Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺NAe dien dat dese dinghen ghebuert sijn, soe heeft God Abraham ghetempteert, ende tot hem gheseyt, Abraham Abraham, Ende hy heeft gheantwoert, Ic ben hier,

+ A

2

Ende hy seyde tot hem, Neemt uwen eenighen gheboren sone den welcken ghi lief hebt Isaac, ende gaet int lant des ghesichts, ende daer suldi mi dien offeren tot eenen brantoffer op een vanden berghen die ic v sal toonen.

3

Hierom Abraham des nachts opstaende, heeft sijnen ezel bereyt, leydende met hem twee ionghelinghen, ende Isaac sijnen sone, ende als hy het hout hadde ghehouwen tot den brantoffer, soe is hy ghegaen ter plaetsen die hem God beuolen hadde,

4

Ende opden derden dach opheffende sijn ooghen, heeft hy die plaetse van verre ghesien,

5

ende gheseyt tot sijnen dienaers, Verbeyt hier metten ezel, ic ende het kint die sullen haestelijck tot daer gaen ende weder tot v lieden comen als wi aenghebeden hebben,

6

⁺Ende hy nam oeck dat hout totten brantoffer, ende leyde dat op sijnen sone Isaac, mer hy droech in sijn handen tvier, ende tsweert.

Ende als sij beyde tsamen voerts ghinghen,

+ B

7

soe seyde Isaac tot sijnen vader, Mijn vader, ende hi heeft gheantwoert, Wat wildi sone? Siet (seyt hy) hier is vier ende hout, waer es de offerande des brantoffers?

8

Maer Abraham heeft gheseyt, God sal hem vander offeranden des brantoffers voersien mijn sone. Also sijn sij beyde tsamen voerts ghegaen,

9

ende sijn ghecomen ter plaetsen die hem Godt ghetoont hadde, ende hy heeft daer eenen outaer ghemaect, ende heeft daer op dat hout op eenen hoop gheleyt, ende als hy sijnen sone Isaac ghebonden hadde, soe stelde hy hem op den outaer, bouen op den tas des houts,

10

ende hy reycte wt sijn hant, ende nam dat sweert, om sijnen sone teenen offere te dooden.

11

⁺Ende siet den Enghel des Heeren heeft wten hemel gheroepen segghende, Abraham Abraham? Die welcke heeft gheantwoerdt, Ick ben hier,

+ C

12

Ende hy heeft tot hem gheseyt, En steect v hant niet aen dat kint, noch en doet hem niet, nv heb ic bekent dat ghi den Heere vreest, ende dat ghy uwen eenighen sone niet en hebt ghespaert om mijnen wille.

13

Abraham heeft sijn ooghen opghehauen ende hy heeft achter rugghe ghesien eenen ram verwerret tusschen die dornen, met sijnen hornen, den welcken hy heeft ghenomen

[p. *56]

ende tot eenen brantoffer gheoffert voer sijnen sone,

14

Ende hi heeft die plaetse ghenoemt Die Heere siet, Waeromme datmen seyt totten dach van heden, Op den berch die Heere salt sien.

15

Ende die Enghel des Heeren heeft Abraham die tweede reyse vanden hemel gheroepen, segghende,

16

⁺Ick heb by my seluen ghesworen (seyt die Heere) om dat ghy dit dinck ghedaen hebt, ende dat ghy uwen eenighen sone niet en hebt ghespaert om my,

+ D

17

soe sal ick v ghebenedijden, ende v saet sal ick vermenichfuldighen, als die sterren des hemels, ende ghelijck het sant datter es aenden oeuer der zee, V saet sal besitten die poorten zijnder vianden,

18

ende alle dat volck der aerden sal ghebenedijt worden in v saet, om dat ghy mijnder stemmen hebt ghehoorsaem gheweest.

19

Abraham es weder ghekeert tot sijnen knechten, ende sij sijn tsamen ghegaen tot Bersabee, ende hy heeft daer ghewoont.

20

Nae dat dese dinghen gheschiedt waren, soe es Abrahammen ghebootschapt hoe dat Melcha oeck hadde kinderen ghebaert sijnen broeder Nachor,

21

Hus den iersten gheborenen, ende Bus sijnen broeder, ende Camuel den vader van die van Syrien,

22

ende Cased, ende Azau, Pheldas, oec, ende Iedlaph,

23

ende Bathuel, daer af dat gheboren es Rebecca, Dese achte heeft Melcha ghebaert Nachor Abrahams broedere,

24

Maer sijn concubine ghenaemt Roma, die heeft hem ghebaert Thabee, ende Gaham, ende Thaas, ende Maacha.