Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ALdus en hadde Sarai Abrams huysvrouwe hem gheen kinderen gewonnen, maer sij hadde een dienstmaecht wt Egypten gheboren, Agar ghenaemt,

+ A

2

ende sij seyde tot haren man. Siet die Heere heeft my ghesloten, dat ic niet baren en mach gaet versaemt v met mijn ioncwijf, oft ick by auontueren van haer mocht kinderen crijghen. Ende als hy haer bede verhoort hadde,

3

so heeft sij ghenomen haer dienstmaghet Agar die Egyptenersse, nae dat sij thien iaren hadde ghewoont in dlant van Chanaan, ende sij heeftse haren man ghegeuen tot eender huysvrouwen,

4

Die welcke met haer versaemt es, Maer doen sij sach dat si ontfanghen hadde, heeft sij haer vrouwe versmaedt.

5

⁺Ende Sarai heeft gheseyt tot Abram, Ghi doet my onrecht, Ick heb mijn dienstmaghet in uwen schoot ghegheuen, die welcke siende dat sij ontfangen heeft versmaedt my die Heere sij een rechter tusschen my ende v,

+ B

6

Ende Abram heeft haer gheantwoort, Siet (seyt hy) v dienstwijf es in v hant, gebruyctse also v dat belieft.

Als Sarai dan haer castijde, soe es sij wech gheloopen,

7

ende als die Enghel des Heeren haer vonden hadde by die water fonteyne in die woestijne, die daer es op den wech van Sur in die wildernisse

8

soe heeft hy tot haer gheseyt, Agar dienstwijf van Sarai van waer coemdy? ende waer gaet ghi henen? ⁺die welcke heeft gheantwoort, Ick vliede van Sarai mijnder vrouwen aensichte,

+ C

9

Ende die Enghel des Heeren seyde tot haer, Keert weder tot uwer vrouwen, ende verootmoedicht v onder haer hant,

10

Ende noch seyt hi. Ic sal menichfuldichlijc vermenichfuldighen v saet, ende ten sal niet ghetelt moghen worden, om sijn groote menichfuldicheyt,

11

Ende voorts seyt hi. Siet ghi hebt ontfanghen ende sult baren eenen sone, ende ghi sult hem noemen Ismahel, om dat Godt v lijden verhoort heeft,

12

Dit sal een wilt mensch wesen, sijn hant sal wesen tegen een yeghelijcken, ende een yeghelijcs hant teghen hem, ende tsegen alle sijn broeders sal hi tenten stellen,

13

Ende sij heeft den naem des Heeren die tot haer sprack, ghenoemt Ghy Godt die my gesien hebt, ⁺Want sij heeft gheseyt. Voorwaer hier heb ick het achterste ghesien van hem die my siet,

+ D

14

Ende daerom soe noemde sij dien put, den put des leuenden die my siende was, die welck es tusschen Cades ende Barad.

15

§ Ende Agar baerde Abram eenen sone, ende hy noemde sijnen naem Ismahel,

16

Ses ende tachtentich iaren oudt was Abram als Agar hem baerde Ismahel.