Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde die Heere heeft gheseyt tot Abram. Gaet wt uwen lande ende uwen maechschap ende wt ws vaders huys, ende coemt in een lant dat ick v toonen sal.

+ A

2

Ende ic sal v maken tot een groot volck, ende ick sal v ghebenedijden, ende uwen naem groot maken, ende ghi sult ghebenedijt sijn,

3

Ende die v ghebenediden, die sal ic ghebenediden, ende ic sal vermalediden die v vermaledijden, Ende in v sullen alle die gheslachten der eerden ghebenedijt worden.

4

§ Aldus es Abram wtghegaen ghelijck hem die Heere beuolen hadde, ende Loth es met hem ghegaen, Abram was vijf ende tseuentich iaeren oudt, doen hi wt Haran ghinck.

5

⁺Ende hi nam Sarai sijn huysvrouwe ende Loth sijns broeders sone, ende alle haer substantie, welc si beseten hadden, ende die sielen die sij ghemaect hadden te Haran ende sij sijn wtgegaen om te reysen in dlant van Chanaan.

+ B

6

Ende als sij daer comen waren soe heeft Abram het dlant doorgaen, tot die plaetse van Sichem, ende tot dat seer vermaert dal, In dien tijden soe woonden die Chananiten in dat lant.

7

§ Ende die Heere heeft Abram gheopenbaert, ende tot hem gheseyt. Dit lant sal ic uwen sade gheuen, Ende hy stichte aldaer eenen outaer den Heere, die hem gheopenbaert hadde.

8

Ende van daer es hy ouer gereyst nae den berch die daer was teghen die Oostsijde van Bethel, aldaer sloech hi sijn tente, hebbende Bethel ten Westen, ende Hai ten Oosten, Ende hy heeft daer ooc den Heere eenen outaer ghesticht ende heeft sijnen naem aengheroepen,

9

Ende Abram es ghereyst gaende, ende voorts treckende na den suyden.

10

§ ⁺Maer daer es eenen dieren tijt opghestaen int lant, Ende Abram es nederwaerts ghereyst nae Egypten dat hy daer soude een vreemdelinck wesen, want den dieren tijt hadde die ouerhant int lant gecreghen.

+ C

11

Ende als hy soe nae by Egypten was, dat hy daer in comen soude, soe heeft hy gheseyt tot Sarai sijn huysvrouwe, Ic weet wel dat ghy een schoon vrouwe sijt,

12

ende dat die egyptenaers (als sij v sullen sien) segghen sullen, Dit es sijn huysvrouwe, ende dan sullen sij my dooden ende v behouden,

13

Daer om bid ick v) segt dat ghy mijn suster sijt, op dat my wel gheschiede om uwen wille, ende dat mijn ziele mach leuende blijuen, ter gratien van v.

14

§ Als dan Abram in Egypten comen was, soe hebben die egyptenaers die vrouwe ghesien dat sij schoon was bouen maten,

15

Ende die princen hebben dat Pharao ghebootschapt, ende sij hebben haer seer ghepresen voer hem, ende die vrouwe es opghenomen ende ghebracht int huys van Pharao,

16

Ende sij deden Abram wel om haren wille. ⁺Ende hy heeft ghehadt schapen ende ossen, ezelen ende knechten, dienstvrouwen, ende ezelinnen ende kemels.

+ D

17

§ Maer die Heere heeft Pharao ende sijnen huys gheslaghen met die alder grootste plaghen, om Sarai Abrams wijfs wille.

18

Ende Pharao heeft Abram gheroepen ende heeft tot hem gheseyt, Wat es dit dat ghy my ghedaen hebt? Waerom en hebdi my niet te kennen ghegheuen, dat sij v huisvrouwe was?

19

By wat saken hebdi gheseyt dat sij v suster was? om dat ick haer my tot een huysvrouwe soude nemen. Nv dan siet, daer es v huysvrouwe, neemptse ende gaet wech.

20

Ende Pharao heeft

[p. *50]

sinen mannen beuolen van Abram, ende sij hebben hem ende sijn huysvrouwe ende alle dat hy hadde wtgeleyt.