Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺MAer het lant was al van eender talen ende van eender spraken.

+ A

2

Ende doen sij vanden Oosten vertrocken, soe hebben sij een velt vonden, int lant van Sennaar, ende sij hebben daer ghewoont,

3

Ende die een seyde totten anderen sijnen naesten, Coemt laet ons steenen van eerde maken, ende die metten viere backen, Aldus hebben sij die ghebacken eerde voor harde steenen ghehadt, ende lijm voor moortel,

4

ende si hebben geseyt, Coemt laet ons een stadt maken ende eenen torre, wiens hoochde den hemel raken mach, ende laet ons onsen naem vermaert maken, eer dat wi van malcander verscheyden worden, in alle die landen,

5

Doen es die Heere neder ghecomen dat hy die stadt ende dien torre sien

[p. *49]

soude, welck Adams kinderen maecten,

6

ende hy seyde, ⁺Siet het es al een volck ende sij sijn al van eender talen, ende sij hebben dit begonst te maken, ende sij en sullen niet ophouden van haren ghedachten tot dat sij die metten wercken volbracht hebben,

+ B

7

Hier om coemt, ende laet ons nederwaerts gaen ende laet ons daer haer sprake verwerren, alsoe dat een yeghelijck sijns naesten stemme niet en hoore,

8

Ende alsoe heeftse die Heere ghesceyden van dier plaetsen, in allen landen, ende sij hebben opghehouden te timmeren die stadt,

9

ende daer om es die naem van haer ghenoemt Babel, om dat die sprake van allen lantscappen daer verwerret es, ende van daer heeftse die Heere verstroyt ouer daenschijn van allen landen.

10

Dit sijn die afcoemsten van Sem,

Sem was hondert iaren oudt, als hy Arphaxad ghewonnen heeft, twee iaren nae den oueruloet,

11

ende Sem leefde vijfhondert iaren nae dat hy Arphaxad ghewonnen hadde, ende hy heeft ghewonnen sonen ende dochteren.

12

Voerts soe heeft Arphaxad geleeft vijf en dertich iaren, ende heeft ghewonnen Sale,

13

ende nae dat hy Sale ghewonnen hadde soe heeft Arphaxad geleeft drijhondert ende drij iaren, ende wan sonen ende dochteren.

14

⁺Ende Sale leefde oeck dertich iaren, ende hy heeft ghewonnen Heber,

+ C

15

ende Sale heeft gheleeft nae dat hy Heber ghewonnen hadde, vierhondert ende drij iaren, ende wan sonen ende dochteren.

16

Maer Heber leefde vierendertich iaren, ende heeft ghewonnen Phaleg,

17

ende nae dat hy Phaleg ghewonnen hadde, soe leefde Heber vierhondert ende dertich iaren, ende wan sonen ende dochteren.

18

Phaleg leefde oec dertich iaren, ende heeft ghewonnen Reu,

19

ende Phaleg heeft gheleeft nae dat hy Reu ghewonnen hadde, twee hondert ende neghen iaren, ende wan sonen ende dochteren.

20

Voerts soe heeft Reu gheleeft tweendertich iaren, ende heeft gewonnen Sarug,

21

ende Reu leefde nae dat hy Saruch ghewonnen hadde, twee hondert ende seuen iaren, ende wan sonen ende dochteren.

22

Ende Saruch heeft gheleeft dertich iaren, ende heeft ghewonnen Nachor,

23

ende Saruch leefde nae dat hy Nachor ghewonnen hadde, tweehondert iaren, ende wan sonen ende dochteren.

24

Nachor leefde neghen ende twintich iaren, ende heeft ghewonnen Thare,

25

ende nae dat hy Thare ghewonnen hadde, heeft Nachor gheleeft hondert ende neghenthien iaren, ende hi wan sonen ende dochteren.

26

⁺Ende Thare leefde tseuentich iaren, ende ende heeft ghewonnen Abram ende Nachor ende Aran.

+ D

27

Ende dit sijn die gheslachten van Thare, Thare heeft gewonnen, Abram, Nachor ende Aran, Voerts soe heeft Aran ghewonnen Lot,

28

ende Aran es ghestoruen voer Thare sijnen vader, in dlant daer hy geboren was, te Vr der Chaldeen.

29

§ Maer Abram ende Nachor hebben huysvrouwen genomen, Den naem van Abrams huysvrouwe was Sarai, ende den naem van Nachors huysvrouwe was Melcha, een dochter van Aran, die vader was van Melcha, ende vader van Iescha,

30

Maer Sarai was onturuchtbaer ende sij en hadde gheen kinderen.

31

Aldus soe heeft Thare ghenomen Abram sijnen sone, ende Lot sijns soens Arans sone, ende Sarai sijn behoude dochter Abrams sijns soens huysvrouwe, ende hi heeft die geleyt van Hur der Chaldeen, dat sij souden int lant van Chanaan ghaen, ende sij sijn comen tot Haran, ende hebben daer ghewoont.

32

Ende die daghen van Thare sijn gheworden twee hondert ende vijf iaren, ende hy es ghestoruen te Haran.