Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *46]

Dat .vi. Capittel.

1

⁺ALs nv die menschen beghonsten te vermenichfuldighen op der eerden ende dat sij dochteren ghewonnen hadden,

+ A

2

die kinderen Gods siende die dochteren der menschen dat sij schoon waren, hebben sij wt alle die, huysvrouwen ghenomen die sij vercoren hadden.

3

Ende Godt heeft gheseyt, Mijnen gheest en sal eewelijc inden mensch niet blijuen, want hy vleesch es, ende sijn daghen sullen wesen hondert ende twintich iaren.

4

Ende daer waren in dien tijden ruesen op der eerden, want na dat die kinderen Gods met die dochteren der menschen versaemt sijn, ende sij kinderen voertbrachten, dese waren gheweldighe der werelt, ende vermaerde mannen.

5

⁺Ende Godt siende dat der menschen boosheyt veel was opder eerden, ende dat alle der herten ghedachten tot quaet gheneycht waren tot allen tijden,

+ B

6

soe eest hem berouden dat hy den mensch op die aerde ghemaeckt hadde. Ende om dat te verhoeden in toecomende tijden, ende beroert sijnde met eenen rouwe sijns herten van binnen,

7

heeft hy gheseyt, Ick sal den mensch die ick gheschapen hebbe te niet doen vander eerden, vanden mensch voerts aen totten beesten, ende vanden cruypende dieren totten vogelen der locht, want het beroudt my dat ic die ghemaect hebbe.

8

Maer Noe heeft gratie gheuonden voer Godt.

9

Dit zijn die generatien van Noe, Noe was een rechtueerdich ende een volmaeckt man in sijn gheslachten, met Gode heeft hy ghewandelt,

10

Ende hy heeft ghewonnen drij sonen, Sem, Cham ende Iaphet.

11

Ende die eerde es verdoruen voer Godt, ende veruult met boosheden.

12

⁺Als Godt dan ghesien hadde dat die eerde verdoruen was (want alle vleesch hadde sijnen ghanck verarghert opder eerden)

+ C

13

soe seyde hy tot Noe, Het eynde van allen vleesche es voer my comen, die eerde es met boosheyt veruult van haren aenschijn, ende ick salse verderuen metter eerden,

14

Maect v een arcke van gheschaefden houte, ende ghy sult in die arke woonstedekens maken, ende ghy sultse met lijm bestrijken van binnen ende van buyten,

15

ende aldus suldi die maken,

Die lengde der arcken sal wesen van drij hondert cubitus, die wijdde van vijftich cubitus, ende die hoochde van dertich cubitus.

16

Een venster suldi inder arcken maken, ende ghy sult die in haer opperste tot eenen cubitus volbrenghen, Maer die doere der arcken suldi ter sijden nederwaerts stellen, ende ghy sult daer eetcameren ende drij stagien in maken.

17

⁺Siet ick sal eenen oueruloet der wateren aen brenghen opder eerden, om te dooden alle vleesch daer eenen gheest des leuens in es onder den hemel, ende alle dat opder eerden es sal te niet ghebracht worden,

+ D

18

Ende ic sal mijn verbont met v maken, ende ghy sult in die arcke gaen, ghy ende v sonen, v huysvrouwe, ende uwer sonen huysvrouwen met v,

19

Ende wt allen ghedierte van allen vleesche suldi by paren in die arcke brenghen, op datsij met v leuen beyde mannekens ende wijfkens.

20

Vanden voghelen nae haerder nature, ende van dat vee nae haerder nature, ende wt allen cruypende dieren der aerden nae haren nature. Dese sullen elcs een paer met v daer in gaen, op dat sij moghen leuen,

21

Daer om suldi oec met v nemen van alderley voetselen diemen eten mach, ende sult die by v by een draghen, en die sullen alsoe wel v, als den beesten wesen tot spijse.

22

Dus heeft Noe ghedaen alle dat hem Godt gheboden hadde.

[afbeelding]