Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde Adam heeft sijn huysvrouwe Euam bekent, die welcke heeft ontfangen ende gebaert Cain, seggende, Ic heb eenen mensch vercreghen doer God.

+ A

2

Ende anderweruen heeft sij ghebaert sijnen broeder Abel, Maer Abel was een scaepherder, ende Cain een ackerman.

3

Ende tes ghebuert na veel daghen dat Cain offerde ghiften den Heere van die vruchten der eerden,

4

Ende Abel offerde oeck van die eerste gheborenen sijnder cudden, ende van haren vetten. Ende Godt sach tot Abel ende tot sijn ghiften,

5

maer tot Cain ende tot sijnen ghiften en sach hy niet, ende Cain es seer machtelick ghestoort gheweest, ende sijn aensicht es ingheuallen.

6

Ende die Heere heeft tot hem gheseyt, Waerom sijdi gram ende waerom es v aensicht ingheuallen?

7

Eest sake dat ghy wel doet, en suldi dat niet ontfanghen? maer eest dat ghy qualick doet, en sal v sonde niet terstont wesen by v? Maer onder v sal haren lust wesen ende ghy sult daer heerscappie ouer hebben.

[p. *45]

8

⁺Ende Cain heeft gheseyt tot Abel sijnen broeder, Laet ons buyten gaen, ende als sij opten velde waren soe es Cain opghestaen teghen sijnen broeder Abel ende heeft hem doot gheslaghen.

+ B

9

Ende die Heere heeft geseyt tot Cain. Waer es Abel v broeder? Die welcke antwoerde, Ic en weets niet. Ben ic mijns broeders behoeder?

10

Ende die Heere heeft tot hem gheseyt, Wat hebdi gedaen? Ws broeders bloet roept tot my vander eerden.

11

Nv dan daer om suldi vermalendijt wesen op der eerden die haren muyl heeft open ghedaen, ende het bloet ws broeders ontfangen van uwer hant.

12

Als ghi die eerde sult ghebouwet hebben, soe en sal sij haer vruchten niet gheuen, ongheduerich ende voervluchtich suldi wesen op der eerden.

13

Ende Cain heeft gheseyt totten Heere, Mijn boosheyt es meerder, dan dat ic ghenade mach verdienen.

14

Siet ghy veriaecht mi heden van daensicht der eerden, en ic sal verborgen worden van uwen aensicht, ende ic sal ongeduerich ende voervluchtich wesen op die eerde, daerom soe wie my vint die sal my dootslaen.

15

⁺Ende die Heere heeft tot hem gheseyt, Ten sal alsoe niet gheschieden. Maer soe wie Cain dootslaet, die sal seuenfout gewroken worden. Ende die Heere heeft een teeken in Cain ghestelt, dat een yeghelijck die hem vonde hem niet en soude dooden.

+ C

16

Ende Cain es wt ghegaen van daensicht des Heeren, ende hy heeft vluchtich ghewoont op die eerde aen die oost sijde van Eden.

17

Ende Cain heeft sijn huysvrouwe bekent, die welcke heeft ontfanghen ende ghebaert Henoch. Ende hy timmerde een stadt, ende hy noemde die na den naem van sijnen sone Henoch,

18

Ende Henoch heeft ghewonnen Irad, ende Irad heeft gewonnen Mauiael, ende Mauiael heeft ghewonnen Mathusael, ende Mathusael heeft ghewonnen Lamech,

19

die welcke heeft ghenomen twee huysvrouwen, den naem der eender was Ada, ende den naem der ander was Sella.

20

Ende Ada bracht voerts Iabel, die welck een vader was der geender die in tabernaculen woonden, ende der herders.

21

Ende den naem sijns broeders was Iubal, die een vader was van die songen ende speelden met herpen, ende orgelen.

22

⁺Ende Sella die wan Tubalcain die een smit was ende een constenaer in alle wercken van metael ende van ysere. Ende die suster van Tubalcain was Noema.

+ D

23

Ende Lamech seyde tot sijnen huysvrouwen Ada ende Sella, Hoort mijn stemme ghi huysvrouwen van Lamech, neemt waer mijn woorden, want ick heb eenen man verslaghen tot mijnder wonden, ende eenen ionghelinck tot mijnder quetsueren,

24

seuenfout wrake sal ghedaen worden van Cain, maer van Lamech seuentichwerf seuenfout.

25

Ende Adam heeft noch sijn huysvrouwe bekent ende sij heeft eenen sone ghebaert, ende hiet sijnen naem Seth, segghende God heeft mi een ander saet ghestelt voer Abel, den welcken Cain verslaghen heeft.

26

Ende Seth worde oeck eenen soen gheboren, den welcken hy noemde Enos, dese begonste aen te roepen den naem des Heeren.