Den gheheelen Bybel, Inhoudende het oude ende nieuwe Testament (Leuvense bijbel 1548)

Dat eerste Capittel.

1

⁺INDEN beginne heeft Godt geschapen hemel ende aerde,

+ A

2

maer die aerde was ydel ende ledich, ende die duysternissen waren op dat aenschijn des afgronts, ende den gheest Godts dreef op die wateren.

3

Ende Godt heeft geseyt, Laet gemaect worden het licht. Ende het licht worde gemaect,

4

ende Godt heeft dat licht ghesien dat goet was, ende hy heeft dat licht van die duysternisse gescheyden,

5

ende hy heeft dat licht genoemt dach, ende die duysternissen nacht, ende es gheworden auont ende morgen eenen dach.

6

Ende Godt heeft gheseyt, Laet een firmament gemaect worden int midden der wateren, ende tscheyde die wateren vanden wateren.

7

Ende Godt heeft dat firmament ghemaect ende heeft die wateren die onder dat firmament waren ghescheyden van die wateren die bouen dat firmament waren, ende het es alsoe geschiet.

8

Ende Godt heeft dat firmament ghenoemt den hemel, ende het es worden auont ende morghen,den tweeden dach.

9

⁺Ende Godt heeft gheseyt, Laet die wateren die onder den hemel sijn, vergadert worden op een plaetse, dat het drooghe gesien worde, Ende het is alsoe geschiet.

+ B

10

Ende Godt heeft het drooghe ghenoemt aerde, ende die vergaderinghe der wateren, heeft hi ghenoemt see. Ende Godt heeft ghesien dat goet

[p. *43]

was,

11

ende hy heeft gheseyt, Laet die aerde voerts brenghen groeyende cruyt ende saet voertsbrenghende, ende vruchtdraghende boomen die vrucht voertsbrengen nae hare natuere, dwelcks saet in sij seluen sij opter aerden, Ende het es alsoe geschiet.

12

Ende die aerde heeft groeyende cruyt voertsbracht, saet voertsbrenghende na sijn natuere, ende boomen vrucht voertbrengende, dat elc sijn saet hadde nae sijn besonder natuere. Ende die Heere heeft ghesien dattet goet was,

13

ende het es worden auont ende morghen, den derden dach.

14

Ende Godt heeft gheseyt, Laet gemaect worden lichten int firmament des hemels, ende dat die sceyden den dach, ende den nacht, ende laetse sijn tot teekenen, ende tijden, ende dagen, ende iaren

15

dat sij schijnen int firmament des hemels ende die aerde verlichten, Ende het es alsoe gheschiet.

16

⁺Ende Godt heeft twee groote lichten gemaect, dat grootste licht om dat ouer den dach sijn soude, ende het minste licht, dattet ouer den nacht sijn soude, Ende sterren,

+ C

17

Ende hy heeft die ghestelt int firmament des hemels, dat sij opter aerden souden lichten,

18

ende dat sij souden ouer den dach ende nacht sijn, ende dat sij het licht ende duysternissen scheyden souden. Ende Godt heeft ghesien dat goet was

19

Ende tes worden auont ende morghen den vierden dach.

20

Ende Godt heeft ooc gheseyt, Laet die wateren voertsbrenghen cruypende dieren die leuende sielen hebben, ende vlieghende ghedierte bouen die aerde onder dat firmanent des hemels,

21

Ende Godt heeft groote walvisschen gheschapen, ende alderhande leuende ende roerende sielen, welck die wateren voertsghebracht hadden nae haer besonder natuere, ende alle ghevoghelte elck nae sijne besonder natuer. Ende Godt heeft gesien dattet goet was,

22

ende hy heeft die ghebenedijt segghende, Wasset ende wert vermenichfuldicht, ende veruult die wateren der see, ende die vogelen werden vermenichfuldicht op die aerde.

23

Ende het es worden auont ende morghen den vijfsten dach.

24

Ende Godt heeft oock gheseyt, Laet die aerde voertsbrenghen leuende sielen elck nae haere natuere, behulpsame beesten, ende cruypende dieren, ende beesten der aerden nae haere besonder natuere. Ende het es alsoe ghesciet.

25

⁺Ende Godt heeft ghemaect die beesten der aerden na haer besonder natuere ende behulpsame dieren, ende alderhande cruypende gedierte der aerden elck nae sijn natuere. Ende Godt heeft ghesien dattet goet was,

+ D

26

ende heeft gheseyt,

Laet ons den mensch maken nae ons beelde ende ghelijckenisse, ende dat hi heerschappie hebbe ouer die visschen der see, ende ouer dat gheuoghelte der locht, ende ouer die beesten, ende ouer alle die aerde, ende ouer alle dat cruypende gedierte welc hem op die aerde roert.

27

Ende Godt heeft den mensche gheschapen nae sijnen beelde ende ghelijckenisse, nae Gods ghelijckenisse heeft hy hem geschapen, man ende vrouwe heeft hijse gheschapen.

28

Ende God heeftse ghebenedijt ende gheseyt, Wasset ende wort vermenichfuldicht, ende veruult die aerde, ende brengtse onder, ende hebt heerschappie ouer die visschen der see, ende ouer dat ghevoghelte des hemels, ende ouer alle ghedierte dat hem op die aerde roert.

29

Ende Godt heeft gheseyt, Siet ic heb v ghegheuen alle cruyt, saet voertsbrengende opder aerden, ende alle boomen die in haer seluen saet nae hare natuere hebben, dat die sijn tot een spijse, voer v,

30

ende voer allen gedierte der aerden, ende voer alle die voghelen des hemels, ende voer alle dat hem op die aerde roert, ende daer een leuende siele in es, dat sij moghen teten hebben. Ende het is alsoe geschiet.

31

Ende Godt heeft ghesien al dat hy ghemaect hadde, ende waren alle seer goet, ende het es geworden auont ende morghen den sesten dach.