

25

Ende hy heeft tot sijnen swegher gheseyt, Wats dit dat ghy hebt willen doen? En heb ic v niet om Rachel ghedient? waerom hebdi my bedroghen?

26

⁺Laban heeft gheantwoert, Ten es in onse plaetse gheen ghewoonte, dat wij die ioncste vore ten houwelijcke geuen,

+ D

27

Volbrengt die weke der daghen van desen houwelijck, ende ick sal v dese oeck gheuen, voer twerck dat ghy my noch seuen ander iaren dienen sult.

28

Ende hy was daermede te vreden, Ende als die weke voerleden was, soe heeft hy Rachel tot eender huysvrouwen genomen,

29

der welcker haer vader hadde ghegeuen een dienstvrouwe Bala ghenaemt.

30

Als hi dan ten lesten vercreghen hadde die begheerde bruloft, soe heeft hy die liefde der lester voergheset der liefden van die ierste, dienende by hem noch ander seuen iaren.

31

Maer die Heere siende dat hy Liam verachte, soe heeft hy haer lichaem ontsloten, haer suster blijuende onuruchtbaer,

32

die welcke heeft ontfanghen ende ghebaert eenen sone ende heeft hem ghenoemt Ruben, segghende, Die Heere heeft mijn verworpenheyt aensien, nv sal mijn man my lief hebben.

33

Ende sij heeft wederom ontfanghen, ende ghebaert eenen sone, ende sy seyde, om dat die Heere ghehoort heeft dat ick versmaet worde, soe heeft hy my desen oeck ghegheuen, ende sij heeft hem ghenoemt Simeon.

34

Ende sij heeft ten derden male ontfanghen, ende eenen anderen sone ghebaert, ende gheseyt, Nv sal hem mijn man oec met my versamen, om dat ic hem drie sonen ghebaert hebbe, ende daerom heeft sy sijnen naem ghenoemt Leui.

35

Ten vierden heeft sij ontfanghen ende eenen sone ghebaert, ende gheseyt, Nv sal ic den Heere louen, ende daerom noemde sij hem Iudas, ende si hiel op van baren.