Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺SAra die heeft gheleeft hondert ende seuenentwintich iaren,

+ A

2

ende sij es ghestoruen in die stadt van Arbee, welck es Hebron int lant van Chanaan, ende Abraham es comen, dat hijse beclaghen ende beweenen soude,

3

Ende als hy opghestaen was vanden dienst des lijcs, soe heeft hy ghesproken tot die kinderen van Heth segghende,

4

Ick ben een wtlander ende een pelgrim by v lieden, gheeft my een recht van een begrauenisse te hebben met v lieden, dat ic mijnen dooden mach begrauen.

5

Ende die sonen van Heth hebben gheantwoert, segghende,

6

Hoort ons heere, ghy sijt een prince Godts by ons, dus begraeft uwen dooden in onse wtnemende grauen, ende niemant en sal v moghen verbieden dat ghi uwen dooden niet en sult moghen in sijn graf begrauen.

7

⁺Doen stont Abraham op, ende hy heeft het volck des lants aenghebeden, te weten die kinderen van Heth,

+ B

8

ende hy heeft tot haerlieden gheseyt, Eest dat uwer zielen belieft dat ick mijnen dooden begraue, soe hoort my, ende bidt voer my aen Ephron die sone van Zeor,

9

dat hy my gheue die dobbel speluncke die hy heuet op dat wterste van sijnen acker, ende dat hijse my leuere voer die weerde vanden ghelde, tot een besittinghe der begrauenisse.

10

Ende Ephron woonde int midden van Heths kinderen. ⁺Ende Ephron heeft tot Abraham gheantwoerdt dat sijt allen hoorden die daer quamen in die poorte van dier stadt, segghende,

+ C

11

Neen mijn Heere ten sal alsoe gheensins gheschieden, maer wilt doch ghy lieuer aenhooren dat ick segghe, Den acker leuere ick v ouer, ende die speluncke die daer in es, in die teghenwoordicheyt van die kinderen mijns volcs begraeft uwen dooden,

12

Abraham heeft aenbeden voer dat volck des lants,

13

ende hy heeft gheseyt tot Ephron, daer sijn volck al omme stont, Ick bidde v wilt my hooren, Ick sal ghelt voer den acker gheuen, ontfanct dat, ende alsoe laet my mijnen dooden daer in begrauen.

14

Ende Ephron heeft gheantwoert,

15

Mijn heere hoort my, het lant dat ghy begheert, es vierhondert siclen siluers weert, dit es den prijs tusschen v ende my, maer hoe veel dat es? Begraeft uwen dooden.

16

⁺Als Abraham dit ghehoort hadde, soe woech hy dat ghelt welck Ephron gheeyscht hadde, daert alle die kinderen van Heth hoorden, te weten vierhondert siclen ghekuert siluers, ende gancbaerder munten.

+ D

17

Ende den acker die wijlen Ephron toebehoorde, daer inne een dobbel speluncke was, teghen ouer Mambre, soe wel den acker als die speluncke met allen sijnen boomen staende int ronde aen alle sijn sijden,

18

es Abrahams besittinghe gheworden, daert aensaghen die kinderen van Heth, ende alle die daer quamen in die poorte van dier stadt.

19

Ende aldus soe heeft Abraham Sara sijn huysvouwe begrauen in die dobbel speluncke des ackers, die stont teghen ouer Mambre, dit es Hebron int lant van Chanaan,

20

Ende dien acker met dat hol dwelck daer inne was, es Abrahams beuestichde erue gheworden tot een erfbegrauenisse, van Heths kinderen.