Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ALs dese dingen aldus gheleden waren, soe es dat woert des Heeren tot Abram ghesciet doer een visioen seggende: En wilt niet vreesen Abram, ic ben v beschermer, ende uwen loon groot bouen maten.

+ A

2

Ende Abram heeft gheseyt, O Heere Godt wat suldi my gheuen? Ick sal wech gaen sonder kinderen, ende die sone van den besorger mijns huysghesins dese Damascus Eliezer.

3

Ende Abram heeft daer toe noch geseyt, Maer my en hebdi gheen saet ghegheuen, ende siet mijn knecht in mijn huys geboren, sal mijn erfghenaem wesen.

4

Ende terstont es dat woort des Heeren tot hem ghedaen segghende, Dese en sal v erfghenaem niet sijn, maer die wt uwen lichaem comen sal, dien suldi tot eenen erfghenaem hebben.

5

⁺Ende hy heeft hem buyten gheleyt, ende heeft tot hem geseyt, Aensiet opwaerts den hemel ende telt die sterren, eest v moghelick, ende hy seyde tot hem, Alsoe sal v saet wesen.

+ B

6

Abram heeft Gode ghelooft, ende het es hem gherekent tot rechtueerdicheyt.

7

§ Ende hij seyde tot hem, Ick ben die Heere die v gheleyt hebbe wt Vr der Chaldeen, om dat ic v dit lant gheuen soude, ende dat ghi dat besitten soudet.

8

Ende hy heeft gheseyt, O Heere Godt, waer wt mach ic dit weten, dat ic dit besitten sal?

9

Ende die Heere antwoorde ende seyde. Neemt voer my een drijiarighe koe, ende een drijiarige gheyte, ende eenen ram van dry iaren, ende een tortelduyue met een ander duyue,

10

⁺Ende hy dese alle nemende heeftse ghedeylt ouermidts, ende hij leyde beyde die deelen deen teghen dandere, maer die voghelen en heeft hi niet ghedeylt.

+ C

11

Ende die voghelen sijn nederghedaelt op die doode beesten, ende Abraham iaechdese daer af.

12

Ende als die sonne onder gheghaen was, soe heeft eenen grooten vaeck Abram oueruallen, ende eenen grooten duysteren grouwel heeft hem beuanghen.

13

Ende daer es tot hem gheseyt, Weet van te vooren bekennende dat v saet sal vreemdelinc wesen, in een lant dat zijn niet wesen en sal, ende sij sullen hen tonderbrenghen tot slauernije, ende sij sullense swaerlijck quellen vierhondert iaren,

14

Maer nochtans ic sal recht doen, ouer het volc dien sij dienen sullen, ende daer nae sullen sij wt trecken met grooter substantien,

15

maer ghy sult varen tot uwen vaders in vreden, ende sult begrauen worden in goeden ouderdom.

16

⁺Ende ten vierden gheslachte sullen sij hier wederkeeren, want die boosheden der Amorreen en sijn nv noch niet volbrocht.

+ D

17

Als dan die sonne onderghegaen was, soe esser een seer doncker duysternisse ghecomen, ende daer es vertoont eenen rookenden ouen, ende een bernende lampe, doerghaende tusschen die deelen.

18

§ Op dien dach maecte die Heere een verbont met Abram seggende, Vwen sade sal ic dit lant geuen, vanden vloet van Egypten, totten grooten vloet Euphrates,

19

die Cineen ende Seneseen, die Cethmoneen

20

ende Hetheen ende Phereseen, Raphaym oeck

21

metten Amorrheen, ende Chananeen ende Gergeseen ende Iebuseen.