Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺MAer Abraham heeft een ander huysvrouwe ghenomen, Cetura ghenaemt,

+ A

2

die welcke hem baerde Zamram, ende Iecsan, ende Madan, ende Madian, ende Iesboc, ende Sue,

3

Iecsan heeft oeck ghewonnen Saba, ende Dadan, Die kinderen van Dadan waren Assurim, ende Latussim, ende Laomim.

4

Ende voerts van Madian es gheboren Epha, ende Epher, ende Henoch, ende Abida, ende Eldaa, alle dese waren kinderen van Cetura.

5

Ende Abraham heeft Ysaac ghegeuen alle dat hy beseten hadde,

6

maer den kinderen vanden concubinen, heeft hy ghiften ghegheuen, ende hy heeft die ghescheyden van sijnen sone Ysaac, die wijle dat hy noch leefde, ter oostsijden waert.

7

Ende die daghen van Abrahams leuen, sijn gheweest hondert ende vijfentseuentich iaren,

8

ende ghebreckelijck werdende hy gestoruen in goeden outheyt, wesende verre voertghegaen in ouderdom, ende vol van daghen, ende hy es versaemt met sijnen volcke.

9

⁺Ende Ysaac ende Ismahel sijn sonen hebben hem begrauen, in die dobbel speluncke, die daer gheleghen es inden acker van Ephron Seors des hethiters sone, teghen ouer Mambre,

+ B

10

den welcken hy ghecocht hadde van Hets kinderen, daer is hy begrauen, ende Sara sijn huysvrouwe.

11

Ende nae sijn doot soe heeft God Ysaac sijnen sone ghebenedijt, die daer woonde omtrent den put diemen noemt des leuenden ende sienden.

12

Dit sijn die gheslachten van Ismael Abrahams sone den welcken hem Agar die egiptenersse Sara dienstvrouwe ghebaert heeft,

13

ende dit sijn die namen van sijnen sonen, elck bi haren namen, ende gheslachten, Dierste geboren van Ismahel was Nabaioth, daer nae Cedar, ende Adbeel, ende Mapsam,

14

Masma oec, ende Duma, ende Massa,

15

Hadad, ende Thema, ende Ietur, ende Naphis, ende Cedma,

16

dit sijn die sonen van Ismahel, ende dit sijn haer namen, in haer casteelen ende steden, twelf princen van haren gheslachten,

17

Ende die iaren van Ismahels leuen sijn worden hondert ende seuenendertich, ende ghebreckelijck werdende es hy ghestoruen, ende versaemt met sijnen volcke,

18

Ende hy heeft ghewoont van Euila tot Sur, welck daer es teghen ouer Egypten, alsmen coemt int lant van Assirien, voer alle sijn broeders es hy ghestoruen.

19

⁺Ende dit sijn die gheslachten van Isaac Abrahams sone, Abraham heeft ghewonnen Isaac,

+ C

20

die welcke als hy veertich iaren out was, heeft tot eender huysvrouwen ghenomen Rebecca Bathuels dochter van Syrien tot Mesopotamien, Labans suster,

21

Ende Isaac heeft den Heere gebeden voer sijn huysvrouwe, om dat sij onuruchtbaer was, die welcke hem verhoort heeft, ende heeft Rebecce verleent dat sij ontfinck,

22

maer die kinderkens worden van deen dander ghestooten in haren buyck, die welcke heeft geseyt, Stont my dit aldus te geschieden, wat noot waert te ontfanghen? Daerom soe is sij ghegaen om vanden Heere raet te vraghen,

23

die welc haer heeft gheantwoort ende gheseyt, Tweederhande volc sijn in uwen lichaem, ende tweederhande luyden sullen sceyden wt uwen buyck, ende dat een volck sal dat ander volck te bouen gaen, ende het meeste sal den minsten dienen.

24

Als nv den tijt des barens comen was, siet, soe sijnder tweelinghen in haren lichaem beuonden.

25

Die ierstmael wtcomen es, die was rootuerwich, ende al heel ghehaert ghelijc een harich vel, ende hy es genoemt Esau, ⁺Terstont daer nae die ander wtcomende, hiel die plante van sijns broeders voet metter hant, ende daerom hiet hy hem Iacob.

+ D

26

Esau was tsestich iaren out als hem die kinderkens gheboren worden,

27

Die welcke (als sij groot ghewassen waren) soe es Esau gheworden een listich iagher ende een ackerman, maer Iacob was een slecht man, woonende in die tabernakelen,

28

Isaac beminde Esau, om dat hy adt van dat wiltbraet sijnder iacht, ende Rebecca beminde Iacob.

29

Ende Iacob heeft ghecoeckt een gherecht, ende Esau es by hem ghecomen al moede wt den velde,

30

ende heeft gheseyt, Gheeft my van deser rooder cokinghen, want ic ben seer vermoeyt, daerom es hy Edom ghenaemt,

31

ende Iacob heeft tot hem gheseyt, vercoopt my die vordeelen van v ierste gheboorte,

32

Ende hy heeft gheantwoort, Siet ick sterue, wat sullen my baten die vordeelen van mijn ierste gheboerte?

33

Ende Iacob seyde, sweeret my dan, ende Esau heuet

[p. *59]

hem ghesworen, ende hy heeft die vordeelen van sijn ierste gheboerte vercocht,

34

Ende aldus nemende broot ende die toespijse van linsen saet ghemaeckt, heeft hy gheten ende ghedroncken, ende es wech ghegaen, cleyn achtende dat hy die vordeelen van sijnder ierster gheboerten vercocht hadde.