Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde die Heere openbaerde hem in dat dal van Mambre als hy sadt in die dore sijnder tenten, in dat heetste vanden daghe,

+ A

2

Ende als hy sijn ooghen ophief, soe openbaerden hem drij mannen staende by hem, Ende als hy die ghesien hadde soe liep hy hen te ghemoete, van die dore sijnder tabernakelen, ende hy aenbadt neder ter eerden waert,

3

ende [afbeelding] hy seyde, O Heere heb ick ghenade vonden voor v ooghen, soe en wilt uwen dienaer niet voerby gaen

4

maer laet my halen een luttel waters, op dat v voeten ghewasschen worden, ende rust onder den boom,

5

Ende ic sal v een montvol broots voersetten, op dat v herte versterct worde, ende daer nae suldi voerts doergaen want daerom sijdi ter sijden afghegaen tot uwen dienaer, Die welcke seyden, Doet alsoe ghy gheseyt hebt.

6

Ende Abraham es haestelick ghegaen in die tente tot Sara, ende heeft tot haer gheseyt, Haest u, ende beslaet drij maten bloeme vanden mele, ende maect assche coeken,

7

Ende hi liep tot dat groote vee, ende haelde van daer een seer teer calf vanden besten, ende hy gaeft sijnen knecht, die welcke dat haestelijck heeft ghecoect,

8

Ende hi haelde oeck boter ende melck, ende dat calf welck hi ghecoect hadde, ende hi stelde hen dat vore, maer hy stont voor hemlieden onder den boom.

9

§ ⁺Ende als si ghegeten hadden, soe seyden sij tot hem, Waer es Sara v huysvrouwe? Hy antwoorde, Siet sij es binnen in dat tabernakel

+ B

10

Doen seyde hi tot hem, Ick sal wederom keerende tot v comen te deser tijt (es men leuende) ende dan sal Sara v huysvrouwe eenen soon hebben, Ende als Sara dit hoorde soe loech si achter die dore vander tabernakel.

11

Ende si waren beyde oudt, ende van veel ouderdoms, Ende Sara en gheschieden niet meer der vrouwen stonden,

12

die welcke al heymelijc lachte, segghende. Sal ick my ter wellusticheyt gheuen na dat ick oudt ben gheworden, ende mijn heere oeck een oudt man es?

13

Ende die Heere heeft gheseyt tot Abraham, Waerom heeft Sara ghelachen segghende. Sal ick inder waerheyt oeck baren die een oude vrouwe ben?

14

Meyndi dat Gode oeck iet swaer es? Dus soe sal ic weder tot v comen, op desen seluen tijt (es men leuende) ende dan sal Sara eenen sone hebben

15

Ende Sara heeft dat geloochent seggende wt vreesen verschrickt, Ick en heb niet ghelachen, Maer die Heere seyde. Ten es alsoe niet, maer ghy hebt ghelachen.

16

§ ⁺Als dan die mans van daer opghestaen waren, soe keerden sij hen ooghen teghen Sodoma, ende Abraham ghinc mede, doende hem gheleyde.

+ C

17

Ende die Heere heeft gheseyt, Sal ic oec moghen voer Abraham verborghen tghene dat ic doen sal,

18

aenghesien dat hy sal worden tot een groot ende seer machtich volck, ende dat doer hem alle die gheslachten des aertrijcs ghebenedijt worden sullen?

19

Want ick weet wel dat hy sijnen kinderen ende sijnen huyse nae hem beuelen sal, dat sij bewaren sullen den wech des Heeren, ende dat sij recht ordeel ende rechtuerdicheyt doen sullen op dat die Heere mach vol-

[p. *53]

bringhen om Abrahams wille, alle tghene dat hi tot hem geseyt heeeft.

20

Soe heeft die Heere dan gheseyt, Den roep der inwoonders van Zodoma ende Gomorrha es vermenichfuldicht, ende haer misdaet es bouen maten seer swaer gheworden,

21

Dus sal ick nederwaerts gaen ende besien, oft sij metten wercken oec volbrocht hebben, den roep welc tot my comen es, oft dat soe niet en es, op dat ict mach weten.

22

Ende soe zijn sij van daer omme ghekeert, ende wech ghegaen nae Zodoma. Ende Abraham stont al noch voer den Heere,

23

Ende naerder comende heeft hy gheseyt, Suldi oeck den rechtueerdighen met den boosen te niet doen?

24

Eest sake datter vijftich rechtueerdighe inder stadt sijn, sullen die oec mede verloren gaen? en suldi dier plaetsen niet sparen om vijftich rechtueerdighe, eest dat sij daer in sijn?

25

Verre moet dit van v wesen, dat ghi dat doen soudet, ende dat ghy den rechtuaerdighen soudt dootslaen metteu boosen, ende dat die rechtueerdighe soude wesen als die boose, dat en betaemt v alsoe niet te doene, die alle aertrijcke recht doet, ghy en sult gheensins dit vonnisse gheuen.

26

⁺Ende die Heere heeft gheseyt tot hem, Eest sake dat ick te Sodoma vijftich rechtueerdighe menschen vinden mach int midden der stadt, soe sal ict alle der plaetsen vergheuen, om haren willen.

+ D

27

Ende Abraham antwoerde, ende seyde, Aenghesien dat ick eens beghonst hebbe, soe sal ick spreken tot mijnen Heere, hoe wel ick stof ende asschen ben.

28

Ende ofter vijf min dan vijftich rechtueerdighe gheuonden worden, suldi dan die heel stadt bederuen om die vijf en veertich wille, Ende hy seyde, Ick en salse niet verderuen, eest dat ick daer vijf en veertich rechtueerdighe vinde.

29

Ende noch anderwerf heeft hi tot hem gheseyt, En ofter veertich gheuonden worden, wat suldi doen? Hy seyde, Ic en salse niet slaen, om die veertich.

30

Ic bidde v Heere (seyt hy) en willet niet onweerdelijck nemen, al eest dat ick spreke, En ofter dertich gheuonden worden? Ende hy antwoerde, Ic en salt niet doen, eest dat icker dertich vinden mach.

31

Aenghesien (seyt hy) dat ic eens heb begonst, soe sal ick spreken tot mijnen Heere. En ofter twintich gheuonden worde, wat suldi doen? Hy antwoerde, Ic en salse niet dootslaen, om der twintich wille.

32

Ick bidde v hertelijck o Heere (seyt hy) en wilt niet gram wesen al spreke ick noch eens, En ofter thien gheuonden worden? Ende hy seyde, Ick en salse niet verderuen om die thiene.

33

§ Ende die Heere es wech ghegaen nae dat hy ophiel met Abraham te spreken, ende Abraham keerde weder tot sijnder woonstede.