Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺MAer Godt heeft gedacht op Noe, ende op alle dat ghedierte, ende alle dat vee, dwelc met hem was inder arcken, ende hy heeft eenen wint op die eerde ghebracht, ende die wateren sijn ghemindert,

+ A

2

ende die fonteynen des afgronts ende die sluysen des hemels sijn ghesloten, ende den reghen vanden hemel wort opghehouden,

3

ende die wateren sijn wederghekeert vander eerden gaende ende wedercomende, ende beghonsten te minderen nae hondert ende vijftich daghen.

4

Ende die arcke heeft gherust in die seuenste maent, den seuenthiensten dach der maent, op tgheberchte van Armenien,

5

Maer die wateren ghingen ende minderden tot die thienste maent, want in die thienste maent, den iersten daghe vander maent, soe worden ghesien die toppen der berghen.

6

⁺Ende doen veertich iaren ouerleden waren, Noe open doende die vinster welck hy ghemaeckt hadde, heeft een raue wt ghelaten,

+ B

7

die welck ghinck wt, ende sij en keerde niet weder, tot dat die wateren verdroocht waren op die eerde.

8

Ende hy heeft nae die raue oeck een duyue wtghelaten, om dat hy sien soude oft die wateren nv wech waren, van dat aensicht der eerden,

9

Die welcke (doen sij niet en vant daer haren voet rusten mocht) es weder tot hem comen inder arcken, want die wateren waren op alle aertrijc. Ende Noe stack sijn hant wt ende greep die duyue, en brachtse weder in die arcke,

10

Maer verbeydende voert noch seuen daghen, soe heeft hy weder die duyue wter arcken ghelaten,

11

ende sij quam tot hem tsauonts, draghende eenen olijftack met groeyende bladeren in haren beck. ⁺Dus soe heeft Noe verstaen dat die wateren vergaen waren opder eerden,

+ C

12

Ende niet te min heeft hy noch seuen ander daghen ghebeydt, ende heeft die duyue wtghelaten, die welck niet meer en es tot hem wedercomen.

13

Aldus dan in dat seshonderste ende eenen iare, ter ierster maent, opden iersten dach der maent, soe sijn die wateren ghemindert opder eerden, Ende Noe open doende het dack vander arcken, heeft aenghemerckt ende ghesien, dat het ouerste der eerden ghedroocht was.

14

Ter tweeder maent, opden seuen ende twintichsten dach dier maent, soe es het aertrijck ghedroocht

15

Ende Godt heeft tot Noe ghesproken segghende,

16

Gaet wter arcken ghy ende v huysvrouwe, v sonen ende die huysvrouwen van uwen sonen met v,

17

Alle dieren die bi v sijn, van alderley vleesch, soe wel van die voghelen, als vanden beesten, ende van alderley cruypende dieren, die opder eerden cruypen, leydet wt met v, ende gaet in opder eerden, Wast, ende wordt vermenichfuldicht op die eerde.

18

⁺Soe es dan Noe wt gheghaen, sijn sonen ende sijn huysvrouwe, ende die huysvrouwen van sijnen sonen met hem,

+ D

19

maer oeck alle leuende ghedierte, vee, ende ghewormte welck opder eerden cruypen elck nae haer natuere, sijn wter arcken gheghaen.

20

Ende Noe heeft den Heere eenen outaer ghemaect, ende nemende van alle den suyueren beesten ende voghelen, heeft hy die op den outaer gheoffert tot eenen brantoffer,

21

ende die Heere heeft gheroken den rueck der sueticheyt, ende heeft tot hem gheseyt Ick en sal voertaen niet meer die eerde vermalendijden om der menschen wille, want die sinnen ende het ghedachte van des menschen herte sijn tot quaet gheneycht van haer ioncheyt, Daerom soe en sal ick niet meer verslaen alle leuende ghedierte, als ic ghedaen hebbe,

22

Alle die daghen des aertrijcs, soe en sullen niet rusten, den saeytijt ende den maeytijt, couwe ende hitte, somer ende winter, nacht ende dach.