Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde die Heere heeft Sara besocht, ghelijck hy haer beloeft hadde, ende volbracht dat hy gheseyt hadde,

+ A

2

ende sij heeft ontfanghen ende ghebaert eenen sone in haeren ouderdom, ten tijde als Godt haer dat te voren gheseyt hadde,

3

Ende Abraham heeft den naem van sijnen sone die hem Sara voertbrocht hadde ghenoemt Isaac,

4

ende hi heeft hem besneden opden achtsten dach, also hem Godt gheboden hadde,

5

doen hy hondert iaren out was, want in desen ouderdom des vaders es Isaac geboren.

6

Ende Sara heeft gheseyt, Een lachen heeft my Godt ghemaect, ende so wie dat hoort, die sal met my lachen,

7

ende noch heeft sij gheseyt, Wie salt Abraham gheloouen, als hi sal hooren dat Sara eenen sone sooghet, den welcken sij hem ghebaert heeft nv out sijnde?

8

⁺Dus es het kint opghewassen, ende tes ghespeent, ende Abraham heeft eenen grooten maeltijt ghehouden opden dach van sijnder speeninghen.

+ B

9

Ende als Sara den sone van Agar der egiptenerssen heeft sien spelen met haren sone Isaac, soe heeft sij gheseyt tot Abraham,

10

Worpt wt dese dienstvrouwe met haren sone, want der dienstvrouwen sone en sal

[p. *55]

gheen erfghenaem wesen met mijnen sone Isaac,

11

Dat heeft Abraham seer hardelijc ghenomen om sijnen sone.

12

Tot wien Godt heeft gheseyt, En laet v niet duncken dat dit scherp es, ouer uwen sone, ende ouer v dienstvrouwe. In alles dat v Sara seyt, verhoort haer woorden, want doer Isaac sal v saet vernaemt worden,

13

maer der dienstvrouwen sone sal ik oeck maken tot een groot volck, om dat v saet es.

14

Hierom is Abraham vroech opghestaen, ende nam broot ende een leren flessche waters, ende heeft dat gheleyt op haer scouderen, ende hy heeft haer dat kint ghegheuen, ende alsoe heeft hy haer doen wech gaen, Ende als sij wech ghegaen was, soe doelde sy in die woestijne van Bersabee.

15

Als dan het water der leren flesschen al wt was, soe heeft sij dat kint van haer gheworpen, onder eenen boom die daer was,

16

Ende sij es wech ghegaen, ende es daer teghen ouer gheseten, soe verre van daer als eenen boghe schieten mach, want sij seyde, Ic en sal dat kint niet sien steruen, ende teghen ouer sittende, heeft sij haer stemme opghehauen, ende gheweent.

17

⁺Ende Godt heeft verhoort die stemme des kints, ende die Enghel Godts heeft Agar wten hemel gheroepen segghende, Wat maecti Agar? En wilt niet vreesen, want Godt heeft die stemme des kints verhoort, vander plaetsen daert es,

+ C

18

Staet op, en haelt dat kint, en houdet zijn hant, want ick sal dat maken tot een groot volck,

19

Ende Godt heeft haer ooghen openghedaen, ende siende eenen water put, is sij derwaerts ghegaen, ende heeft haer leren flessche gheuult ende heeft den kinde te drincken ghegheuen.

20

Ende Godt heeft met hem gheweest, die welcke es opghewassen, ende heeft ghewoont in die woestijne, ende het es een ionc scutter gheworden.

21

Ende hy heeft ghewoont in die woestijne tot Pharan, ende sijn moeder heeft hem een huysvrouwe ghenomen wten lande van Egypten.

22

Opden seluen tijt soe seyden Abimelech, ende Phicol die prince van sijnen heyr, tot Abraham, God es met v in alles dat ghy doet,

23

Sweert my dan by Gode, dat ghy my, noch mijnen nacomelinghen ende mijnen gheslachte gheen hinder en sult doen, maer dat ghy my ende desen lande daer ghi als een vremdelicnk in verkeert hebt, sult doen, nae die bermherticheyt die ic v ghedaen hebbe.

24

Ende Abraham heeft gheseyt, Ic salt sweeren.

25

Ende hy heeft Abimelech ghestraft, om den water put, den welcken sijn knechten met ghewelt hadden ontnomen,

26

Ende Abimelech heeft gheantwoert, ⁺Ic en hebs niet gheweten wie dat dit ghedaen heeft, ende ghy en hebbes my oec niet te kennen ghegheuen, ende ic en hebs niet ghehoort voer desen dach.

+ D

27

Dus soe heeft Abraham ghehaelt schapen ende ossen, ende heeftse Abimelech ghegheuen, ende sij hebben beyde tsamen een vast verbont ghemaect,

28

Ende Abraham heeft op een sijde ghestelt seuen oylammeren wt die cudden,

29

Tot wien Abimelech heeft gheseyt, Wat beduyden dese seuen oylammeren, die ghy daer besijden hebt doen stellen?

30

Ende hy seyde, dese seuen oylammeren suldi nemen van mijnder hant, om dat sij my moghen wesen tot een ghetuyghenisse, dat ic desen put ghegrauen hebbe,

31

Daerom es die stede genoemt Bersabee, want daer hebben sij beyde ghesworen,

32

ende sij hebben een verbont ghemaect, om den put des eedts.

33

Doen es Abimelech ende Phicol die prince sijns heyrs opghestaen, ende sij sijn weder ghekeert int lant vanden Palestijnen, Maer Abraham heeft een bosschagie gheplant te Bersabee, ende daer aengheroepen den naem van den eewighen Heere Godt.

34

Ende hy es een wtlander gheweest int lant vanden Palestijnen eenen langhen tijt.

[afbeelding]