Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde Abraham is van daer ghereyst nae dat zuyden lant, ende heeft ghewoont tusschen Cades ende Sur, ende hi es een vreemdelinck gheworden te Geraris,

+ A

2

Ende hy heeft geseyt van Sara sijnder huysvrouwen, Tis mijn suster, Dus heeft Abimelech die coninc van Gerara ghesonden, ende haer doen halen.

3

Maer Godt es tot Abimelech comen, doer eenen droom des nachts, ende heeft tot hem gheseyt, Siet, ghy sult steruen om die vrouwe die ghi ghenomen hebt, want sij heeft eenen man,

4

maer Abimelech en hadde haer niet aenghetast, ende hy seyde, Heere suldi dan een onwetende ende rechtuerdich volc dooden?

5

En heeft hy my niet gheseyt, het es mijn suster, en heeft sij oec niet geseyt, het es mijn broeder? Ic heb dit ghedaen met simpelder herten, ende met suyuerheyt mijnder handen,

6

⁺Ende Godt heeft tot hem gheseyt, Ic weet oec wel dat ghy dat met simpelder herten ghedaen hebt, ende daer om heb ic v behoedt dat ghy teghen my niet en soudt sondighen, ende ic en hebs niet toegelaten dat ghy haer ghenaken soudt,

+ B

7

Nv dan soe gheeft die huysvrouwe haren man wederom, want hy een Propheet es, ende hy sal voer v bidden, dat ghy sult moghen te leuen blijuen, maer eest sake dat ghy hem die niet weder gheuen en wilt soe weet dat ghy die doot steruen sult, ende alle dat uwe is.

8

Ende terstont Abimelech opstaende inder nacht, heeft alle sijn dienaers gheroepen, ende heeft alle dese woerden ghesproken in hen ooren, ende alle die mans hebben seer gheureest,

9

Maer Abimelech heeft Abraham oeck gheroepen, ende hem gheseyt, Wat hebdi ons ghedaen? wat hebben wij teghen v ghesondicht, dat ghy op my ende op mijn rijck een soe grooten sonde hebt ghebrocht? ghy hebt ons ghedaen dat ghy niet en behoorde te doen,

10

⁺Ende wederom vereyschende heeft hy noch gheseyt, Wat hebdi versien, dat ghy dit hebt ghedaen?

+ C

11

Ende Abraham heeft gheantwoerdt, Ick dachte in my seluen, segghende, By auontueren en es op dese plaetse die vreese Godts niet, ende sij sullen my dootslaen om mijnder huysvrouwen wille,

12

maer anders soe es sij oec warachtelijck mijn suster, een dochter mijns vaders, maer niet mijns moeders dochter, ende ick hebse tot eender huysvrouwen ghenomen,

13

Maer nae dien dat my Godt geleyt heeft wt mijns vaders huys, soe heb ic tot haer geseyt, Dese bermherticheyt suldi my bewijsen, in allen plaetsen daer wi sullen comen, suldi segghen dat ic v broeder ben.

14

⁺Dus heeft Abimelech ghenomen scapen ende ossen, ende knechten, ende dienstvrouwen, ende heeft die Abraham ghegheuen, ende heeft hem Sara sijn huysvouwe wederghegheuen,

+ D

15

ende gheseyt, Het lant es voer v, waer dat v belieft daer maeckt v wooninghe,

16

Ende tot Sara heeft hy oeck gheseyt, Siet ick heb uwen broeder duysent silueren penninghen ghegheuen, dat sal v wesen tot een decsel uwer ooghen, voer alle die met v sijn, ende waer dat ghy reyst, weest ghedachtich dat ghy beuonden sijt gheweest.

17

Ende als Abraham biddende was, soe heeft Godt ghenesen Abimelech ende sijn huysvrouwe ende sijn dienstvrouwen, ende sij hebben ghebaert,

18

want Godt hadde besloten alle die vrouwen lichamen des huysghesins van Abimelech om Sara Abrahams wijfs wille.