Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺MAer het es geschiedt in dien tijden, dat Amraphel die coninc van Sennaar, ende Arioch die coninc van Ponti, ende Chodorlahomor die coninc vanden Elamiters, ende Thadal die coninc der heydenen,

+ A

2

aennamen een oorloghe tsegen Baraden coninc van Sodoma, ende teghen Bersa den coninck van Gomorrha, ende teghen Senaab den coninck van Adama, ende teghen Semeber den coninck van Seboim, ende tseghen den coninck van Bale welck es Segor.

3

Alle dese quamen te samen in dat wilde dal, welck nv es die sout zee,

4

Want sij hadden twaelf iaren Chodorlahomor ghedient, ende ten derthiensten iare scheydden sij van hem.

5

Aldus dan soe es Chodorlahomor, in dat veerthienste iaer ghecomen ende die coninghen die met hem waren, ende sij hebben gheslaghen Raphaim tot Astaroth ende Carnaim, ende Suzim met haer, ende Emim tot Saue Cariathaim,

6

ende die Chorryten int gheberchte van Seyr, tot dat plat lant van Pharan, welck es in die woestine.

7

Ende sij sijn wederghekeert, ende sijn ghecomen tot die fonteyne van Misphat, welck es Cades, ende sij hebben gheslaghen alle dat lant vanden Amalechiten, ende vanden Amorrijteu, die daer woonden tot Asason thamar.

8

⁺Ende die coninck van Sodoma, ende die coninck van Gomorrha, ende die coninck van Adama, ende die coninck van Seboim, ende oeck die coninck van Bala welck es Segor, sijn wtghetrocken ende hebben haer heyr ghestelt teghen hen int wilde dal,

+ B

9

te weten tseghen Chodorlahomor den conick vanden Elamiten, ende Thadal den Coninck der heydenen, ende Amraphel den coninck van Sennaar, ende Arioch den coninc van Ponti, vier coningen tseghen vijue.

10

Ende dat wilde dal hadde veel lijm putten. Maer die coninc van Sodoma, ende die coninck van Gomorrha hebben den rugghe ghekeert, ende hebben daer die nederlaghe ghehadt, ende die daer ouerbleuen waren, zijn ghevloden nae tgheberchte.

11

Ende sij hebben ghenomen alle die substancie vanden Sodomijters ende Gomorrijters ende alle dat der spijsen aengaet, ende sijn wech ghetrocken.

12

Ende sij namen oec met hem Lot Abrams broeders sone, ende sijn substantie die daer woende te Sodoma.

13

§ ⁺Ende siet, een diet ontloopen was heeft dit te kennen ghegheuen Abram den hebreeusschen die daer woonde in die dellinghe van Mambre des Amorrhijters, die een broeder was van Eschol, ende een broeder van Aner, want dese hadden een verbont ghemaect met Abram.

+ C

14

Als Abram dit ghehoort hadde, te weten dat Lot sijn broeder gheuanghen was, soe heeft hy ghetelt rassche dienstknechten sijns eyghen huysghesins, drijhondert ende achtien, ende hy heeftse vervolcht tot Dan toe.

15

Ende deylende sijn gesellen heeft hi die oueruallen des nachts, ende hy heeftse geslagen, ende heeft se vervolcht tot Hoba toe ende tot Phenicen, welc es ter slinker sijden van Damascus.

16

Ende hi heeft wederbrocht alle die substantie, ende Lot sijnen broeder, met sijnder substancien, ende die vrouwen metten volcke.

17

§ Ende die coninck van Sodoma es hem te ghemoete gheghaen, nae dat hy comen was wt den slaghe van Chodorlahomor, ende der coningen die met hem waren int dal van saue, welck es des conincks dal.

18

§ ⁺Maer Melchisedec die coninck van Salem, voertbrengende broot ende wijn (want hy was een Priester vanden alderoppersten Godt)

+ D

19

heeft hem ghebenedijt ende gheseyt, Ghebenedijt es Abram den hooghen Godt, die hemel ende aertrijck geschapen heeft,

20

ende ghebenedijt es den hooghen Godt, doer wiens beschermen die vianden in uwen handen sijn. Ende hy heeft hem thienden van alles ghegheuen.

21

§ Maer die coninc van Sodoma seyde tot Abram, gheeft my die sielen, ende alle dandere neemt voer v.

22

Die welcke hem antwoerde, Ick hef mijn hant op tot den hooghen Heere Godt, besitter van hemel ende aerde

23

dat ic vanden draet des ondercleets tot den riem der schoenriemen niet nemen en sal

[p. *51]

van alle dat v is, op dat ghy niet en segghet, Ic heb Abram rijck ghemaect,

24

wtgenomen tghene dat die ionghelinghen verteert hebben, ende die deelen der mans die met my gheweest hebben, te weten Aner, Eschol, ende Mambre, dese sullen haer deelen nemen.