Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ALs hy dan begonste neghen ende neghentich iaren oudt te worden: soe heeft hem die Heere gheopenbaert, ende seyde tot hem. Ick ben die Heere almachtich: wandelt voor my, ende weest volmaect,

+ A

2

ende ick sal mijn verbont stellen tusschen my ende v, ende ick sal v vermenichfuldighen wter maten seer,

3

Abram viel pladt neder op sijn aensicht.

4

§ Ende Godt heeft tot hem gheseyt. Ick bent ende mijn verbont es met v, ende ghi sult wesen een vader van veelderhande volcks,

5

Ende uwen naem en sal voortaen niet meer genoemt wesen Abram, maer ghi sult ghenoemt worden Abraham, want ick heb v ghestelt een vader van veelderhande volck.

6

Ende ick sal v doen wassen wter maten seer sterckelijck, ende ick sal v stellen in veel volcks ende coninghen sullen wt v comen,

7

Ende ick sal mijn verbont vast maken tusschen my ende v, ende tusschen v saet nae v, in sinen generatien, met een eewige vasticheyt, alsoe dat ick v Godt sal sijn, ende ws saets na v,

8

ende ick sal v ende uwen sade

[p. *52]

dat lant uwer pelgrimagien gheuen, alle dat lant van Chanaan tot een eewighe besittinghe, ende ick sal haer Godt wesen.

9

§ ⁺Ende Godt heeft wederom tot Abraham geseyt, Ende daerom soe suldi oec mijn verbont onderhouden, ende v saet nae v, in sijnen gheslachten.

+ B

10

Dit es mijn verbont dat ghy onderhouden sult tusschen my ende v, ende v saet nae v. Alle mans persoon onder v, sal besneden worden,

11

ende ghy sult besnijden het vleesch van die voerhuyt ws manlijcks lets, op dattet mach wesen een teeken des verbonts tusschen my ende v.

12

Een kint van acht daghen sal besneden worden onder v lieden, alle mans persoonen in v gheslachten, soe wel die in v huys gheboren es, als die ghecocht es, sal besneden worden, ende oeck die van uwen gheslachte niet en es.

13

Ende mijn verbont sal in v vleesch wesen tot een eewich verbont.

14

Een mans persoon wiens vleesch van die voerhuyt sijnder manlijcheyt niet besneden en es, diens ziele sal wtghedaen worden wt sijnen volcke, om dat hy mijn verbont te niet ghedaen heeft.

15

§ ⁺Ende Godt heeft oeck tot Abraham gheseyt, Sarai v huysvrouwe en suldi niet meer noemen Sarai, maer Sara.

+ C

16

Ende ick sal haer ghebenedijden, ende van haer sal ic v eenen sone gheuen, den welcken ic sal ghebenedijden, ende hy sal worden in veel natien, ende coninghen van veelderhande volcs, sullen van hem gheboren worden.

17

Ende Abraham viel op sijn aensicht, ende heeft ghelachen in sijn herte, segghende, Meyndi dat eenen man van hondert iaren eenen sone geboren sal worden? ende dat Sara neghentich iaren out, baren sal?

18

Ende hy heeft tot hem gheseyt, Och oft Ismahel mocht leuen voer v

19

Ende Godt seyde tot Abraham, Sara v huysvrouwe sal v eenen sone baren, ende ghy sult sijnen naem noemen Isaac, ende ic sal mijn verbont met hem stellen tot een eewighe vasticheyt, ende met sijnen sade nae hem.

20

Van Ismahel heb ic v oeck verhoort, siet ic sal hem ghebenedijden, ende ic sal hem seer vermeerderen ende vermenichfuldighen, twaelf vorsten sal hy voertbrenghen, ende ic sal hem maken tot een groot volck.

21

Maer mijn verbont sal ic vast maken met Isaac den welcken v Sara baren sal op desen tijt tanderen iare.

22

§ ⁺Ende als die sprake des gheens die met hem sprack voleyndt was, soe ghinc Godt opwaerts van Abraham.

+ D

23

Ende Abraham nam Ismahel sijnen sone ende alle die knechten sijns huysghesins, die in sijn huys gheboren waren, ende alle die hy ghecocht hadde, ende alle dat manlijc was vanden mans sijns huysghesins, ende hy besneedt dat vleesch van die voerhuyt haerder manlijcheyt, terstont op den seluen dach, ghelijck hem Godt beuolen hadde.

24

Abraham was neghen ende neghentich iaren oud als hy besneedt dat vleesch van die voerhuyt sijnder manlijcheyt.

25

Ende Ismahel sijn sone hadde derthien iaren veruult, ten tijde van sijnder besnijdenissen.

26

Op eenen dach es Abraham besneden ende Ismahel sijn sone,

27

ende alle die mans sijns huysghesins, soe wel die daer by hem gheboren waren, als die ghecocht waren, ende oec die vremdelinghen sijn al te samen besneden.