Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde Godt heeft Noe ghebenedijt, ende sijn kinderen, ende heeft tot hem gheseyt, Wast en wordt vermenichfuldicht, ende veruult dat aertrijck.

+ A

2

Ende die vreese ende grouwel van vlieden sij op alle dat ghedierte der eerden, ende op alle dat ghevoghelte des hemels, met alle dat hem roert op der eerden, Alle die visschen der zee sijn uwer hant gheleuert.

3

Ende al dat hem roert, ende dat leeft, sal v wesen tot een spijse, Ick heb v alle dese ghegheuen als groene cruyden,

4

wtghenomen dat ghi het vleesch niet en sult eten metten bloede,

5

Want het bloet van uwen zielen sal ick versuecken van alderley beesten hant, ende vander hant des menschen, van die hant des mans, ende van sijns broeders hant sal ick versoecken, die ziele des menschen.

6

⁺Soe wie menschen bloet stort, diens bloet sal oec ghestort worden, want die mensche es ghemaect na dat beelde Gods,

+ B

7

maer wast ghy ende wordt vermenichfuldicht, en gaet in op die eerde ende veruult die.

8

Dit heeft Godt oeck gheseyt tot Noe, ende tot sijnen sonen met hem,

9

Siet, ick sal een verbont vast maken met v lieden, ende met uwen sade nae v,

10

ende tot elcke leuende ziele die met v is, soe wel tot die voghelen als tot die behulpelijcke dieren, ende beesten der eerden, ende tot alle dat wter arcken gheghaen es, ende tot allen ghedierte der eerden,

11

Ick sal mijn verbont met v lieden vast maken, alsoe dat voertaen niet meer en sal ghedoot worden alle vleesch, met die wateren des oueruloets, noch daer en sal voertaen gheenen oueruloet meer wesen die daertrijck verderuen sal.

12

Ende Godt heeft gheseyt, Dit es het teeken des verbonts dat ick gheue tusschen my ende v, ende tot alle leuende ziele, die met v lieden is in eewigher geboerten.

13

Ick sal mijnen boghe stellen in die wolcken, ende die sal een teeken des verbonts sijn tusschen my ende tusschen die eerde.

14

⁺Ende soe wannneer ick den hemel sal met wolcken ouertrocken hebben, dan sal mijnen boghe hem openbaren in die wolcken,

+ C

15

ende ick sal ghedachtich wesen des verbons welck ick ghemaeckt hebbe met v, ende met alle leuende ziele die eenich vleesch leuende maeckt. Ende die wateren des oueruloets en sullen niet meer wesen om alle vleesch te bederuen,

16

Ende mijnen boghe sal

[p. *48]

in die wolcken wesen, ende ic sal dien sien, ende ick sal ghedachtich wesen des eewighen verbonts dat vast ghemaeckt es tusschen Godt ende tusschen alle leuende zielen van alderley vleesch, welck opder eerden es.

17

Ende Godt heeft geseyt tot Noe, dit es het teeken des verbonts dat ic vast ghestelt hebbe tusschen my ende alle vleesch opder eerden.

18

Aldus waren die sonen van Noe die wter arcken gegaen waren, Sem, Cham, ende Iaphet, Voerts Cham die es vader van Chanaan,

19

Dese drij sijn die sonen van Noe, ende van dese sijn breet ghesaeyt alle gheslachten van menschen ouer dat gheheele aertrijck.

20

⁺Ende Noe een ackerman heeft begonst die aerde te oeffenen, ende hy heeft eenen wijngaert geplant,

+ D

21

ende als hy wijn ghedroncken hadde soe es hi droncken gheworden, ende es ondect in sijn tabernakel,

22

Het welck als Cham die vader van Chanaan ghesien hadde, te weten dat sijns vaders scamelheyt ondect was, soe heeft hy dat sijnen twee broeders te kennen ghegheuen die buyten waren,

23

Maer Sem ende Iaphet die leyden eenen mantel op haer schouderen, ende achterwaerts gaende, hebben sij haers vaders scamelheyt bedect, ende haer aensichten waren omghekeert, ende haers vaders scamelheyt en hebben sij niet ghesien.

24

Maer als Noe ontwaecte van den wijne, ende hi vernam wat hem sijn ioncste sone ghedaen hadde,

25

soe heeft hy gheseyt, Vermalendijt sij Chanaan, een knecht der knechten sal hy sijnen broeders wesen,

26

ende hy heeft oeck gheseyt, Ghebenedijt moet wesen Godt die Heere van Sem, Chanaan moet sijn knecht wesen,

27

God wil verbreyden Iaphet, ende dat hi woone in die tabernakelen van Sem, ende Chanaan sij sijn knecht.

28

Ende Noe heeft gheleeft nae den oueruloet, drijhondert ende vijftich iaren,

29

ende alle sijn daghen sijn veruult tot neghen hondert ende vijftich iaren, ende hy es ghestoruen.