Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde die twee enghelen sijn te Sodoma gecomen des auonts, doen Lot sadt in die poerte der stadt, Ende als hy die sach, soe es hy hen te ghemoete gheghaen, ende hy aenbadt seer neder ter aerden,

+ A

2

ende seyde, Ick bidde v heeren, wilt v vernederen te comen ten huyse van uwen dienaer, ende daer blijuen, Wasschet v voeten, ende morghen vroech soe suldi voerts reysen uwen wech, Sij seyden, Gheensins, maer wi sullen op die strate blijuen,

3

Maer hy dwancse seere, dat sij te sijnent souden comen, ende als sy in sijn huys waren gheghaen, soe heeft hi eenen maeltijt bereyt, en hi heeft onghedeesemt broot ghebacken ende sij hebben gheten.

4

Maer eer sij slapen ghinghen, soe hebben die mannen vander stadt dat huys omleyt, vanden ioncsten totten outsten, allet volck te samen,

5

Ende sij riepen Lot ende seyden tot hem, Waer sijn die mans die desen nacht tot v comen sijn? brenctse hier buyten wt, op dat wi die moghen bekennen.

6

⁺Ende Lot es tot hemlieden wtghecomen, ende sluytende die doere achter hem, heeft gheseyt,

+ B

7

Mijn broeders en wilt (dat bidde ic v) en wilt dit quaet niet doen,

8

Ick hebbe twee dochteren, die noch gheenen man bekent en hebben die sal ick tot v hier buyten brenghen, ende misbruyct dese alsoe v dat belieft, behouwelijcken dat ghy desen mannen gheen quaet en doet, want sij sijn incomen onder die schaduwe mijns dacs.

9

Maer sij seyden, Gaet henen van hier, Ende wederom seyden sij, Ghy sijt hier inne comen als een vreemdelinck, wildi nv ons rechter wesen? Dus sullen wi v meerder lijden aendoen dan desen mannen. Ende sij deden hem seer crachtelijck ghewelt aen, ende het wasser al seer by dat sij die dore souden open ghebroken hebben.

10

Ende siet die mannen reycten wt haer hant ende sij brachten Lot binnen by hemlieden, ende sij sloten die doere,

11

en sij sloeghen met blentheyt alle die daer buyten waren vanden minsten totten meesten, alsoe dat sij die doere niet vinden en mochten.

12

⁺Ende sij seyden tot Lot, Hebdi hier yemant die v aengaet? te weten eenighen behouden sone, oft eenighe sonen oft dochteren, alle die v toebehooren, leyt wt deser stadt,

+ C

13

want wij sullen dese plaetse te niet doen, om dat haeren roep te groot gheworden es voer den Heere, die ons ghesonden heeft dat wi die souden te niet doen.

14

Aldus es Lot wtghegaen, ende heeft sijn behoude sonen aenghesproken, die sijn dochters trouwen souden, ende hy seyde, Staet op ende gaet wt deser plaetsen, want die Heere sal dese stadt te niet doen, Ende hen lieden dochte dat hy in boerden sprack.

15

Alst nv vroech morghen was, soe dwonghen hem die enghelen segghende, Staet op ende neempt v huysvrouwe, ende uwe twee dochteren die ghi hebt, op dat ghy oec niet mede en vergaet in die boosheyt van der stadt.

16

Ende doen hy dat noch niet en achte, soe namen sij sijn hant, ende die hant van sijnder huysvrouwen, ende van sijnen twee dochteren, om dat Godt hem sparen wilde,

17

ende sij leyden hem wt, ende stelden hem buyten der stadt, Ende aldaer spraken sij tot hem segghende, ⁺Bewaert v ziele, en wilt achter rugghe niet ommesien, noch en staet niet in alle dlant hier omtrent, maer behoudt v op den berch, op dat ghy oec tsamen niet en vergaet.

+ D

18

Ende Lot seyde tot hem, Ic bidde v mijn Heere,

19

want v dienaer gratie by v gheuonden heeft, ende ghy v bermherticheyt hebt groot ghemaeckt die ghy met my ghedaen hebt, om dat ghy mijn ziele soudt behouden, Ende ic en mach niet behouden worden op den berch, want my mocht by auontueren eenich quaet ouercomen, alsoe dat icker af storue.

20

Hier by es een cleyn stadt, daer ic toe vlieden mach, ende in haer behouden worden, En es sij niet cleyne op dat mijn ziele daer mach te leuen blijuen?

21

Ende hi heeft tot hem gheseyt, Siet in desen heb ic v ghebedt oec ontfanghen, dat ic die stadt niet en sal verderuen, daer ghi voer ghesproken hebt,

22

⁺Haest v ende behoudt v aldaer, want ic en sal niet moghen doen, voer dat ghy daer binnen comen sijt. Daer om soe es die stadt ghenoemt Zegor,

+ E

23

Die sonne es opgheghaen op der eerden, ende Lot es gheghaen binnen Zegor.

24

Aldus heeft die Heere op Sodoma ende Gomorrha ghereghent solfer ende vier vanden Heere

[p. *54]

wten hemel,

25

ende hy heeft dese steden omgheworpen ende alle dat lant daer omtrent, alle die inwoonders der steden, ende alle dat opder aerden groeyende was,

26

Ende sijn huysvrouwe achterwaerts omsiende, es verkeert in een soutsteens beelde.

27

§ Maer Abraham vroech opstaende ter plaetsen daer hy te voren metten Heere gestaen hadde,

28

heeft aensien Sodomam ende Gomorrham, ende alle dat lant daer omtrent ligghende, ende hy heeft die voncken vander aerden sien opgaen, als den roock van eenen ouen,

29

Want als die Heere verdorf die steden van dien lantschappe, soe heeft hy Abrahams ghedachtich gheweest, ende heeft Lot verlost wt die verderffenisse der steden, daer hy inne ghewoont hadde.

30

§ ⁺Ende Lot es opwaerts ghereyst van Segor, ende heeft sijn wooninghe genomen inden berch, ende sijn twee dochters oec met hem, want hy vreesde tot Segor te blijuen, ende hy woonde in een speluncke, ende sijn twee dochteren met hem.

+ F

31

Ende die outste dochter seyde totter ioncster, ons vader es out, ende daer en es gheen man ouerbleuen op die aerde, die hem soude moghen met ons versamen, nae die ghewoonte alder landen,

32

Coemt, laet ons hem met wijne droncken maken, ende laet ons by hem slapen, op dat wij moghen saet behouden van onsen vader.

33

Dus soe hebben sij haren vader wijn te drincken ghegheuen dien nacht, Ende die outste es inghecomen, ende heeft by haren vader gheslapen, maer hy en voeldes niet wanneer sijn dochter haer by hem leyde, noch wanneer sij opstont.

34

⁺Des anderen daechs seyde die outste totter ioncster, Siet, ic heb ghisteren by mijnen vader gheslapen, laet ons hem noch wijn te drincken gheuen, oec desen nacht, ende dan suldi by hem slapen, op dat wi moghen saet behouden van onsen vader,

+ G

35

Ende sij hebben oeck dien nacht haren vader wijn te drincken gegheuen, ende die ioncste dochter es binnen comen, ende heeft by hem gheslapen, ende doen en voelde hys noch niet wanneer sij haer by hem leyde, oft wanneer sij opstont.

36

§ Aldus hebben Lots twee dochteren ontfanghen van haren vader,

37

ende die outste baerde eenen sone, ende sij noemde hem Moab, hy es die vader der Moabijten, tot desen dach toe.

38

Ende die ioncste baerde oeck eenen sone, ende sij noemde hem Ammon, dat es te segghen, een sone mijns volcs, dese es die vader vanden Ammoniten tot op desen dach.