Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺HIer om sijn die hemelen ende die aerde volmaect ende allen haer cieraet,

+ A

2

ende Godt heeft opden seuensten dach voldaen alle sijn werck dat hy ghemaect hadde, ende hy heeft gerust opten seuensten dach van alle sijn werck dat hy volmaect hadde.

3

Ende hy heeft den seuensten dach ghebenedijt, ende heeft dien gheheylicht, want hy in dien hadde opghehouden van alle sijnen wercke welck God gheschapen hadde om te maken.

4

Dit sijn die voortbrencxselen van hemel ende eerde als sij gheschapen sijn gheweest, Inden dach, als Godt die Heere hemel ende aerde heeft gheschapen,

5

ende alderley spruyten des velts, eert wies opter eerden, ende alderley cruyt des lants eer dat groeyde. Want God die Heere en hadde niet ghereghent op der eerden, ende daer en was gheen mensch die dat lant boude.

6

Maer daer ghinck een fonteyn wter eerden op vochtichmakende alle dat ouerste der eerden.

7

⁺Aldus heeft dan Godt die Heere den mensch gemaect vanden slijm der eerden, eude hy heeft in sijn aensicht gheblasen eenen adem des leuens, ende die mensch es gheworden tot een leuende siele.

+ B

8

Ende God hadde vanden beghinne geplant een paradijs der wellusticheden, waer in hi ghestelt heeft den mensch die hy ghemaect hadde.

9

Ende die Heere God heeft wter eerden voertbracht alderley boomen lustich om sien, ende suet om teten, ende oeck den boom des leuens int midden des paradijs, ende den boom der wetenheyt van goet, ende quaet.

10

Ende eenen vloet ghick wt dier plaetsen der weelden, om dat paradijs te wateren, die welck van daer voerts ghedeylt wordt in vier hoofden.

11

Deene es ghenoemt Phison, desen es die omgaet alle dat lant van Heuilath, daer wast gout,

12

ende tgout van dien lande es dalder beste, ende aldaer vintmen Bdellium, ende den steen Onichinus.

13

⁺Ende den naem van den tweeden vloet es Gehon, dese es die daer omme loopt alle dat moorianen lant.

+ C

14

Maer den naem van den derden vloet, es Tygris, dese gaet teghen die van Assyrien. Ende den vierden vloet es Euphrates.

15

Aldus heeft Godt die Heere den mensche ghenomen, ende heeft hem ghestelt int paradijs der wellusticheden, dat hy dat bouwen ende bewaren soude,

16

ende hy heeft hem beuolen segghende, Etet van alle die boomen des paradijs,

17

maer vanden boom der wetenheyt van goet ende quaet soe en etet niet, want op wat dach dat ghy daer af etet, soe suldi die doot steruen.

18

Ende Godt die Heere heeft ooc gheseyt Ten es niet goet, den mensch alleen te sijn, laet ons hem een helpe maken sijns ghelijcke.

19

⁺Als dan Godt die Heere vander eerden ghemaect hadde alle ghedierte der eerden, ende alle dat ghevoghelte des hemels, soe heeft hy die ghebrocht voer Adam, dat hij soude besien, hoe hy die noemen soude, want alle leuende ghedierte es ghenaemt geweest, alsoe Adam dat heeft ghenoemt.

+ D

20

Ende Adam heeft alle ghedierte ghenoemt elc met sijnen name, ende alle dat ghevogelte der locht, ende alle die beesten der eerden, Maer men vant gheen helper die Adams ghelijck was.

21

Dus heeft Godt die Heere eenen grooten slaep in Adam gesonden, ende als hy in slape was, soe heeft

[p. *44]

hy een van sijnen ribben genomen ende heeft die plaetse met vleesch gheuult,

22

ende God die Heere heeft een vrouwe ghesticht vander ribben die hy van Adam ghenomen hadde, ende hi heeftse tot Adam gebracht,

23

Ende Adam heeft gheseyt, Dat es nv een been van mijnen beenen, ende vleesch van mijnen vleesche, Dese sal Manninne ghenaemt worden, om dat sij vanden man genomen es.

24

Waerom soe sal een mensch verlaten sijnen vader ende moeder, ende sal sijn wijf aenhanghen, ende sij twee sullen wesen een vleesch.

25

Ende si waren beyde naeckt, te weten Adam ende sijn wijf, ende sij en scaemden hem niet.