Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺HIer om es Abram opgetrocken wt Egypten hy ende sijn huysvrouwe, ende al dat hi hadde ende Lot met hem nae die suytsijde.

+ A

2

Ende Abram was seer rijck, int besitten van goudt ende siluer,

3

ende es wederghekeert doer den wech daer hy doer comen was vanden middach te Bethel, totter plaetsen daer hy te voren sijn tente ghestelt hadde, tusschen Bethel ende Hai,

4

ter plaetsen vanden outaer die hi te voren hadde ghemaect, ende heeft daer aengheroepen den naem des Heeren.

5

⁺Ende Lot die met Abram was, hadde oec cudden van schapen, ende groot vee, ende tabernakelen.

+ B

6

Ende dlant en mocht hen niet houden, dat sij souden tsamen woonen, want hen substantie was seer vele, ende sij en mochten niet tsamen woonen.

7

Waer om dat oeck eenen twist es opghestaen tusschen die herders van Abrams cudden ende Lots cudden, In dien tijden woonde die Cananeus ende Phereseus in dat lant,

8

Dus soe heeft Abram geseyt tot Lot, Ic bidde v, en laet geenen twist wesen tusschen my ende v, ende tusschen mijn herders, ende uwe herders, want wij sijn broeders,

9

Siet alle het lant es voer v, scheyt van mi dat bidde ic v, eest dat ghy gaet ter slincker sijden, soe sal ic die rechte sijde behouden, ende eest dat ghi die rechte sijde kiesen wilt, soe sal ic ter slincker sijden trecken.

10

⁺Loth dan opheffende sijn oogen, heeft aengesien alle dlant omtrent der Iordanen, welc heel worde ghewatert (eer die Heer Sodomam ende Gomorram verdorf) gelijc het paradijs des Heeren, ende gelijc dlant van Egypten, alsmen coempt tot Segor.

+ C

11

Ende Lot heeft voer hem gecosen het lant omtrent der Iordanen, ende hy es gesceyden vanden oosten, ende also sijn si deen broeder vanden anderen ghescheyden,

12

Abram heeft ghewoont int lant van Chanaan, maer Lot heeft gewoont in die steden die omtrent der Iordanen waren, ende heeft sijn woninge gestelt te Sodoma.

13

Maer die luyden van Sodoma waren die quaetse, ende bouen maten groote sondaers voer den Heere.

14

Ende die Heere heeft geseyt tot Abram, nae dat Lot van hem ghescheyden was, Heft op v ooghen recht wt voer v, ende siet vander plaetsen daer ghi nv in sijt, noertwaerts en suytwaerts, oostwaerts, ende westwaerts,

15

Alle dlant dat ghy siet, sal ic v gheuen ende uwen sade tot inder eewicheyt.

16

⁺Ende ic sal v saet maken als dat stof der eerden, Esser eenich mensch die ghetellen can dat stof der eerden, die sal oock v saet moghen tellen.

+ D

17

Daerom staet op, ende doerwandelt dlant, in sijn lingde ende breydde, want ic sal v dat gheuen.

18

Dus heeft Abram vervoert sijn tabernakel, ende es ghecomen, ende heeft ghewoont by die dellinge van Mambre, welck es tot Hebron, ende aldaer heeft hy den Heere eenen outaer ghesticht.