Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer oeck het serpent was listigher dan alle ghedierte der eerden, die Godt die Heere ghemaect hadde, Dwelc heeft geseyt totter vrouwen. Waerom heeft v Godt gheboden, dat ghy niet eten en soudt van alderley boomen des paradijs?

+ A

2

Den welcken heeft die vrouwe gheantwoort Van die vruchten der boomen die int paradijs sijn eten wi,

3

maer van die vrucht des booms die int midden des paradijs es, heeft ons Godt gheboden, dat wij niet eten en souden, ende dat wij dat niet en souden aentasten, op dat wij by auontueren niet en steruen.

4

Maer het serpent heeft gheseyt totter vrouwen, Ghy en sult gheensins die doot steruen,

5

want God weet, dat, in wat daghe ghy daer af eten sult, soe sullen v ooghen gheopent worden, ende ghy sult wesen als goden, wetende goet ende quaet.

6

Dus soe heeft die vrouwe ghesien dat desen boom goet was om te eten, ende schoon den ooghen, ende lustich te aensien, ende heeft van sijn vrucht ghenomen, en heeft dat gheten, ende heeft dat haren man gegheuen, die welcke dat heeft gheten.

7

⁺Ende die ooghen van haer beyden sijn gheopent, ende als sij kenden dat sij naect waren, soe hechten sij tsamen vijgebladeren, en hebben hen seluen ghemaect voordecsels.

+ B

8

Ende als sij gehoort hadden die stemme van Godt den Heere wandelende int paradijs ter locht nae middach, soe heeft hem Adam met sijnen wijue gheborghen int midden vanden boomen des paradijs, van den aensicht Gods des Heeren.

9

Ende Godt die Heere heeft Adam gheroepen, ende hem gheseyt. Waer sijdi?

10

Die welck antwoorde, Ick heb v stemme ghehoort int paradijs ende ic heb ghevreest, om dat ick naect was, ende ick heb my gheberghen.

11

Tot wien die Heere seyde, Maer wie heeft v te kennen ghegeuen dat ghy naect waert, anders dan dat ghy hebt [afbeelding] gheten vanden boome daer ic v afbeuolen hadde dat ghi daer af niet eten en soudt.

12

Ende Adam heeft gheseyt Dat wijf welc ghy my tot een ghesellinne hebt ghegheuen, die heeft my vanden boom gegheuen, ende ic hebt gheten.

13

⁺Ende doen seyde God die Heere totter vrouweu. Waerom hebdi dit ghedaen? Die welcke heeft gheantwoort. Dat serpent heeft my bedrogen ende ic hebt gheten.

+ C

14

Ende God die Heere heeft gheseyt tot dat serpent, want ghy dat ghedaen hebt soe sijdi vermalendijt onder alle ghedierte ende beesten der eerden, op v borst suldi gaen, ende ghy sult eerde eten alle die daghen ws leuens,

15

Ic sal viantschap stellen tusschen v ende der vrouwen, ende tusschen v saet ende haer saet, Sij sal v hooft verpletten ende ghi sult haerder verssenen laghen legghen.

16

Ende totter vrouwen heeft hy oeck gheseyt, Ic sal v allendicheden ende v ontfanckenissen vermenichfuldighen, met pijnen suldi v kinderen baren, ende ghi sult onder die macht des mans wesen, ende hi sal heerscappie ouer v hebben.

17

Maer tot Adam heeft hy gheseyt, Om dat ghy ghehoort hebt die stemme van uwer huysvrouwe, ende gheten hebt vanden boome vanden welcken ic v gheboden hadde dat ghy daer niet af eten en soudt, soe es die eerde vermalendijt in v werck, in arbeyden suldi daer af eten, alle die dagen ws leuens,

18

dornen ende distelen sal sij v voortbrengen, ende ghy sult eten die cruyden der eerden,

19

⁺Int sweet ws aensichts suldi v broot eten, tot dat ghy weder keert in die eerde daer ghy af ghenomen sijt, want ghy sijt stof der aerden, ende sult wederom stof worden.

+ D

20

Ende Adam heeft genoemt den naem sijnder huysvrouwen Heua, om dat sij soude wesen een moeder van alle dat leuende es.

21

Ende Godt die Heere heeft Adam ende sijnder huysvrouwen ghemaect pels rocken ende trocse hen aen

22

Ende hi seyde, Siet Adam es geworden als een van ons, wetende goet ende quaet. Hier om op dat hy nv by auontueren sijn hant niet wt en reycke, ende neme vanden boom des leuens ende ete, ende leue inder eewicheyt.

23

Die Heere Godt heeft hem gesonden wten paradijse der wellusticheden, dat hi die eerde soude wercken, daer hi af ghenomen es,

24

ende hy heeft Adam daer wt gheworpen, ende heeft voert paradijs der weelden ghestelt Cherubim, ende een vlammich sweert licht om keeren, om te bewaren den wech totten boom des leuens.