Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺MAer, doen daer eenen dieren tijt opgestaen was opt lant, nae den onturuchtbaren tijt, die gheweest was in Abrahams tijde, soe es Isaac wech ghereyst tot Abimelech den coninck vanden Palestinen, te Gerara.

+ A

2

Ende die Heere heeft hem gheopenbaert, ende gheseyt, En gaet niet nederwaerts in Egipten, maer rust int lant dat ic v segghen sal,

3

ende weest daer een vreemdelinc, ende ic sal met v sijn, ende ick sal v ghebenedijden, want v ende uwen sade sal ic alle dese landen gheuen, volbrenghende den eedt welck ick ghesworen hebbe Abraham uwen vader,

4

Ende ic sal v saet vermenichfuldighen ghelijck die sterren des hemels, ende ic sal uwen nacomelinghen alle dese landen gheuen, ende doer v saet sal alle volck des aertrijcs ghebenedijt worden,

5

om dat ⁺Abraham mijnen woerden is ghehoorsaem gheweest, ende heeft bewaert mijn gheboden, ende mijn beuelen, ende heeft onderhouden mijn godsdienstighe insettinghen, ende mijn wetten.

+ B

6

Dus es Ysaac bleuen tot Geraris,

7

ende doen hem die mans van dier plaetsen vraechden van sijnder huysvrouwen, soe antwoerde hy, Het is mijn suster, want hy vreesde hemlieden te kennen te gheuen, dat sijn huysvrouwe was, meynende dat sij hem by auontueren mochten dooden, om haer schoonheyt wille.

8

Alst nv langhe leden was, ende hy daer woonde, soe heeft Abimelech die coninck vanden palestijnen, doer een vinster siende, ghemerct, dat hy boerde met Rebecca sijnder huysvrouwen,

9

ende heeft hem gheroepen ende geseyt, Tes claer dat dit v huysvrouwe es, waerom hebdi gheloghen segghende, dat v suster es? Ende hy heeft gheantwoert, ic vreesde dat ic soude steruen om haren willen.

10

⁺Ende Abimelech heeft geseyt, waerom hebdi ons bedroghen? want daer hadde yemant vanden volcke hem moghen met v huysvrouwe versamen, ende alsoe soudi op ons een groote sonde gebracht hebben. Ende hy heeft alle den volcke gheboden, segghende,

+ C

11

Soe wie die huysvrouwe van desen man aentast die sal die doot steruen.

12

Ende Isaac heeft in dat lant gesaeyt, ende hy heeft op dat iaer gheuonden honderfout, ende die Heere heeft hem ghebenedijt,

13

Ende die man es rijck gheworden, ende hy es voertghegaen toenemende, ende wassende, tot dat hy seer groot gheworden es.

14

Ende hy hadde groot goet van schapen, ende groot vee, ende veel huysghesins, waerom dat die palestijnen hem benijt hebben,

15

ende hebben op dien tijt ghestopt alle die putten die welcke sijns vaders Abrahams dienaers ghegrauen hadden, vullende die met aerden,

16

⁺Alsoe dat Abimelech seluer oeck seyde tot Isaac, Trect wech van ons, want ghy sijt seer veel machtigher gheworden dan wij sijn.

+ D

17

Ende hy es wech ghegaen om te comen aen die beke van Gerare ende aldaer te woonen,

18

ende hy heeft wederomme ander putten gegrauen, die welcke Abraham sijns vaders dienaers ghegrauen hadden, ende die welcke nae sijn doot die philistinen wijlen gestopt hadden, ende hy noemde die metten seluen namen, soe sijn vader die te voren ghenoemt hadde.

19

Ende sij groeuen omtrent der beken ende sij vonden leuende water.

20

Maer daer was oec eenen twist der herders van Gerare, teghen die herders van Isaac, want sij seyden, Dat water es onse, waerom soe heeft Isaac den naem vanden put ghenoemt, bedeckt bedroch om tghene dat daer gheschiet was.

21

⁺Ende sij hebben noch eenen anderen ghegrauen, ende daerom hebben sij oec ghekeuen, ende hy heeft dien ghenoemt, viantschappen.

+ E

22

Ende hy es van daer ghereyst, ende heeft eenen anderen punt ghegrauen, daer sij niet om ghekeuen en hebben, ende hy noemde dien, Breetheyt, segghende, Nv heeft ons die Heere verbreyt, ende heeft ons doen wassen op die aerde,

23

Maer Isaac es van dier plaetsen opwaerts ghetrocken nae Bersabee,

24

daer hem die Heere op dien nacht openbaerde, segghende, Ic ben Abrahams ws vaders Godt, en wilt niet vreesen, want ic ben met v, ende ic sal v ghebenedijden, ende ick sal v saet vermenichfuldighen om Abraham mijnen dienaer.

25

⁺Aldus soe heeft hy daer eenen outaer ghetimmert, ende aenroepende den naem des Heeren, soe heeft hy sijn tabernakel daer wt ghespraeyt ende ghestelt, ende hy heeft sijnen knechten beuolen dat sij eenen put grauen souden.

+ F

26

Ende als Abimelech ende Ochozat sijn vrint, ende Phicol sijn capiteyn vanden orloochs volc van Geraris tot dier plaetsen gecomen waren,

27

soe heeft Isaac tot hemlieden gheseyt, waertoe coemdi tot my eenen mensch die ghy hatet, ende van v verdreuen hebt?

28

Die welcke hebben gheantwoert, Wij hebben ghesien dat die Heere met v es, ende daeromme hebben wij gheseyt, Laet daer eenen eedt wesen tusschen ons, ende laet ons een verbont maken,

29

⁺

op dat ghy ons gheen quaet en doet ghelijck wij oec niet vanden uwen en hebben aenghetast, noch wij en hebben niet gedaen dat v hinderen mocht, maer wij hebben v met vrede laten gaen vermeerdert doer die benedictie des Heeren.

+ G

30

Dus heeft hy hen eenen maeltijt ghedaen, ende nae dat sij gheten ende gedroncken hadden,

31

smorghens vroech op staende, hebben sij malcanderen eedt ghedaen, ende Isaac heeftse vredelijck laten gaen tot haerlieder stede.

32

Maer siet, op die seluen dach sijn Isaacs knechten ghecomen, ende hebben hem ghebootschapt vanden put die sij ghegrauen hadden, seggende, Wij hebben water vonden,

33

waer af dat hy dien put heeft ghenoemt, oueruloedicheyt, ende die stadt is ghenoemt Bersabee, tot op desen dach toe.

34

Maer Esau veertich iaren out sijnde, heeft twee huysvrouwen ghenomen, Iudith Beeri des Hethiters dochter, ende Basemath Elons dochter, van der seluer steden,

35

die alle beyde hadden vertornt den moet van Isaac ende Rebecca.