Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺HIerom heeft Isaac sijnen sone Iacob gheroepen ende hem ghebenedijt, ende hem beuolen segghende, En wilt gheen huysvrouwe nemen vanden gheslachte van Chanaan,

+ A

2

maer gaet ende reyst tot Mesopotamien in dlant van Syrien ten huyse van Bathuel ws moeders vadere, ende neemt voer v daer een huysvrouwe van Laban ws ooms dochteren,

3

Ende die almachtighe Godt wil v ghebenedijden, ende doen v wassen ende vermenichfuldighe v, op dat ghy moecht wesen tot veel scharen van veel volcks,

4

Ende hy gheue v die benedictie van Abraham ende uwen sade na v, op dat ghy moecht besitten dat lant van uwer pelgrimagien, dwelc hy uwen grootvader beloeft heeft.

5

Ende als hem Isaac hadde laten gaen, ⁺soe es hy ghereyst ende ghecomen tot Mesopotamien in Syrien, tot Laban Bathuels sone van Syrien, den broeder van Rebecca sijnder moeder.

+ B

6

Maer Esau siende dat sijn vader hadde Iacob ghebenedijt, ende hadde hem ghesonden tot Mesopotamien in Syrien, dat hi van daer een huysvrouwe nemen soude, ende dat hy hem nae die benedictie beuolen hadde, seggende, En neemt gheen huysvrouwe van die dochteren van Chanaan,

7

ende dat Iacob sijnen ouders onderdanich wesende ghegaen was nae Syrien,

8

ende beuindende dat sijn vader niet gheerne en sach die dochteren van Chanaan,

9

soe es hy ghegaen tot Ismahel, ende hy heeft tot eender huysvrouwen ghenomen (sonder die hy noch te voren hadde) Maheleth die dochter van Ismahel Abrahams sone, die suster van Nabaioth.

10

⁺Aldus dan Iacob wtghegaen sijnde van Bersabee, es ghereyst nae Haran,

+ C

11

ende als hy op een plaetse comen was daer hy rusten wilde, nae der sonnen onderganc, soe heeft hy ghenomen van den steenen die daer laghen, en dien onder sijn hooft geleyt, ende op die selue plaetse geslapen,

12

Ende in sijnen droom heeft hy een leere ghesien opder eerden staende, die metten oppersten eynde den hemel raecte, ende die enghelen Godts clommen daer lancs opwaerts ende nederwaerts,

13

ende den Heere rustende op die leere, segghende tot hem, Ic ben die Heere Abraham ws vaders Godt ende Isaacs Godt. Dit lant daer ghy op slaept sal ic v gheuen, ende uwen sade,

14

Ende v saet sal sijn als dat stubbe der aerden, ghy sult verbreyt worden, Oostwaert, ende Westwaert, Noordtwaert, ende Suydtwaert, ende in v ende v saet sullen alle die gheslachten der eerden ghebenedijt worden,

15

Ende ick sal v behoeder wesen, werwaert ghi henen gaet ende sal v wederbrenghen int dit lant, ende ic en sal v niet verlaten tot dat ick volbracht hebbe dat ic gheseyt hebbe.

16

Ende als Iacob wten slape ontspronghen was, ⁺soe seyde hy, Voerwaer die Heere es op dese plaetse, ende ic en wist dat niet,

+ D

17

Ende beureest wesende heeft hy gheseyt, Hoe veruaerlijck es dese plaetse, ten es hier anders niet dan thuys Godts, ende een poorte des hemels.

§ 18

Hierom Iacob vroech opstaende heeft den steen ghenomen den welcken hi onder sijn hooft gheleyt hadde, ende recht op ghestelt tot eenen titele, ghietende olie daer op,

19

Ende hi noemde die stadt Bethel, die te voren Luza ghenaemt was.

20

Ende hy heeft den Heere oeck een ghelofte ghelooft segghende, Eest dat die Heere met my sij, ende my bewaert op den wech dien ic wandele, ende my broot geuet om teten, ende cleederen om aen te doen,

21

ende dat ick voerspoedelijc weder tot mijns vaders huys come, soe sal die Heere my tot eenen Godt sijn,

22

ende desen steen die ick opghericht hebbe tot een ghedenckenisse, sal ghenoemt worden het huys Godts, Ende ic sal v thiende offeren van alle dat ghy my geuen sult.